សមាជិកគណបក្សសង្គ្រោះជាតិចំនួន ៧៥១នាក់ នៅក្នុងខេត្តឧត្តរមានជ័យ បានប្រកាសចូលរួមជាមួយនឹងគណបក្សប្រជាជនកម្ពុជា ក្រោយការផ្តាច់ខ្លួនច្រើនថ្ងៃកន្លងមកនេះ ។
នៅថ្ងៃទី២៩ធ្នូនេះ សមាជិកទាំង ៧៥១នាក់ ត្រូវគេឃើញបាននាំជិះគោយន្តដង្ហែរតាមថ្នល់ ដោយខ្លះមានការរាំសប្បាយផងដែរ ពេលនាំគ្នាចូលរួមក្នុងពិធីទទួល ស្គាល់ជាសមាជិកគណបក្សប្រជាជនកម្ពុជា ។ ក្រុមអ្នកផ្តាច់ខ្លួនចេញពីគណបក្សសង្គ្រោះជាតិ ត្រូវគេឃើញបាន ប្រកាសតាមឧគ្ឈោសនស័ព្ទថ្កោលទោសមេដឹកនាំគណបក្សសង្គ្រោះជាតិទាំង២ ថាជាមេដឹកនាំមិនដែលបានជួយអ្វីជូនប្រជាជន និងប្រទេសជាតិនោះទេ ក្រៅពីការញុះញង់អោយខ្មែរស្អប់គ្នា ដើម្បីការចង់ដណ្តើមអំណាច ។
ប្រធានគណបក្សសង្គ្រោះជាតិ លោក សម រង្ស៊ី វេលាចុងក្រោយនេះ បានរងការផ្តន្ទាទោសដាក់គុកចំនួន២ឆ្នាំផង… ការបង្គាប់របស់តុលាការដើម្បីចូលខ្លួនបំភ្លឺលើករណីមួយចំនួនទៀត ក្នុងនោះរួមមានការបង្ហោះឯកសារមិនពិតចោទថា កម្ពុជានិងវៀតណាមបានធ្វើកិច្ចចរចា ដើម្បីចុះហត្ថលេខាសម្រាប់រំលាយព្រំដែនជាតិនៃប្រទេសទាំង២… និងការបង្ហោះព័ត៌មានមិនពិតមួយទៀតចោទថា «របបកើតថ្ងៃ៧មករាឆ្នាំ១៩៧៩ បានកាត់ទោសប្រហារជីវិត សម្តេចព្រះ នរោត្តម សីហនុ និងចោទថាព្រះអង្គជាជនក្បត់ជាតិ» ផងទៀត ។
ប្រភពផ្ទៃក្នុងគណបក្សសង្គ្រោះជាតិមុននេះ បានអោយដឹងថា ដើម្បីរកការវិលត្រឡប់ សម រង្ស៊ី មកប្រទេសកម្ពុជាវិញ គឺគេរំពឹងរកការលើកលែងទោសពីព្រះមហាក្សត្រ… ប៉ុន្តែ សម្តេចតេជោសែន កាលពីម្សិលមិញ បានមានប្រសាសន៍បង្ហាញភាពម៉ឺងម៉ាត់ នៃការមិនស្នើសុំរកការលើកលែងទោស មេដឹកនាំគណបក្សប្រឆាំងដែលកំពុងមានទោសតាមផ្លូវតុលាការនោះទេ ។
