ក្រសួងសុខាភិបាលបានចេញលិខិត ដាស់តឿនក្រមសីលធម៌ ៥ចំណុច ដល់គ្រូពេទ្យនៅតាមបណ្តាអង្គភាពនានា ក្នុងស្ថានការណ៍ដែលក្រុមគ្រូពេទ្យមួយចំនួន នៅតែរងការចោទប្រកាន់ទង្វើអសីលធម៌ ។ លិខិតដាស់តឿនក្រមសីលធម៌នេះ បានចុះហត្ថលេខាដោយ ឯកឧត្តមរដ្ឋមន្ត្រីក្រសួងសុខាភិបាល ម៉ម ប៊ុនហេង កាលពីថ្ងៃទី ៧មីនា ។
លិខិតបញ្ជា៥ចំណុចរួមមានៈ
ទី១- ត្រូវយកចិត្តទុកដាក់បំរើសេវាជូនអតិថិជន គោរពវិជ្ជាជីវ: ក្រមសីលធម៌ថ្លៃថ្នូរ មិនគិតលុយជាធំ សម្តីទន់ភ្លន់ អាកប្បកិរិយាសមរម្យ និងជាពិសេសអ្នកគ្រោះថ្នាក់ចរាចរណ៍ ត្រូវសង្រ្គោះជាបន្ទាន់សិន និងត្រូវបំពេញសំណុំបែបបទតាមក្រោយ ។
ទី២- ចេញវេជ្ជបញ្ជាស្របតាមក្បូនខ្នាត ហាមសរសេរអក្សរកាត់ សរសេរខ្ជីខ្ជា អានមិនបាន… ត្រូវប្រើភាសាខ្មែរជាជំនួយ សម្រាប់អ្នកប្រើប្រាស់ងាយយល់ និងប្រតិបត្តិតាមវេជ្ជបញ្ជា ។
ទី៣- ចេញវេជ្ជបញ្ជាថ្នាំចាក់ មានហេតុផលត្រឹមត្រូវ និងអនុវត្តគោលការណ៍ការចាក់ថ្នាំមានសុវត្តិភាព ។
ទី៤- វេចខ្ចប់ថ្នាំ ឬឱសថ ត្រូវរក្សាភាពដើម ទម្រង់ដើម ហាមលុបស្លាកសញ្ញាឈ្មោះ និងថ្ងៃខែផុតកំណត់ចោល ។
ទី៥- គ្លីនិក ឬមូលដ្ឋានសុខាភិបាលណាដែលមានអ្នកជំងឺសម្រាកព្យាបាល ត្រូវមានឯកសារអ្នកជំងឺត្រឹមត្រូវតាមក្បួនបច្ចេកទេស និងថែរក្សាឲ្យបានល្អ ត្រៀមលក្ខណៈជានិច្ច ធានាយកមកប្រើប្រាស់ជាផ្លូវការឡើងវិញបាន ។
លិខិតដាស់តឿនបានព្រមានថា ក្រសួងនឹងមានវិធានការត្រួតពិនិត្យ និងអនុវត្តវិន័យតាមច្បាប់ជាធរមាន ប្រសិនបើឃើញមានមន្ត្រីសុខាភិបាលណា ប្រព្រឹត្តល្មើសខ្ជីខ្ជារ បណ្តាលអោយមានផលវិបាកប៉ះពាល់ដល់អ្នកជម្ងឺ ។