សម្តេចតេជោ ហ៊ុន សែន អញ្ជើញជួបរដ្ឋមន្ត្រីក្រសួងនគរបាលវៀតណាម


នៅរសៀល ថ្ងៃអាទិត្យ ១២កើត ខែមាឃ ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី២៨ ខែមករា ឆ្នាំ២០១៨នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា បានអញ្ជើញជួបពិភាក្សាការងារជាមួយ លោក តូ ឡាំ(TO LAM) រដ្ឋមន្ត្រីក្រសួងនគរបាលវៀតណាម នៅវិមានសន្តិភាព រាជធានីភ្នំពេញ។

លោក TO LAM បានជំរាបជូនសម្តេចតេជោ អំពីស្ថានភាពប្រទេសវៀតណាមដែលទទួលបានជោគជ័យ លើការគ្រប់គ្រងសេដ្ឋកិច្ច និងសង្គម សុវត្ថិភាពសាធារណៈ ហើយចំពោះទំនកា់ទំនងការទូត ក៏ទទួល ជោគជ័យផងដែរ កាលពី ឆ្នាំ២០១៧កន្លងទៅនេះ។ ចំពោះដំណើរទស្សនកិច្ចមកកម្ពុជាពេលនេះ គឺដើម្បីជួបប្រជុំការងារជាមួយ សម្តេចក្រឡាហោម ស ខេង ឧបនាយករដ្ឋមន្ត្រី និងជា រដ្ឋមន្ត្រីក្រសួងមហាផ្ទៃកម្ពុជា ដើម្បីពង្រឹងនិងពង្រីកនូវកិច្ចសហប្រតិបត្តិការរវាងក្រសួងទាំងពីរ ហើយនឹងលើកទិសដៅសម្រាប់ការអនុវត្តរួមគ្នានៅឆ្នាំ២០១៨ នេះផងដែរ។

ចំពោះកិច្ចសហប្រតិបត្តិការរវាងក្រសួងទំាង២ដែលបានសម្រេចនិងកំណត់ក្នុងឆ្នាំកន្លងមក គឺទទួលបាន។ មិនត្រឹមតែប៉ុណ្ណោះ ទំនាក់ទំនង រវាងក្រសួងទាំងពីរបានខិតខំពង្រឹងទប់ស្កាត់នូវឧក្រិដ្ឋកម្ម នៅតាមព្រំដែន ឧក្រិដ្ឋកម្មឆ្លងដែន និងបានជំរុញកិច្ចសហប្រតិបត្តិការនៅតាមព្រំដែនរឹងមាំថែមទៀត ដែលធ្វើឱ្យប្រជាជននៅតាមព្រំដែនរស់នៅមានសុវត្ថិភាព គ្មានការភិតភ័យ និងប្រកបរបរអាជីវកម្មតូចធំងាយស្រួល ជាមួយនឹងទំនាក់ទំនងគ្នាយ៉ាងល្អប្រសើរ។
សម្តេចតេជោ ហ៊ុន សែន បានវាយតម្លៃខ្ពស់ចំពោះកិច្ចសហប្រតិបត្តិការរវាងក្រសួង នគរបាលវៀតណាម និង ក្រសួងមហាផ្ទៃកម្ពុជាដែលបានខិតខំធ្វើការជាមួយគ្នាយ៉ាងល្អប្រសើរ ជាពិសេសការទំនាក់ទំនង សហការជាមួយគ្នាបានល្អ ដោយមានការយោគយល់គ្នាខ្ពស់រវាងខេត្តនឹងខេត្តនៅជាប់ព្រំដែនរវាងប្រទេសទាំងពីរ។
សម្តេចតេជោ ហ៊ុន សែន នាយករដ្ឋមន្ត្រី ក៏បានផ្តល់អនុសាសន៍បន្ថែមឱ្យក្រសួងទាំងពីរ គឺក្រសួងមហាផ្ទៃកម្ពុជា និងក្រសួងនគរបាលវៀតណាម បន្តសហការគ្នា ជាពិសេស លោក TO LAM និង សម្តេចក្រឡា ហោម ស ខេង បន្តធ្វើការរួមគ្នាដើម្បីពង្រឹងការងារសន្តិសុខសុវត្ថិភាពរវាងប្រទេសទាំងពីរអោយកាន់តែល្អប្រសើរឡើង៕