ផ្លូវជាតិលេខ២១ លាតសន្ធឹងពីក្រុងតាខ្មៅបន្តទៅព្រំដែនជ្រៃធំ ជាប់ប្រទេសវៀតណាម បានបើកការដ្ឋានជួសជុល សាងសង់ និងពង្រីកថែមទៀត នៅព្រឹកថ្ងៃទី២៨ ខែមីនា ក្រោមអធីបតីភាព សម្តេចនាយករដ្ឋមន្ត្រី ហ៊ុន សែន ។
ផ្លូវជាតិលេខ២១ ប្រវែង ៦៣គីឡូម៉ែត្រ គ្រោងនឹងបញ្ចប់នៅក្នុងខែតុលា ឆ្នាំ ២០១៧ ខាងមុខនេះ ក្រោមការចំណាយប្រាក់ ៦១លាន ៦សែន ដុល្លារអាមេរិក ។ រដ្ឋមន្ត្រី្កក្រសួងសាធារណការ និងដឹកជញ្ជូន ឯកឧត្តម ត្រាំ អ៊ីវតឹក បានថ្លែងថា គំរោងចំណាយថវិកាកសាងជួសជុលផ្លូវជាតិលេខ ២១នេះ គឺកម្ចីឥណទានកូរ៉េខាងត្បូង តម្លៃ ៥២,៥៤លានដុល្លារ បូករួមនឹងថវិកាបដិភាគរបស់រាជរដ្ឋាភិបាលកម្ពុជាចំនួន ៩,០៦លានដុល្លារ ។ គម្រោងនេះត្រួតពិនិត្យដោយ ទីប្រឹក្សាបច្ចេកទេសក្រុមហ៊ុនអន្តរជាតិកូរ៉េ DASAN Consultants Co. Ltd. និងសាងសង់ដោយក្រុមហ៊ុនកូរ៉េ Hanshine E&C C0, Ltd.។
ផ្លូវជាតិលេខ២១ គឺជាផ្លូវជាតិមួយដែលមានចម្ងាយជិតជាងគេ ក្នុងដំណើរពីភ្នំពេញទៅប្រទេសវៀតណាម ។ ផ្លូវនេះកន្លងមកមានលក្ខណៈតូចចង្អៀត មានទទឹងប្រវែងតែ ៧ម៉ែត្រ ប៉ុណ្ណោះ ជាហេតុនាំឱ្យមានការលំបាកក្នុងការធ្វើចរាចរណ៍ ក្នុងស្ថានភាពដែលកម្ពុជាកំពុងវិវត្តន៍ក្នុងរបត់អាស៊ាន ដែលតម្រូវឱ្យមានការធ្វើគមនាគមន៍ត ភ្ជាប់រវាងប្រទេសទាំង១០ នៅអាស៊ាន ។
សេចក្តីរាយការណ៍បានឱ្យដឹងថា ជាមួយនឹងការកសាងផ្លូវជាតិលេខ២១ នេះផងដែរ រាជរដ្ឋាភិបាលកម្ពុជា កំពុងពិនិត្យការបំពេញសំណង់អភិវឌ្ឍន៍ជាច្រើនទៀត ដូចជាស្ពានជ្រៃធំប្រវែង ៤២៧ម៉ែត្រ ក្នុងស្រុកកោះធំខេត្តកណ្តាល ដែលជាហិរញ្ញប្បទានរបស់ប្រទេសចិន… ផ្លូវតភ្ជាប់ប្រវែងជិត ៣គីឡូម៉ែត្រ ដែលកំពុងសាងសង់ដោយហិរញ្ញប្បទានពីរដ្ឋាភិបាលប្រទេសវៀតណាម ដែលសំណង់ការដ្ឋានទាំងនេះ ក៏គ្រោងនឹងបញ្ចប់នៅក្នុងចុងឆ្នាំ ២០១៧ ខាងមុខនេះផងដែរ ។
