ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានជំរុញឱ្យមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ស្វែងរក និងពង្រីកសក្តានុពលវិស័យកម្មន្តសាលនៅក្នុងខេត្ត ដើម្បីលើកកម្ពស់កំណើនប្រកបដោយតុល្យភាព និងភាពធន់នៃសេដ្ឋកិច្ច។
ក្នុងដំណើរទស្សនកិច្ចទៅមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ខេត្តកំពង់ចាម និងខេត្តត្បូងឃ្មុំ នៅថ្ងៃទី១៣ ខែសីហា ឆ្នាំ២០២៤ ដែលមានការចូលរួមពីគណៈអភិបាលខេត្ត, ឯកឧត្តម ហែម វណ្ណឌី បានលើកឡើងថា កម្ពុជាកំពុងជំរុញការធ្វើពិពិធកម្មសេដ្ឋកិច្ច និងឧស្សាហូបនីយកម្មរបស់ខ្លួន ហើយការស្វែងរកប្រភពកំណើនថ្មីជាការងារសំខាន់។ ទន្ទឹមនឹងនោះ មន្ទីរក៏មិនត្រូវភ្លេចមូលដ្ឋានឧស្សាហកម្មដែលមានស្រាប់ ដោយពិនិត្យលទ្ធភាពបង្កើតតម្លៃបន្ថែមឱ្យបានកាន់តែខ្ពស់។
ឯកឧត្តមបានពិភាក្សាសក្តានុពលមួយចំនួន ដូចជាការអភិវឌ្ឍប្រព័ន្ធត្រជាក់ (cold chain) ដែលគាំទ្រ ដោយផលិតកម្មទឹកកកដែលមានគុណភាព និងតម្លៃសមរម្យ, ការកែច្នៃអង្ករទៅជាគុយទាវវេចខ្ចប់ស្ងួត ឬផលិតជាស្រាអង្ករដើម្បីនាំចេញ, និងការទាក់ទាញក្រុមហ៊ុនកែច្នៃឈើកៅស៊ូដែលអាចចេញវិញ្ញាបនបត្របញ្ជាក់ប្រភពដើម ដែលបំពេញលក្ខខណ្ឌសម្រាប់ការនាំចេញរបស់អាជីវកម្មចម្លាក់ជាដើម។
ឯកឧត្តមរដ្ឋមន្ត្រីបានណែនាំដល់មន្ទីរទាំងពីរ ឱ្យធ្វើអាទិភាវូបនីយកម្មការងារ ដោយប្រកាន់យកវិធីសាស្រ្ត និងមធ្យោបាយត្រួតពិនិត្យ និងតាមដានអនុលោមភាព ដោយផ្អែកលើកម្រិតហានិភ័យ និងត្រូវរិះរកនូវនវានុវត្តន៍ និងបច្ចេកវិទ្យាដើម្បីជួយសម្រួលដល់ការងារ។ ឯកឧត្តមក៏បានលើកទឹកចិត្តឱ្យមន្ទីរស្វែងរកការគាំទ្រពីដៃគូ ដូចជាសហគ្រិនខ្មែរ ក្នុងការលើកកម្ពស់សហគ្រិនភាពនៅក្នុងមូលដ្ឋានរបស់ខ្លួន។
ឯកឧត្តមបានបន្ថែមថា៖ “សូមស្វែងរកកាតាលីករទីផ្សារនៅក្នុងខេត្តរបស់យើង ជាពិសេសអ្នកដែលផលិតបានហើយ និងអ្នកដែលបំពេញតាមស្តង់ដារគុណភាពរួចហើយ។ ហើយសូមកំណត់ថាតើអ្នកទាំងនោះត្រូវការឱ្យយើងបង្កើតស្តង់ដារជាតិអ្វីខ្លះបន្ថែមទៀត ដែលនឹងជួយបង្កើនភាពប្រកួតប្រជែង និងជំរុញការ នាំចេញទំនិញដែលផលិតក្នុងខេត្តបានកាន់តែច្រើន។”
ក្នុងនាមជាក្រសួងសម្របសម្រួលការអនុវត្តយុទ្ធសាស្ត្រជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធ ឯកឧត្តមរដ្ឋមន្ត្រី បានស្នើឱ្យមានការគាំទ្រពីរដ្ឋបាលខេត្ត ក្នុងការសម្រួលនីតិវិធីចុះឈ្មោះ និងត្រៀមចុះឈ្មោះអាជីវកម្មក្រៅប្រព័ន្ធ ដើម្បីពួកគាត់អាចឈានចូលក្នុងប្រព័ន្ធ និងទទួលបានការគាំទ្រ និងកញ្ចប់អត្ថប្រយោជន៍ពីរាជរដ្ឋាភិបាល។
ទាក់ទងនឹងការអភិវឌ្ឍវិស័យទឹកស្អាត ឯកឧត្តមបានណែនាំឱ្យរដ្ឋាករទឹកសាធារណៈគាំទ្រដល់ប្រតិបត្តិករទឹកស្អាតឯកជន លើការធ្វើតេស្តគុណភាពទឹកប្រចាំខែ។ ឯកឧត្តមបានបញ្ជាក់ថា ក្រសួងបានបង្កើតក្រុមការងារបច្ចេកទេស ដើម្បីចុះវាយតម្លៃស្ថានភាពប្រតិបត្តិករទឹកស្អាតឯកជននៅទូទាំងប្រទេស និងបានស្នើឱ្យមន្ទីរផ្តល់ការគាំទ្រគំនិតផ្តួចផ្តើមនេះ។
ឯកឧត្តមរដ្ឋមន្ត្រីក៏បានលើកឡើងពីភាពចាំបាច់នៃកិច្ចសហប្រតិបត្តិការ ក្នុងចំណោមមន្ទីរនានា ក្រោមរដ្ឋបាលខេត្ត ពិសេសទាក់ទងនឹងគម្រោងហេដ្ឋារចនាសម្ព័ន្ធដែលប៉ះពាល់ដល់បណ្តាញចែកចាយទឹកស្អាត។ ឯកឧត្តមបានស្នើឱ្យរដ្ឋបាលខេត្តរៀបចំយន្តការចែករំលែកទិន្នន័យ ព័ត៌មាន និងពង្រឹងកិច្ចសហការ ដើម្បីកាត់បន្ថយផលប៉ះពាល់ទាំងនេះ ដែលនឹងជួយឱ្យប្រតិបត្តិករទឹកស្អាតឯកជនមានលទ្ធភាពពង្រីកបណ្តាញ និងបង្កើនគុណភាពទឹកស្អាតជូនប្រជាពលរដ្ឋ។
