រាជធានីភ្នំពេញ៖ ប្រធាន-អនុប្រធាន និងសមាជិកគ្រប់គណៈកម្មការ និងអនុកម្មការទាំងអស់បានចូលរួមក្នុងកិច្ចប្រជុំណែនាំបច្ចេកទេស ដើម្បីឱ្យដំណើរការស្រង់ បូកពិន្ទុដោយកុំព្យូទ័រ និងផ្ទៀងផ្ទាត់លទ្ធផល នៃការប្រឡងសញ្ញាបត្រមធ្យមសិក្សាទុតិយភូមិសម័យប្រឡង៖ ២០ សីហា ២០១៨ ត្រូវបានអនុវត្តដោយភាពត្រឹមត្រូវតាមបច្ចេកទេស ស្របតាមគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន។
កិច្ចប្រជុំនេះបានប្រព្រឹត្តទៅក្រោមអធិបតីភាពឯកឧត្ដមបណ្ឌិតសភាចារ្យ ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា នារសៀលថ្ងៃព្រហស្បតិ៍ ៤រោច ខែស្រាពណ៍ ឆ្នាំច សំរឹទ្ធិស័ក ព.ស.២៥៦២ នៅវិទ្យាស្ថានជាតិអប់រំ។ ដំណើរការសំណេរ និងកំណែនៃការប្រឡងសញ្ញាបត្រមធ្យមសិក្សាទុតិយភូមិ បានបញ្ចប់ទៅដោយភាពរលូន គ្មានបាតុភាពគួរអោយកត់សម្គាល់ណាមួយកើតឡើងឡើយ៕
