ភ្នំពេញ៖ អនុប្រធានទី២នៃរដ្ឋសភា បានអំពាវនាវអោយពលរដ្ឋនៅទូទាំងប្រទេសចូលរួមថែរក្សាសន្តិសុខ និងសន្តិភាពដើម្បីអភិវឌ្ឍន៍ប្រទេសកម្ពុជាអោយមានការរីកចម្រើន ខណៈដែលឯកឧត្តម ចូលរួមជាអធិបតីអធិបតីក្នុងពីធីបុណ្យពុទ្ធាភិសេកសម្ភោធដាក់ឲ្យប្រើប្រាស់នូវ សមិទ្ធផលនានាជានៅក្នុងវត្តបារាយណ៍ ឃុំបារាយណ៍ ស្រុកបារាយណ៍ខេត្តកំពង់ធំកាលពីចុងសប្តាហ៍កន្លងទៅនេះ។
ឯកឧត្តមបណ្ឌិត ងួន ញ៉ិល អនុប្រធានទី២ នៃរដ្ឋសភាបានអំពាវនាវអោយប្រជាពលរដ្ឋនៅទូទាំងប្រទេសចូលរួមថែរក្សាសន្តិសុខសន្តិភាពដែលជាមូលដ្ឋានគ្រឹះក្នុងការអភិវឌ្ឍន៍ប្រទេសជាតិអោយមានការរីកចម្រើនដោយមិនត្រូវជឿតាមការញុះញង់របស់ពួកអគ្គតិ និងជនជ្រុលនិយមទាំងឡាយដែលចូលចិត្តញុះញង់បំភ្លៃការពិតនិងតែងតែរារាំងដល់ការអភិវឌ្ឍរបស់ប្រទេសជាតិក្រោមការដឹកនាំដ៏ឈ្លាតវ៉ៃរបស់រាជរដ្ឋាភិបាលដែលកើតចេញពីគណៈបក្សប្រជាជននិងត្រូវចូលរួមថែរក្សាសមិទ្ធិផលទាំងឡាយអោយបានល្អប្រសើរនិងស្ថិតស្ថេគង់វង្សយូរអង្វែងសម្រាប់កូនចៅជំនាន់ក្រោយ។
ឯកឧត្ដមថ្លែងបន្តថា ការសម្ពោធដាក់អោយប្រើប្រាស់នូវសមិទ្ធិផលនានានៅពេលនេះ គឺមិនត្រឹមតែឆ្លុះបញ្ចាំងអោយឃើញអំពីវឌ្ឍនៈភាពជំនឿនិងការគោរពប្រណិប័តដ៍ជ្រាលជ្រៅចំពោះព្រះពុទ្ធសាសនាប៉ុណ្ណោះទេប៉ុន្តែថែមទាំងបង្ហាញអោយឃើញនូវស្មារតី សាមគ្គីភាព មិត្តភាពនិងការគាំទ្ររបស់បងប្អូនប្រជាជន ចំពោះកិច្ចខិតខំប្រឹងប្រែងរបស់រាជរដ្ឋាភិបាលក្នុងការគៀងគរ ធនធានមនុស្សតាមគ្រប់មធ្យោបាយដើម្បីរួមគ្នាអភិវឌ្ឍន៍ប្រទេសជាតិលើគ្រប់វិស័យទាំងផ្នែកពុទ្ធិចក្រនិងអាណាចក្រអោយមានភាពរុងរឿងរីកចម្រើនដូចសព្វថ្ងៃដោយសារប្រទេសកម្ពុជាមានសុខសន្តិភាព និងសុវត្ថិភាព អោយប្រជាពលរដ្ឋមានសេរីភាព ជំនឿសាសនា និងការអភិវឌ្ឍហេដ្ឋារចនាសម្ព័ន្ធនានានៅក្នុងទីអារាម និងទូទាំងប្រទេសកម្ពុជា។
លោក ហាក់ ម៉ុងហ៊ួត អភិបាលស្រុកបារាយណ៍បានថ្លែងថាក្នុងឆ្នាំ១៩៧៥ ប្រទេសកម្ពុជាបានធ្លាក់ចូលក្នុងភ្នក់នៃភ្លើងសង្គ្រាម សមិទ្ធផលនានាត្រូវបានខូចទាំងស្រុងក្នុងរបបប្រល័យពូជសាសន៍៣ឆ្នាំ៨ខែ២០ថ្ងៃ រួមទាំងសមិទ្ធផលទាំងឡាយក្នុងវត្តបារាយណ៍ក៍ដូចជាសមិទ្ធផលក្នុងវត្តដទៃទៀតដែរក៏ត្រូវបានបំភ្លេចបំផ្លាញស្ទើរទាំងស្រុងដល់ឫសគុលតែដោយសារប្រទេសកម្ពុជាទទួលបានជ័យជំនះថ្ងៃ៧មករា១៩៧៩ប្រជាជនទូទាំងប្រទេស មានសិទ្ធិសេរីភាពគ្រប់បែបយ៉ាងក្នុងការរស់នៅ ជំនឿសាសនាផ្សេងៗ សន្តិភាព សុវត្ថិភាព និងការអភិវឌ្ឍន៍ស្ទើរគ្រប់វិស័យនាពេលបច្ចុប្បន្ននេះ ក្រោមការដឹងនាំដោយប្រមុខរដ្ឋាភិបាល សម្តេចតេជោ ហ៊ុន សែន នាយរដ្ឋមន្ត្រីនៃប្រទេសកម្ពុជា ៕
