អគារវេជ្ជសាស្ត្រថ្មីនៃមន្ទីរពេទ្យបង្អែកខេត្តព្រះសីហនុ ក្រោមជំនួយរបស់រដ្ឋាភិបាលប្រទេសជប៉ុន បានដាក់សម្ពោធឱ្យប្រើប្រាស់នៅព្រឹកថ្ងៃទី២៩ ខែកុម្ភៈនេះ ក្រោមអធិបតីភាពដ៏ខ្ពង់ខ្ពស់ពី សម្តេចតេជោនាយករដ្ឋមន្ត្រី ហ៊ុន សែន និង ឯកអគ្គរដ្ឋទូតជប៉ុន ឯកឧត្តម កូម៉ាម៉ារុ យូជិ តំណាងម្ចាស់ជំនួយ បានអញ្ជើញចូលរួមក្នុងពិធីសម្ពោធអគារថ្មីនេះផងដែរ ។ អគារវេជ្ជសាស្ត្រថ្មីទាំង៥ នេះ សាងសង់ក្នុងតម្លៃទឹកប្រាក់ ១៥លាន ៤សែន ៥ម៉ឺនដុល្លារអាម៉េរិក ។
រដ្ឋមន្ត្រីសុខាភិបាល ឯកឧត្តម ម៉ម ប៊ុនហេង បានមានប្រសាសន៍ថា អគារថ្មីចំនួន៥ ដែលបានសាងសង់ក្នុងរយៈ ១៦ខែ រួមមានៈ
១- អគារសង្គ្រោះបន្ទាន់រូបភាពវេជ្ជសាស្ត្រនិងបន្ទប់វះកាត់
២- អគារសម្ពពរោគស្ត្រីនិងជម្ងឺកុមារ
៣- អគារជម្ងឺទូទៅនិងជម្ងឺវះកាត់
៤- អគាររដ្ឋបាល
៥- អគារផ្នែកផ្តល់សេវាគាំទ្រ ក្នុងនោះ មានបន្ទប់ផ្គត់ផ្គង់ចរន្តអគ្គីសនី… ម៉ាស៊ីនភ្លើង… អាងស្តុកទឹកស្អាត… បាសាំងទឹក… អាងចម្រោះទឹកកខ្វក់និងប្រព័ន្ធពន្លត់អគ្គីភ័យ សម្រាប់ផ្គត់ផ្គង់ក្នុងសំណង់ថ្មី ដែលបង្កើតក្នុងមន្ទីរពេទ្យបង្អែកក្រុងព្រះសីហនុ នេះផងដែរ រួមមានសម្ភារៈបរិក្ខាពេទ្យចំនួន ៩១មុខ… និងការបណ្តុះបណ្តាលធនធានមនុស្ស ទាំងនៅក្នុងប្រទេសជប៉ុន និងកម្ពុជាផងដែរ ។
សម្តេចតេជោសែន នាយករដ្ឋមន្ត្រី មានប្រសាសន៍ក្នុងពិធីសម្ពោធមន្ទីរពេទ្យ ថាពិតជាមានគ្រូពេទ្យដែលខិលខូចតិចតួច ដែលធ្វើឱ្យប្រជាជនក្តៅក្រហាយ ដោយសារតែការគិតពីរឿងលុយធំជាងបញ្ហាសុខភាពនោះមែន… ប៉ុន្តែ ក្រុមគ្រូពេទ្យដែលបានបំរើប្រជាជនបានល្អ មានច្រើនណាស់ ។
ខេត្តព្រះសីហនុ បច្ចុប្បន្នមានមន្ទីរពេទ្យខេត្ត១… មណ្ឌលសុខភាពចំនួន៣ និងប៉ុស្តិ៍ភាពចំនួន៣ ផងដែរ ។ ខេត្តមានមន្ត្រី បុគ្គលិកសុខាភិបាលសរុប ៣៤៦នាក់ ក្នុងនោះមានវេជ្ជបណ្ឌិតឯកទេស ១នាក់… វេជ្ជបណ្ឌិត៤១នាក់… គ្រូពេទ្យមធ្យម ៨នាក់… ឱសថការី ១២នាក់… ឱសថការីមធ្យម ១នាក់… ទន្តបណ្ឌិត ៤នាក់… អ្នកព្យាបាលដោយចលនា ១នាក់… គិលានុបដ្ឋាកមធ្យម ១២៦នាក់… គីលានុបដ្ឋាកបឋម ៤៦នាក់ ឆ្មបមធ្យម ៦១នាក់… ឆ្មបបឋម ៣៤នាក់… អ្នកពិសោធន៍មធ្យម ៧នាក់… វិទ្យុសាស្ត្រ ២នាក់ និងបុគ្គលិកផ្សេងៗ ២នាក់ ។