ឯកឧត្តម ម៉ៅ ធនិន អភិបាលនៃគណៈអភិបាលខេត្តពោធិ៍សាត់ បានប្រកាសដាក់ឱសានវាទ ឲ្យអាជីវករ ក៏ដូចជាអ្នកលក់ដូរក្នុងផ្សារ និងទីប្រជុំជនជុំវិញផ្សារថ្មីពោធិ៍សាត់ ក្រោយនៃពិធីបុណ្យចូលឆ្នាំប្រពៃណីជាតិ ចិន-វៀតណាម ត្រូវរម្កិលទំនិញដែលដាក់តាំងលក់ថយក្រោយ ទៅតាមការកំណត់របស់សន្តិសុខ និងសណ្តាប់ធ្នាប់ផ្សារ ដើម្បីឲ្យសាកសមជាខេត្ត ដែលទទួលបានជ័យលាភីទីក្រុងស្អាត ផ្ការំដួល២ទង ហើយនឹងឈានទៅរកផ្ការំដួល៣ទង នាពេលឆាប់ៗខាងមុខ។ ជាមួយគ្នានោះ ក្រុមសន្តិសុខផ្សារ ត្រូវធ្វើតេស្តទុយោទឹកពន្លត់អគ្គិភ័យជាប្រចាំ ជៀសវាងមានករណីប្រធានសក្តិណាមួយកើតឡើង បែរជាមិនដំណើរការ។
ឯកឧត្តមអភិបាលខេត្ត បានលើកឡើងក្នុងឱកាស ចុះសំណេះសំណាលសួរសុខទុក្ខ និងដោះស្រាយក្តីកង្វល់ ជូនអាជីវករផ្សារថ្មីពោធី៍សាត់ កាលពីថ្ងៃទី១០ ខែកុម្ភៈ ឆ្នាំ២០១៨។
