ក្រសួងបរិស្ថានបានជូនដំណឹងស្ថានភាពទឹកសមុទ្ទនៃក្រុងកែប ក្រោយការស្នើផ្អាកការងូតទឹកបណ្តោះអាសន្ន នៅទីនោះ ។ សេចក្តីប្រកាសព័ត៌មានក្រសួងបរិស្ថានបានបញ្ជាក់ថា ក្រោយការវិភាគសំណាកទឹកជាបន្តបន្ទាប់ «លទ្ធផលបានបង្ហាញថា គុណភាពទឹកនៅតាមតំបន់ដែលទទួលរងគ្រោះ មិនមានឃើញវត្តមានសារធាតុគ្រោះថ្នាក់ដែលអាចបង្កហានីភ័យធ្ងន់ធ្ងរដល់មនុស្ស និងបរិស្ថានទឹកទេ ។»
គួររំលឹកថា ទឹកសមុទ្រនៃក្រុងកែបកាលពីច្រើនថ្ងៃមកនេះ បានឡើងពណ៌បៃតង និងត្រូវគេរកឃើញថាមានកំរិតស្លែនាំជាតិពុលបណ្ដាលឲ្យទឹកល្អក់ និងធ្វើអោយសត្វក្នុងទឹកសមុទ្ទងាប់ថែមទៀត ។ ក្រសួងបរិស្ថានកាលពីថ្ងៃទី២ ខែមេសា បានធ្វើសេចក្តីជូនដំណឹងមួយហាមឃាត់មិនអោយចុះងូតទឹក និងបិរភោគគ្រឿងសមុទ្ទដែលនេសាទក្នុងតំបន់សង្ស័យរងជាតិពុលនោះឡើយ ។
ក្រោយមកនៅថ្ងៃទី៤ ខែមេសា ក្រសួងបរិស្ថានបានបញ្ជាក់សាឡើងវិញថា ក្រោយការវិភាគបឋម លទ្ធផលបានបង្ហាញថា ការកើនឡើងនូវកម្រិតស្លែនៅក្នុងទឹកសមុទ្រ គឺបណ្ដាលមកពីការកើនឡើងនូវសីតុណ្ហភាព ពន្លឺ និងការប្រែប្រួលជីវជាតិចិញ្ចឹមនៅក្នុងទឹកសមុទ្រ ។ នៅក្នុងសេចក្តីប្រកាសកាលពីថ្ងៃទី២ ខែមេសា ដដែលនោះ ក្រសួងបរិស្ថានបានបញ្ជាក់ថា កម្រិតស្លែ ដែលនាំអោយទឹកល្អក់ប្រែពណ៌ បានបាត់ទៅវិញស្ទើរតែទាំងស្រុងទៅហើយ… ប៉ុន្តែក្រសួងបានបន្តអំពាវនាវដល់ប្រជាពលរដ្ឋនៅខេត្តកែប និងភ្ញៀវទេសចរណ៍ គួរបន្តការផ្អាកចុះមុជទឹកសមុទ្រកំសាន្ត រហូតដល់ចុងសប្ដាហ៍នេះទៀត ។
នៅក្នុងសេចក្តីប្រកាសថ្ងៃទី៨ ខែមេសានេះ ជាមួយនឹងការបញ្ជាក់ថា ទឹកគ្មានសារធាតុគ្រោះថ្នាក់ ក្រសួងបានវិភាគថា មូលហេតុដែលបង្កអោយទឹកសមុទ្ទប្រែពណ៌បៃតងខ្ចីនៅទីនោះ គឺបណ្តាលមកពីវត្តមានប្លង់តុងមួយប្រភេទ ដែលបានកកើតឡើងក្នុងតំបន់ទឹកសមុទ្ទណាដែលរាក់ ជាពិសេសតំបន់នៅជិតព្រំប្រទល់ដែនទឹកកម្ពុជា និងវៀតណាម ។ ក្រសួងបរិស្ថានបានថ្លែងថា ស្ថានភាពបែបនេះអាចបន្តកើតមានឡើងសាជាថ្មី ប្រសិនបើសីតុណ្ហភាពទឹកសមុទ្ទបន្តកើនលើសពី ៣២អង្សាសេ ។