ឯកឧត្តមឧបនាយករដ្ឋមន្រ្តី ជា សុផារ៉ា អនុញ្ញាតឱ្យលោកស្រី មុទិតា ចំរើន តំណាងធនាគារពិភពលោក ចូលជួបសម្ដែងការគួរ និងពិភាក្សាការងារស្ដីពីការអនុវត្តគម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ចជំហាន២

ឯកឧត្តម ជា សុផារ៉ា ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ អនុញ្ញាតឱ្យលោកស្រី មុទិតា ចំរើន តំណាងធនាគារពិភពលោក ចូលជួបសម្ដែងការគួរ និងពិភាក្សាការងារស្ដីពីការអនុវត្តគម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ចជំហាន២ (LASED II) នៅទីស្ដីការក្រសួង ថ្ងៃពុធ ៧កើត ខែកត្តិក ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី ១៤ ខែវិច្ឆិកា ឆ្នាំ២០១៨។
ក្នុងឱកាសនោះ ឯកឧត្តមឧបនាយករដ្ឋមន្រ្តី ជា សុផារ៉ា បានសម្ដែងនូវការស្វាគមន៍ចំពោះគណៈប្រតិភូធនាពិភពលោក ដែលបានចុះវាយតម្លៃគម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ចជំហាន២។ ជាមួយគ្នានេះ ឯកឧត្តមឧបនាយករដ្ឋមន្រ្តី ក៏បានជម្រាបជូនពីកិច្ចខិតខំប្រឹងប្រែងរបស់រាជរដ្ឋាភិបាល ក៏ដូចជាក្រសួងរៀបចំដែនដី នគរូបនីយកម្ម និងសំណង់ ក្នុងការចូលរួមចំណែកផ្តល់ដីដល់ប្រជាពលរដ្ឋក្រីក្រគ្មានដីដើម្បីកែលម្អជីវភាពរបស់ពួកគេឱ្យបានល្អប្រសើរ និងរួមចំណែកកាត់ន្ថយភាពក្រីក្រក្នុងប្រទេសផងដែរ។ ឯកឧត្តម ឧបនាយករដ្ឋមន្រ្តី បានផ្តល់អនុសាសន៍មួយចំនួន ជាពិសេសគម្រោងត្រូវផ្តោតលើកិច្ចការពារដីសម្បទានសង្គមកិច្ចឱ្យបានគង់វង្ស ជៀសវាងការលក់ដី ឬដោះដូរដីដែលរាជរដ្ឋាភិបាលបានចែកជូន ធ្វើយ៉ាងនេះសម្បទានិកអាចទាញយកផលកសិកម្មពីដីផង និងទុកចែកជូនដល់កូនចៅជំនាន់ក្រោយមានដីធ្វើស្រែចំការផង។ គម្រោងត្រូវតែបង្កើតឱ្យមាននូវផ្សារផលិតផលធម្មជាតិ ដើម្បីផ្តល់ឱកាសដល់ប្រជាពលរដ្ឋមូលដ្ឋានមានទីតាំងគ្រប់គ្រាន់សម្រាប់លក់ផលិតផលរបស់ខ្លួន តភ្ជាប់ពីកសិដ្ឋានទៅផ្សារសហគមន៍ និងនាំដល់តម្រូវការនៅផ្សារក្នុងតំបន់ផងដែរ។ ឯកឧត្តមឧបនាយករដ្ឋមន្រ្តី ក៏បានស្នើសុំឱ្យមានការគាំទ្របន្តទៀតពីសំណាក់ធនាគារពិភពលោក ក្នុងការពង្រីកគម្រោងបែបនេះទៅទីតាំងផ្សេងទៀតដែលសំបូរទៅដោយប្រជាពលរដ្ឋក្រីក្រគ្មានដី។