សៀមរាប ៖ក្នុងឱកាសអញ្ជើញមកចូលរួម កិច្ចប្រជុំកំពូលគណៈកម្មការទន្លេមេគង្គលើកទី៣ ដែលកម្ពុជាធ្វើជាម្ចាស់ផ្ទះ នៅខេត្តសៀមរាប សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និង នាយករដ្ឋមន្ត្រីថៃ ប្រាយុទ្ធ ចាន់អូចា បានឯកភាពគ្នា ប្ដេជ្ញារួមគ្នាធ្វើឱ្យកិច្ចប្រជុំគណៈកម្មការទន្លេមេគង្គសម្រេចបានជោគជ័យ។
ក្នុងជំនួបមុនបើកកិច្ចប្រជុំកំពូល គណៈកម្មការទន្លេមេគង្គលើកទី៣ នៅព្រឹកថ្ងៃទី៥ខែមេសានេះ ឯកឧត្តម ប្រាយុទ្ធ ចាន់អូចា (Prayut Chan-o-cha) បានសាទរចំពោះសម្តេចតេជោ ហ៊ុន សែន ក្នុងឱកាសខួបកំណើតរបស់សម្តេចកាលពីថ្ងៃទី០៤ ខែមេសា ម្សិលមិញ ហើយក៏បានជូនពរដល់សម្តេចតេជោ និងសម្តេចកិត្តិព្រឹទ្ធបណ្ឌិតនិងប្រជាពលរដ្ឋកម្ពុជាទាំងអស់ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរផងដែរ។
ឯកឧត្តម ប្រាយុទ្ធបានមានប្រសាសន៍ថា ឯកឧត្តម បានជួបសម្តេចតេជោ ជាញឹកញាប់ដែលនេះជាការឆ្លុះបញ្ចាំងពីកិច្ចសហប្រតិបត្តិការ និងទំនាក់ទំនងយ៉ាងជិត ស្និតរវាងថ្នាក់ដឹកនាំក៏ដូចជាឆ្លុះបញ្ចាំងទំនាក់ទំនងរវាងប្រទេសទាំងពីរឲ្យកាន់តែល្អផងដែរ។ ឯកឧត្តម នាយករដ្ឋមន្ត្រី ក៏បានមានប្រសាសន៍ថា កម្ពុជានឹងថៃកំពុងមានដំណើរការយ៉ាងល្អជាទីបំផុត ទោះយ៉ាងណាក៏ដោយប្រទេសទាំងពីរត្រូវបន្តកិច្ចសហប្រតិបត្តិការរវាងប្រទេសទាំងពីរឲ្យកាន់តែល្អប្រសើរ។
ឯកឧត្តម បានប្តេជ្ញាចិត្តថា នឹងធ្វើយ៉ាងណាឲ្យកិច្ចប្រជុំកំពូលគណៈកម្មការទន្លេមេគង្គលើកទី៣ នេះទទួលបាននូវជោគជ័យ សំដៅបម្រើផលប្រយោជន៍រួមរបស់ប្រទេសទាំងអស់នៅតាមដងទន្លេមេគង្គ ។
ជាការឆ្លើយតប សម្តេចតេជោនាយករដ្ឋមន្ត្រីកម្ពុជា បានថ្លែងអំណរគុណ ចំពោះឯកឧត្តម Prayut Chan-o-cha ដែលបានជូនពរក្នុងថ្ងៃខួបកំណើតរបស់សម្តេច ហើយសម្តេច ក៏បានជូនពរដល់ឯកឧត្តម ក៏ដូចប្រជាពលរដ្ឋថៃទាំងអស់ក្នុងឱកាសបុណ្យចូលឆ្នាំថ្មី របស់ប្រជាពលរដ្ឋថៃនៅពេលខាងមុខនេះផងដែរ។សម្តេចតេជោ ក៏បានយល់ស្របទៅនឹងអ្វីដែលឯកឧត្តមនាយករដ្ឋមន្ត្រីថៃបានលើកឡើងទាក់ទងនឹងកិច្ចប្រជុំកំពូលទន្លេមេគង្គ៕