សម្តេចតេជោនាយករដ្ឋមន្រ្តី ហ៊ុន សែន បានផ្ញើសារចូលរួមរំលែកទុក្ខប្រធានាធិបតីអេក្វាឌ័រ ដែលកំពុងរងគ្រោះរញ្ជួយផែនដី ។
សូមជំរាបថា គ្រោះរញ្ជួយផែនដីកម្រិត ៧.៨លើជញ្ជីងរីច្ឆទ័រ កាលពីថ្ងៃទី១៦ ខែមេសា បណ្តាលឱ្យប្រទេសអេក្វាឌ័រ ស្ថិតក្នុងតំបន់អាមេរិកខាងត្បូង បានស្លាប់និងរងរបួសមនុស្សច្រើនពាន់នាក់ ។ សេចក្តីរាយការណ៍ បានឱ្យដឹងថា មនុស្សដែលបានបាត់បង់ជីវិតមានចំនួន ៥០៧នាក់… អ្នករងរបួស ៤ពាន់ ២៧នាក់ គ្រាដែលមនុស្សបាត់ខ្លួនមានចំនួនជិត ២ពាន់នាក់ ។
សម្តេចតេជោសែន ក្នុងលិខិតចុះថ្ងៃទី១៩ ខែមេសា ឆ្នាំ ២០១៦ ជូនប្រធានាធិបតីអេក្វាឌ័រ ឯកឧត្តម រ៉ាហ្វាអែល កូរ៉េអាដែលកាដូ បានថ្លែងថា ក្នុងនាមរាជរដ្ឋាភិបាល និងប្រជាជនកម្ពុជា និងក្នុងនាមសម្តេចផ្ទាល់ សូមសម្តែងនូវសមានចិត្តយ៉ាងជ្រាលជ្រៅ និងសូមចូលរួមរំលែកទុក្ខយ៉ាងក្រៀមក្រំ ជូនចំពោះឯកឧត្តមប្រធានាធិបតី និងប្រជាជនអេក្វាឌ័រ ជាពិសេសជនរងគ្រោះ និងសមាជិកគ្រួសារអ្នកស្លាប់ ចំពោះការបាត់បង់ដ៏សោកសង្រេងនិងសេចក្តីឈឺចាប់ដ៏ធំធេង ដែលបង្កឡើងដោយគ្រោះមហន្តរាយធម្មជាតិនេះ ។
អេក្វាឌ័រដែលមានទំហំផ្ទៃដី ២៧៦ពាន់ ៨៤១គីឡូម៉ែត្រក្រឡា គឺជាប្រទេសមួយដែលមានប្រជាជនរស់នៅសរុបជាង ១៥លាននាក់ ក្នុងតំបន់អាមេរិកខាងត្បូង ។