ឯកឧត្ដមបណ្ឌិត ហង់ ជួន ណារ៉ុន បើកកិច្ចប្រជុំថ្នាក់តំបន់ស្ដីពី ការផ្តល់អាហារដល់សិស្សានុសិស្សតាមសាលារៀននៅកម្រិតបឋមសិក្សា


សៀមរាប៖ នា​ព្រឹក​ថ្ងៃ​ទី​១១ ខែ​កក្កដា ឆ្នាំ​២០១៧ នៅ​សណ្ឋាគារ​អង្គរ​អេរ៉ា មាន​ប្រារព្ធ​​កិច្ច​ប្រជុំ​ថ្នាក់​តំបន់​ស្ដី​ពី​ “ការ​ផ្តល់​អាហារ​ដល់​សិស្សានុសិស្ស​តាម​សាលារៀន​នៅ​កម្រិត​បឋមសិក្សា” ក្រោមអធិបតីភាព​ឯកឧត្ដម​បណ្ឌិត​ ហង់ ជួន ណារ៉ុន រដ្ឋមន្ត្រី​ក្រសួង​អប់រំ យុវជន និង​កីឡា ក្រោម​វត្តមាន​ចូលរួម​ពី​សំណាក់​លោក លោកស្រី​តំណាង​ក្រសួង​អប់រំ​មកពី​ប្រទេស​ចំនួន​០៧ និង​សមាជិក សមាជិកា​អង្គការ​ស្បៀង​អាហារ​អន្តរជាតិ​ប្រចាំ​ប្រទេស​នីមួយៗ​ផង​ដែរ។
ថ្លែង​ក្នុង​ពិធី​នេះ ឯកឧត្ដម​រដ្ឋមន្ត្រី​បាន​មាន​ប្រសាសន៍​កោត​សរសើរ​ចំពោះ​ប្រទេស​សមាជិក​​ដែល​បាន​ចូលរួម​ ជា​ពិសេស​តំណាង​អង្គការ​ស្បៀង​អាហារ​ពិភពលោក​ ដែល​តែង​តែ​គាំទ្រ​ដល់​រាជរដ្ឋាភិបាល​កម្ពុជា​ក្នុង​ការ​​ចូលរួម​​ចំណែក​អភិវឌ្ឍ​ធនធាន​មនុស្ស ដើម្បី​សម្រេច​បាន​នូវ​គោលដៅ​អប់រំ​ជា​ច្រើន​នៅ​កម្ពុជា។ ឯកឧត្ដម​បាន​បន្ថែម​ថាន កម្មវិធី​ផ្ដល់​អាហារ​ដល់​សិស្សានុសិស្ស​នៅ​តាម​សាលារៀន​នេះ គឺ​ជា​កម្មវិធីដ៏​មាន​សារៈសំខាន់​មួយ​ក្នុង​ការ​លើក​កម្ពស់​ការ​ចូលរួម​ប្រកបដោយ សមធម៌​សម្រាប់​ការ​អប់រំ​ជូន​ដល់​សិស្សានុសិស្ស​នៅ​តាម​សហគមន៍​ក្រីក្រ និង​អាច​ធ្វើ​ឲ្យ​ពួកគាត់​មាន​លទ្ធភាព​បន្ត​ការ​សិក្សា​នៅ​កាន់​កម្រិត​ខ្ពស់​បន្តបន្ទាប់​ទៀត។