កំពង់ឆ្នាំង៖ឆ្នាំសិក្សាឆ្នាំ២០១៨-២០១៩ នៅថ្ងៃទី៣១ ខែឧសភា ឆ្នាំ២០១៨ លោក ហាក់ ប៊ុនធឿនអនុរដ្ឋលេខាធិការក្រសួងធម្មការនិងសាសនា និងលោក ឈួរ ច័ន្ទឌឿន
អភិបាលខេត្តកំពង់ឆ្នាំង បានអញ្ជើញជាអធិបតីក្នុងពិធីបើកបវេសនកាលពុទ្ធិកសិក្សាគ្រប់ភូមិសិក្សាទូទាំងខេត្តកំពង់ឆ្នាំង។
មានព្រះវត្តមាន និងវត្តមានក្នុងពិធីនោះរួមមាន ព្រះធម្មឃោចារ្យ យីសុវណ្ណរតនា ព្រះសាកលវិទ្យារងពុទ្ធិកសាកលវិទ្យាល័យព្រះសីហនុរាជ ព្រះសិរិវិសុទ្ធហ៊ូ ឈីវនាថ ព្រះសិរីធម្មញ្ញាណ សុខ ថាន ព្រះរាជាគណៈថ្នាក់កិត្តិយស ព្រះមេគណខេត្ត និងជាប្រធានសាខាពុទ្ធិកសាកលវិទ្យាល័យព្រះសីហនុរាជខេត្តកំពង់ឆ្នាំង ព្រមទាំងលោក លោកស្រីប្រធានមន្ទីរអង្គភាពជុំវិញខេត្ត លោកគ្រូអ្នកគ្រូ សមណសិស្ស សមណនិស្សិត និងនិស្សិតសរុបចំនួន៧៩០អង្គ/នាក់។
ក្នុងឱកាសនោះផងដែរ លោក ឈួរ ច័ន្ទឌឿន អភិបាលខេត្តបានមានប្រសាសន៍ថា ការប្រារព្ធពិធីបើកបវេសនកាលពុទ្ធិកសោក្សានេះ ធ្វើឡើងក្នុងបុព្វហេតុ លើកតម្កើងវប្បធម៌ស្រឡាញ់ការសិក្សារៀនសូត្រ ការរំលឹកដាស់កូនខ្មែរគ្រប់រូបដែលជាទំពាំង ស្នងឫស្សីដើម្បីបន្តវេនអភិវឌ្ឍន៍ប្រទេសជាតិ ការខិតខំរៀនសូត្រសំរាប់ចិញ្ចឹមជីវិតនិងអនាគតផ្ទាល់ខ្លួន អោយបានប្រកបទៅដោយភាពថ្លៃថ្នូរ ជាពិសេសអោយបានយល់ច្បាស់ថាចំណេះវិជ្ជាគឺជាទ្រព្យដ៏មានតម្លៃ ក្នុងការចូលរួមចំណែកលើកតម្កើងកិត្យានុភាពជាតិអោយកាន់តែខ្ពស់ត្រដែត និងចម្រើនរុងរឿងប្រកបដោយសុខដុមរម្យនាទៅអនាគត។
នាឱកាសនោះ លោក ហាក់ ប៊ុនធឿន ក៏បានមានប្រសាសន៍ផ្តាំផ្ញើ ដល់សមណសិស្ស សមណនិស្សិត និសិត្សទាំងអស់អោយខិតខំរៀនសូត្រស្តាប់បង្គាប់មាតាបិតា លោកគ្រូអ្នកគ្រូ និង ជាពិសេសត្រូវចៀសវាងនៅអោយឆ្ងាយពីគ្រឿងញៀននិងអំពើអបាយមុខផ្សេងៗដែលខុសច្បាប់ និង សង្គមស្អប់ខ្ពើម និង ត្រូវចូលរួមគោរពច្បាប់ចរាចរណ៍អោយបានគ្រប់ៗគ្នា។
ទន្ទឹមនឹងនោះ ក្នុងកម្មវិធីក៏មានប្រគេនប្រកាសនីយបត្រមន្រ្តីសង្ឃខេត្តនិងប័ណ្ណសរសើរជូនសាស្រ្តាចារ្យ សមណនិសិត្សដែលមានស្នាដៃល្អនិងរៀនពូកែផងដែរ៕
នៅចុងបញ្ចប់ លោក ប៊ុនធឿន បានឧបត្ថម្ភថវិកា២០០ដុល្លា
លោកអភិបាលខេត្ត បានឧបត្ថម្ភថវិកា២លានរៀល ព្រះតេជព្រះគុណហ៊ូ ឈីវនាថ ឧបត្ថម្ភថវិកា២លានរៀល ព្រះតេជព្រះគុណឃី សុវណ្ណរតនា ឧបត្ថម្ភកុំព្យុទ័រ២គ្រឿង សៀវភៅ៣៤០ក្បាលនិងប៊ិច៣ប្រអប់ព្រមទាំងមានការឧបត្ថម្ភពីអង្គភាពថវិកាពីអង្គភាពជុំវិញខេត្តដល់សាខាពុទ្ធិកសាកលវិទ្យាល័យព្រះសីហនុរាជខេត្តកំពង់ឆ្នាំងផងដែរ៕