អភិបាលខេត្តពោធិ៍សាត់ ឯកឧត្តម ម៉ៅ ធនិន នាថ្ងៃទី០៣ ខែមិថុនា ឆ្នាំ២០១៨នេះ បានផ្តាំផ្ញើដល់មហាគ្រួសារប្រជាការពារទាំងអស់ ត្រូវបន្តការខិតខំប្រឹងប្រែង សម្របសម្រួល ដោះស្រាយបញ្ហាប្រឈម និងបម្រើសេវាសាធារណៈជូនប្រជាពលរដ្ឋឲ្យកាន់តែទូលំទូលាយ នៅក្នុងដែនសមត្ថកិច្ច មិនត្រូវធ្វើអ្វីបង្កការថ្នាំងថ្នាក់ បង្កការលំបាក គៀបសង្កត់មកលើពួកគាត់ តាមរូបភាពណាមួយនោះឡើយ ត្រូវចាត់ទុកពលរដ្ឋដូចជាឳពុក ជាម្តាយ ជាបង ជាប្អូន ក្នុងមហាគ្រួសារតែមួយ។។ ជាពិសេស «បើចង់ឲ្យស្រូវលូតលាស់បានល្អ ទទួលបានទិន្នផលខ្ពស់ និងបង្កើនជីវភាពគ្រួសារនោះ បងប្អូនត្រូវនាំគ្នាដកស្រងែចេញ ឲ្យអស់កុំលាយឡំ»។
ឯកឧត្តមអភិបាលខេត្ត បានថ្លែងយ៉ាងដូច្នេះ នៅស្នាក់ការគណបក្សស្រុកបាកាន ក្នុងពិធីសំណេះសំណាល និងពិសាបាយសាមគ្គី ប្រកបដោយភាពស្និតស្នាល ជាមួយបងប្អូនក្រុមគ្រួសារប្រជាការពារ និងមេភូមិ មកពី៥ឃុំ មានឃុំត្រពាំងជង ឃុំស្នាមព្រះ ឃុំខ្នារទទឺង ឃុំបឹងបត់កណ្តោល និងឃុំមេទឹក ក្នុងស្រុកបាកាន ចំនួន១៤៣៤នាក់ ដោយបានការចូលរួមពីទីប្រឹក្សាក្រសួងមហាផ្ទៃ អភិបាលរងខេត្ត ថ្នាក់ដឹកនាំមន្ទីរអង្គភាពនានាជុំវិញខេត្ត កងកម្លាំងប្រដាប់អាវុធទាំង៣ និងមន្ត្រីសាលាស្រុក។
ឆ្លៀតក្នុងឱកាសនោះ ឯកឧត្តម ម៉ៅ ធនិន បានចែកជូនវត្ថុកំដរដៃ ដល់ប្រជាការពារ និងមេភូមិ ដែលបានចូលរួម១៤៣៤នាក់ ក្នុងម្នាក់ៗទទួលបានសារុង១ អង្ករ១០គីឡូក្រាម និងបានពិសាបាយសាមគ្គីមួយពេលយ៉ាងកក់ក្តៅផងដែរ៕
