(ភ្នំពេញ)៖ នារសៀលថ្ងៃទី១៦ ខែមីនា ឆ្នាំ២០២២នេះ ឯកឧត្តមនាយឧត្តមសេនីយ៍ វង្ស ពិសេន អគ្គមេបញ្ជាការកងយោធពលខេមរភូមិន្ទ បានទទួលជួបពិភាក្សាការងារជាមួយ ឯកឧត្តមឧត្តមសេនីយ៍ឯក MELVYN ONG មេបញ្ជាការកងទ័ពសឹង្ហបុរី ដែលជំនួបនេះបានធ្វើឡើងនៅសណ្ឋាគារសុខាភ្នំពេញ។
ក្នុងជំនួបនេះ ឯកឧត្តមនាយឧត្តមសេនីយ៍ វង្ស ពិសេន បានសម្ដែងនូវការស្វាគមន៍ចំពោះវត្តមានរបស់អគ្គមេបញ្ជាការកងទ័ពសិង្ហបុរី ដែលបានមកចូលរួមដោយផ្ទាល់ក្នុងកិច្ចប្រជុំអគ្គមេបញ្ជាការកងទ័ពអាស៊ានលើកទី១៩ ដែលជាការផ្ដល់កិត្តិយសដ៏សំខាន់ដល់កម្ពុជា។
ឯកឧត្តមនាយឧត្តមសេនីយ៍ អគ្គមេបញ្ជាការ សង្ឃឹមថា សម្រាប់កិច្ចប្រជុំអគ្គមេបញ្ជាការកងទ័ពអាស៊ាននៅថ្ងៃស្អែក ឯកឧត្តមឧត្តមសេនីយ៍ នឹងចូលរួមផ្លាស់ប្ដូរទស្សនៈល្អៗ ដើម្បីបន្តកសាងសហគមន៍អាស៊ានឲ្យឆ្ពោះទៅមុខ រក្សាបានសន្តិភាព ស្ថិរភាព និងវិបុលភាពនៅក្នុងតំបន់។
ក្នុងកិច្ចឆ្លើយតប ឯកឧត្តមឧត្តមសេនីយ៍ឯក MELVYN ONG បានសម្តែងនូវសេចក្តីរីករាយ ចំពោះការចូលរួមដោយផ្ទាល់ក្នុងកិច្ចប្រជុំអគ្គមេបញ្ជាការកងទ័ពអាស៊ានលើកនេះ ដែលជាឱកាសល្អសម្រាប់កិច្ចពិភាក្សារបស់កងទ័ពនៃបណ្តាប្រទេសជាសមាជិកអាស៊ាន៕
