អគ្គស្នងការដ្ឋាននគរបាលជាតិ បានធ្វើសន្និបាតបូកសរុបសភាពការណ៍ និងលទ្ធផលការងារប្រចាំឆ្នាំរបស់ខ្លួន នៅថ្ងៃទី១៦ ខែមីនានេះ ដោយបានពិនិត្យស្ថានការណ៍សន្តិសុខពេញមួយឆ្នាំ ដែលបានកើតឡើងកន្លងមកនេះ ។ សេចក្តីរាយការណ៍ក្នុងសន្និបាត ត្រូវគេឃើញបានលើកសភាពការណ៍សន្តិសុខគ្រប់បែបយ៉ាង រួមទាំងការកត់សម្គាល់ភាពកើនឡើងនៃករណីប្លន់ប្រដាប់អាវុធ បញ្ហាចរាចរគ្រឿងញៀនជាដើម ។
សន្និបាតបូកសរុបសភាពការណ៍ និងលទ្ធផលប្រតិបត្តិរក្សាសន្តិសុខសណ្ដាប់ធ្នាប់សង្គមឆ្នាំ ២០១៥ និងផ្សព្វផ្សាយទិសដៅអនុវត្តបន្តឆ្នាំ ២០១៦ បានធ្វើឡើងក្រោមអធិបតីអគ្គស្នងការនគរបាលជាតិ ឯកឧត្តមនាយឧត្តមសេនីយ៍ នេត សាវឿន… ដោយមានការចូលរួមពី នាយឧត្តមសេនីយ៍ សុខ ផល អគ្គនាយកអន្តោប្រវេសន៍… នាយឧត្តមសេនីយ៍ ម៉ៅ ច័ន្ទតារា អគ្គនាយក អត្តសញ្ញាកម្ម… តំណាងស្នងការដ្ឋានរាជធានីខេត្តទាំង២៥ និងមន្រ្តីនគរបាលនានា ជាច្រើនរយនាក់។
របាយការណ៍អគ្គស្នងការដ្ឋាននគរបាលជាតិបានបង្ហាញថា ក្នុងឆ្នាំ ២០១៥ មានបទល្មើសសរុប ២ពាន់ ៧រយ ៩លើក ថយចុះ៤% ក្នុងនោះបទឧក្រិដ្ឋ ៧៥១លើក កើន៥% និងបទមជ្ឈឹម ១ពាន់ ៩រយ ៥៨លើក ថយចុះ៧% ។ របាយការណ៍បញ្ជាក់ថា សកម្មភាពលួចមានស្ថានទម្ងន់ទោសមានការកើនឡើង ក្នុងនោះ ការប្លន់ប្រដាប់អាវុធជាក្រុម ដែលមានគ្នាពី ៣នាក់ ទៅ ៥នាក់ មានអាវុធច្រើនដើម បានប្លន់តាមផ្ទះ កន្លែងប្តូរប្រាក់ ផ្ទេរលុយ និងលក់មាស តាមបណ្តាខេត្តមួយចំនួន ។
របាយការណ៍ដដែលបានបង្ហាញថា សភាពការណ៍នៃការចរាចរគ្រឿងញៀននៅកម្ពុជាក្នុងឆ្នាំ ២០១៥ នៅតែជាបញ្ហាប្រឈមដែលបាននិងកំពុងជះឥទ្ធិពលអវិជ្ជមានដក់សន្តិសុខ សណ្តាប់ធ្នាប់សាធារណៈ និងសុវត្ថិភាពភាពសង្គម ព្រមទាំងបានបង្កឲ្យប្រជាពលរដ្ឋមានការព្រួយបារម្ភ ។ ក្នុងឆ្នាំ ២០១៥ គេបានបង្រ្កាបករណីគ្រឿងញៀនបាន ២ពាន់ ៣រយ ៥៦ករណី ឃាត់ខ្លួនបាន ៥ពាន់ ៣៦នាក់ ក្នុងនោះមានជនបរទេស ១២៧នាក់ ។ សេចក្តីរាយការណ៍សន្និបាត បានលើកករណីលេចធ្លោ ២ធំៗ ក្នុងខែសីហា ដែលគេបានដកហូតវត្ថុតាងគ្រឿងញៀនជិត ៥៥គីឡូក្រាម និងករណីបង្រ្កាបការនាំកញ្ឆាស្ងួតពីប្រទេសឡាវ ទម្ងន់ជាង ១ពាន់ ៤រយ គីឡូក្រាម ។
