ខេត្តកែបៈ នាព្រឹកថ្ងៃទី១៦ ខែកញ្ញា ឆ្នាំ២០១៨ ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្ម បានអញ្ជើញជាគណអធិបតីក្នុងពិធីសម្ភោធដាក់អោយប្រើប្រាស់ជាផ្លូវការនៅអគារស្នាក់នៅសម្រាប់លោកគ្រូ អ្នកគ្រូចំនួន០១ខ្នង ស្មើនឹង ០៥បន្ទប់ និងរបងសាលាបឋមសិក្សាចំការស្វាយ នៅភូមិចំការចេក ឃុំពងទឹក ស្រុកដំណាក់ចង្អើរ ខេត្តកែប ។
ពិធីក៏មានការអញ្ជើញចូលរួមដោយ ឯកឧត្តម កែន សត្ថា អភិបាលនៃគណអភិបាលខេត្ត លោក លោកស្រីអភិបាលរងខេត្ត ប្រធានមន្ទីអង្គភាពជុំវិញខេត្ត ក្រុង ស្រុក មន្រ្តីរាជការ កងកម្លាំងប្រដាប់អាវុធ ព្រះសង្ឃ សិស្សានុសិស្ស និងប្រជាពលរដ្ឋយ៉ាងច្រើនកុះករ ។
ឯកឧត្តម កិត្តិសេដ្ឋាបណ្ឌិត បានមានប្រសាសន៍ថា រាជរដ្ឋាភិបាល អាណត្តិទី៦ ដែលដឹកនាំដោយ សម្តេចអគ្គមហាសេនាបតីតេជោ ហ៊ុន សែន យកចិត្តទុកដាក់យ៉ាងខ្លាំងទៅលើការអភិវឌ្ឍន៍សមត្ថភាព គុណភាព នៃការអប់រំ ទៅលើមនុស្សគ្រប់វ័យ ។
ឯកឧត្តមបានបន្ថែមទៀតថា សមិទ្ធផលដែលនឹងសម្ភោធដាក់អោយប្រើប្រាស់នាពេលនេះ នឹងបម្រើរអោយផលប្រយោជន៍រួម មិនប្រកាន់និន្នាការនយោបាយនោះទេ ជាពិសេសដើម្បីអោយកុមារគ្រប់រូបបានទទួលសេវាអប់រំ បានចូលរៀននៅបឋមសិក្សា មធ្យមសិក្សាទុតិយភូមិ និងមានឱកាសបន្តការសិក្សាទៅមុខទៀត។ ម្យ៉ាងទៀត ដើម្បីបង្កើនចំនួនកុមារនិងយុវជន ឱ្យទទួលបានការអប់រំនៅគ្រប់កម្រិត លោកគ្រូ អ្នកគ្រូត្រូវផ្តោតលើសមធម៌ និងបែងចែកក្រុមកុមារជួបការលំបាកអោយបានច្បាស់លាស់សម្រាប់បង្ករលក្ខណៈ និងបង្កើនឱកាសដល់សិស្សដែលមិនមានឱកាសចូលរៀន អោយចូលរៀនបានគ្រប់គ្នា ។