អង្គការសហប្រជាជាតិ បានចេញសេចក្តីជូនដំណឹងមួយ ដើម្បីស្វែងរកយុវជនមានសមត្ថភាព តាមបណ្តាប្រទេសជាសមាជិក ដើម្បីធ្វើការនៅអគ្គលេខាធិការដ្ឋានអង្គការសហប្រជាជាតិ ក្នុងបុរីញូយ៉ក ។ ការជ្រើសរើសនេះ បានធ្វើតាមការប្រឡង «កម្មវិធីវិជ្ជាជីវៈវ័យក្មេង» ២០១៦ ដែលប្រព្រឹត្តទៅនៅថ្ងៃទី១៤ ខែធ្នូ ឆ្នាំ ២០១៦ ។
ចំពោះមុខជំនាញដែលត្រូវជ្រើសរើស និងព័ត៌មានលំអិតអំពីមណ្ឌលប្រឡង… អង្គការសហប្រជាជាតិនឹងប្រកាសផ្សាយនៅដើមខែមេសា ឆ្នាំ ២០១៦ ក្នុងគេហទំព័រ career.un.org/ypp ។ ក្រសួងការបរទេសកម្ពុជាបានឱ្យដឹងថា រាជរដ្ឋាភិបាលកម្ពុជានឹងអាចជួយចាត់ចែករៀបចំ ឱ្យមានមណ្ឌលប្រឡងនៅកម្ពុជា យោងតាមសំណើររបស់អង្គការសហប្រជាជាតិ ។ ក្រសួងការបរទេសកម្ពុជាបានបន្តថា ក្នុងករណីបេក្ខជនកម្ពុជាលើសពី១៥នាក់ ដែលត្រូវបានជ្រើសរើសឱ្យចូលរួមប្រឡង ហើយមានបំណងចង់ប្រឡងវិញ្ញាសារសរសេរនៅកម្ពុជានោះ រដ្ឋាភិបាលនឹងរៀបចំឱ្យមានមណ្ឌលប្រឡងនៅកម្ពុជា តាមសំណើររបស់អង្គការ សហប្រជាជាតិ ដើម្បីសំរួលដល់ការប្រឡងរបស់បេក្ខជននិងបេក្ខនារីកម្ពុជា។
«កម្មវិធីវិជ្ជាជីវៈវ័យក្មេង» ត្រូវបានអនុម័តក្នុងសម័យប្រជុំលើកទី៦៥ ឆ្នាំ២០១០ របស់អង្គការសហប្រជាជាតិ ដែលមានគោលដៅកែលំអ «តំណាងតាមភូមិសាស្ត្រ» របស់បណ្តាប្រទេសសមាជិកនៅក្នុងលេខាធិការដ្ឋាន។
គួរកត់សម្គាល់ថា បច្ចុប្បន្នមានពលរដ្ឋកម្ពុជា ៤នាក់ ក្នុងនោះមានប្រុស២នាក់ និងស្រី២នាក់ដែលកំពុងធ្វើការងារនៅក្នុងលេខាធិការដ្ឋាន អ.ស.ប នៅបុរីញូវយ៉កសហរដ្ឋអាមេរិកនោះ។