សម្តេចតេជោនាយករដ្ឋមន្រ្តី ហ៊ុន សែន នឹងអញ្ជើញបំពេញទស្សនកិច្ចក្នុងប្រទេសចិនរយៈពេល ៣ថ្ងៃ ក្នុងសប្តាហ៍ក្រោយនេះ ។ សេចក្តីរាយការណ៍ពីក្រសួងការបរទេសកម្ពុជាបានឱ្យដឹងថា សម្តេចនិងគណៈប្រតិភូ នឹងអញ្ជើញចូលរួមកិច្ចប្រជុំកំពូលមេគង្គ-ឡានឆាង លើកទី១… និងសន្និសីទប្រចាំឆ្នាំ ២០១៦ នៃវេទិកាបូអាវ សំរាប់អាស៊ី រវាងពីថ្ងៃទី២២ ដល់ ២៤ ខែមីនា ។ រដ្ឋមន្ត្រីក្រសួងការបរទេសកម្ពុជា និងសមាជិករាជរដ្ឋាភិបាលកម្ពុជាដទៃទៀត នឹងអញ្ជើញអមដំណើរសម្តេចក្នុងការបំពេញទស្សនកិច្ច តបតាមការអញ្ជើញរបស់នាយករដ្ឋមន្រ្តីចិន ឯកឧត្តម លី ខឺជាង (Li Keqiang) ។
ក្នុងកិច្ចប្រជុំកំពូលមេគង្គ-ឡានឆាង សម្តេចតេជោសែន នឹងថ្លែងសុន្ទរកថាក្រោមមូលបទ «ការចែករំលែកទន្លេ-ការចែករំលែកអនាគត» ។ ឡាន-ឆាង គឺជាផ្នែកទន្លេមួយរបស់មេគង្គ ដែលបានហូរពីប្រទេសចិនក្នុងខេត្តយូណាន ឆ្លងកាត់ប្រទេសថៃ កម្ពុជា ឡាវ មីយ៉ាន់ម៉ា និងវៀតណាម ។ ប្រទេសទាំង៦ នៃទន្លេមេគង្គ គ្រោងចុះហត្ថលេខាអនុម័តឯកសារចំនួន៣ ទាក់ទងនឹងកិច្ចប្រជុំកំពូល មេគង្គ-ឡានឆាង លើកទី១ នោះ ។
នៅថ្ងៃទី២៤ ខែមីនា សម្តេចតេជោសែន នឹងចូលរួមក្នុងវេទិកាបូអាវ សំរាប់អាស៊ី ។ វេទិកាបូអាវ សំរាប់អាស៊ី គឺជាវេទិកាសំខាន់បំផុតសំរាប់ទ្វីបអាស៊ី ដោយសារការដើរតួយ៉ាងសកម្មក្នុងការសន្ទនាសំរាប់វិស័យសាធារណ:… ឯកជន… និងបណ្ឌិតសភា ដើម្បីពិភាក្សា និងផ្លាស់ប្តូរទស្សន:ក្នុងការដោះស្រាយបញ្ហាសេដ្ឋកិច្ចសង្គម បរិស្ថាន និងបញ្ហាបន្ទាន់ផ្សេងៗទៀត ។ សម្តេចគ្រោងនឹងថ្លែងសុន្ទរកថាមួយ ក្រោមមូលបទ «អនាគតថ្មីរបស់អាស៊ី៖ កម្លាំងចលករថ្មី និងចក្ខុវិស័យថ្មី»។ ក្រៅពីនេះ សម្តេចតេជោសែន នឹងជួបពិភាក្សាទ្វេភាគីជាមួយនាយករដ្ឋមន្រ្តីចិន ឯកឧត្តម លី ខឺឈាង និងឧបនាយករដ្ឋមន្ត្រីសហព័ន្ធរុស្ស៊ី ឯកឧត្តម អារកាឌី ដ្វូរកូវីច (Arkady Dvorkovich) ។
