ក្រសួងបរិស្ថានបានអោយដឹងថា តំបន់ព្រៃធំៗចំនួន៥ ដែលមានទំហំជាង ៩៥ម៉ឺនហិកតា នឹងត្រៀមដាក់បញ្ចូលជាតំបន់ការពារធម្មជាតិនាពេល ខាងមុខនេះបន្ទាប់ពីសិក្ខាសាលាពិគ្រោះយោបល់មួយ ដែលនឹងធ្វើនៅសប្តាហ៍ក្រោយ ។ ព្រៃធំៗទាំង៥ ដែលគ្រោងនឹងដាក់ចូលជាតំបន់ការពារធម្មជាតិរួមមានៈ ព្រៃឡង់… ព្រៃក្រវ៉ាញខាងត្បូង… ព្រៃព្រះរកា… ព្រៃសៀមប៉ាងខាងលិច និងព្រៃវ៉ឺនសៃ ។
សិក្ខាសាលាដើម្បីដាក់តំបន់ព្រៃធំៗទាំង៥ ជាតំបន់រក្សាការពារ នឹងត្រូវធ្វើនៅថ្ងៃទី២៥ ខែមេសា ខាងមុខនេះ តាមរយៈការរៀបចំរួមគ្នាដោយក្រសួងបរិស្ថាន និងក្រសួងកសិកម្ម ។ ការសម្រេចដាក់តំបន់ព្រៃទាំង៥ នេះ ជាកន្លែងអភិរក្ស ដោយសារតែក្រសួង សម្លឹងឃើញសក្តានុពល និងគុណតម្លៃនៃប្រព័ន្ធអេកូឡូស៊ី ដែលអាចផ្តល់អំណោយផលល្អសម្រាប់វិស័យសេដ្ឋកិច្ច សង្គម វប្បធម៌ និងបរិស្ថាន ។ សហរដ្ឋអាមេរិកត្រូវគេឃើញ បានប្រកាសជំហរគាំទ្រការដាក់តំបន់ព្រៃកម្ពុជា ជាតំបន់អភិរក្សការពារផងដែរ ។
កាលពីសប្តាហ៍មុនរដ្ឋមន្ត្រីក្រសួងបរិស្ថាន ឯកឧត្តម សាយ សំអាល់ និងឯកអគ្គរដ្ឋទូតអាមេរិក លោក វីលៀម ហេតថ៍ បានជិះឧទ្ធម្ភាចក្ររួមគ្នា ពិនិត្យស្ថានភាពព្រៃដែលបំរុងដាក់ជាព្រៃរក្សាការពារ ជាពិសេសព្រៃឡង់ដែលមានទំហំជាង ៣០ម៉ឹនហិកតា ។
