ស្ថានីយ៍ប្រព័ន្ធខ្សែជាតិបញ្ជូនថាមពលអគ្គសនីតង់ស្យុងខ្ពស់ តម្លៃជាង ៨០លានដុល្លារអាមេរិក ត្រូវបានដាក់សម្ភោធឲ្យដំណើរការជាផ្លូវការនៅថ្ងៃនេះហើយ ។
ប្រព័ន្ធបញ្ជូនខ្សែជាតិនេះ ត្រូវគេបញ្ជាក់ថា នឹងធានាឲ្យប្រជាជនរាប់លាននាក់ក្នុងរាជធានីភ្នំពេញ ខេត្តកណ្តាល និងកំពង់ស្ពឺ មានអគ្គិសនីប្រើប្រាស់គ្រប់គ្រាន់ ។ ពិធីសម្ភោធឲ្យដំណើរការជាផ្លូវការនូវប្រព័ន្ធខ្សែជាតិបញ្ជូនថាមពលអគ្គសនី ជាកងតង់ស្យុងខ្ពស់ ២៣០គីឡូវ៉ុល និង ១១៥គីឡូវ៉ុល បានធ្វើឡើងនៅខេត្តកណ្តាល ក្រោមអធិបតីរដ្ឋមន្រ្តីក្រសួងរ៉ែ និងថាមពល ឯកឧត្តម ស៊ុយ សែម ។ ពិធីនេះ ក៏មានការចូលរួមពីឯកអគ្គរដ្ឋទូតចិនប្រចាំកម្ពុជា លោកជំទាវ Bu Jianguo… អគ្គនាយកអគ្គសនីកម្ពុជា… មន្រ្តីពាក់ព័ន្ធ… សិស្ស និស្សិត ប្រជាពលរដ្ឋ ជាច្រើនរយនាក់ ។
ប្រតិភូរាជរដ្ឋាភិបាលកម្ពុជា ទទួលបន្ទុកអគ្គិសនីកម្ពុជា ឯកឧត្តម កែវ រតនៈ បានមានប្រសាសន៍ថា គម្រោងខ្សែបញ្ជូនតង់ស្យុងខ្ពស់ជាកងនេះ បានទទួលឥណទានសម្បទានពីរដ្ឋាភិបាលចិន ចំនួន ៧៥លាន ៨សែន ៧ម៉ឺនដុល្លារអាមេរិក និងថវិការបដិភាគរបស់រាជរដ្ឋាភិបាលកម្ពុជា ៤លាន ១ម៉ឺនដុល្លារអាមេរិក ។ ហើយអគ្គសនីកម្ពុជាក៏បានចំណាយថវិកាប្រមាណ ៣លាន ៥សែនដុល្លារអាមេរិក ដើម្បីដោះស្រាយផលប៉ះពាល់ និងការងារបោសសំអាតមីន និងយុទ្ធភ័ណ្ឌមិនទាន់ផ្ទុះផងដែ រ។
ឯកឧត្តម កែវ រតនៈ បន្តថា សំណង់នេះ ជាហេដ្ឋារចនាសម្ព័ន្ធថ្មីរបស់ជាតិ ក្នុងការពង្រឹងវិសាលភាពបញ្ជូនថាមពល ពីប្រព័ន្ធបណ្តាញបញ្ជូនជាតិ ចូលមករាជធានីភ្នំពេញ រហូតដល់ ៧៥០មេហ្គាវ៉ាត់ ដែលកាលពីមុនបញ្ជូនបានត្រឹមតែ ២៥០មេហ្គាវ៉ាត់ តែប៉ុណ្ណោះ ។ លោកបានបន្តថា ហើយសំណង់ថ្មីនេះ ក៏បានជួយបង្កើនគុណភាព ស្ថិរភាពប្រសិទ្ធភាព និងនិរន្តភាពក្នុងការផ្គត់ផ្គង់ថាមពលអគ្គិសនីជូនប្រជាពលរដ្ឋរាប់លាននាក់ ក្នុងរាជធានីភ្នំពេញ ក៏ដូចជាខេត្តកណ្តាល និងកំពង់ស្ពឺផងនោះដែរ ។
