នៅថ្ងៃទី១៧ ខែវិច្ឆិកា ឆ្នាំ២០១៧ ឯកឧត្តមទេសរដ្ឋមន្ត្រី ស៊ុន ចាន់ថុល បានដឹកនាំគណៈប្រតិភូកម្ពុជា មកពីក្រសួងសាធារណការនិងដឹកជញ្ជូន អញ្ជើញអញ្ជើញធ្វើទស្សនកិច្ចនៅក្រុមហ៊ុន Sakai Heavy Industries Ltd និង ចូលជួបសម្តែងការគួរសមជាមួយឯកឧត្តម Nishimura អនុរដ្ឋមន្រ្តីទីស្តីការនាយករដ្ឋមន្ត្រី។
ក្នុងនាមគណៈប្រតិភូ ឯកឧត្តមទេសរដ្ឋមន្ត្រី បានសម្តែងនូវការកោតសរសើរ និងថ្លែង អំណរគុណយ៉ាងជ្រាលជ្រៅដល់ក្រុមហ៊ុន Sakai Heavy Industries ដែលបានចំណាយពេល វេលាដ៏មានតម្លៃធ្វើបទបង្ហាញអំពីក្រុមហ៊ុននេះដល់ក្រុមការងាររបស់ឯកឧត្តម។ ឯកឧត្តមទេសរដ្ឋមន្រ្តីបានជំរុញឱ្យក្រុមហ៊ុនពិចារណាពង្រីកអាជីវកម្ម និងការវិនិយោគរបស់ខ្លួននៅកម្ពុជា។
រីឯកក្នុងជំនួបសម្តែងការគួរសម ទៅកាន់ ឯកឧត្តម Nishimura អនុរដ្ឋមន្ត្រីទីស្តីការនាយករដ្ឋមន្ត្រីជប៉ុន ឯកឧត្តមទេសរដ្ឋមន្រ្តី បានសម្តែងនូវការដឹងគុណ និងការកោតសរសើរចំពោះរដ្ឋាភិបាលជប៉ុន ដែលបានផ្តល់ជំនួយសប្បុរស និងការគាំទ្រដល់ការអភិវឌ្ឍហេដ្ឋារចនាសម្ព័ន្ធភស្តុភារកម្ម នៅកម្ពុជា។ ឯកឧត្តមទេសរដ្ឋមន្រ្តីបានគូសបញ្ជាក់ដោយសង្ខេបអំពីការវិវឌ្ឍថ្មីៗ ទាក់ទងនឹងគម្រោងជា ច្រើនរួមមាន៖ គម្រោងស្ពានត្សឹបាសា គម្រោងផ្លូវជាតិលេខ៥ គម្រោងកំពង់ផែក្រុងព្រះសីហនុ គម្រោងប្រព័ន្ធរថភ្លើងប្រតិបត្តិការស្វ័យប្រវត្តិ (AGT) រោងចក្រប្រព្រឹត្តកម្មទឹកស្អាត កំពង់ផែប្រើប្រព័ន្ធ EDI និងគម្រោងប្លង់មេភស្តុភារកម្មជាដើម។
ឯកឧត្តម Nishimura បានសន្យាបន្តគាំទ្រកម្ពុជាក្នុងវិស័យហេដ្ឋារចនាសម្ព័ន្ធ និងការកសាងសមត្ថភាព។ ឯកឧត្តមក៏បានសង្កត់ធ្ងន់អំពីសារៈសំខាន់នៃការអភិវឌ្ឍហេដ្ឋារចនាសម្ព័ន្ធដែលមានគុណភាពខ្ពស់សម្រាប់គម្រោងនាពេលអនាគត។
