នាព្រឹកថ្ងៃព្រហស្បតិ៍ ១៥រោច ខែទុតិយាសាឍ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១៣ ខែសីហា ឆ្នាំ២០២៦ នៅសាលប្រជុំទីស្តីការក្រសួង ឯកឧត្តម ចាន់ ស៊ីណាត រដ្ឋលេខាធិការ ក្នុងនាមជាតំណាងដ៏ខ្ពង់ខ្ពស់របស់ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានអញ្ជើញដឹកនាំកិច្ចប្រជុំស្តីពី «ការធ្វើបច្ចុប្បន្នភាព និងទំនើបកម្មលើប្រព័ន្ធព្យាករណ៍រ៉ាដាតេជោសែនទី១ ដើម្បីឈានទៅធ្វើសមហរណកម្មជាមួយមជ្ឈមណ្ឌលជាតិគ្រប់គ្រងទិន្នន័យធនធានទឹក (Data Center) និងស្ថានីយរ៉ាដាតេជោសែនទី២»។
កិច្ចប្រជុំនេះរៀបចំឡើងក្នុងគោលបំណងបង្កើនប្រសិទ្ធភាពការព្យាករឱ្យកាន់តែល្អប្រសើរ ព្រមទាំងរក្សាទុកទិន្នន័យចាស់ៗជាសារប្រយោជន៍ក្នុងការប្រៀបធៀបលើការប្រើប្រាស់ទិន្នន័យជាតិនៃមជ្ឈមណ្ឌលគ្រប់គ្រងទិន្នន័យជាតិធនធានទឹក និងឧតុនិយម (Data Center)។ កិច្ចប្រជុំនេះមានការអញ្ជើញចូលរួមពីសំណាក់ ឯកឧត្តមតំណាងដ៏ខ្ពង់ខ្ពស់នៃក្រសួងសេដ្ឋកិច្ច និងហិរញ្ញវត្ថុ ក្រុមការងារបច្ចេកទេសជាតិ និងអន្តរជាតិ ព្រមទាំងឯកឧត្តម លោកជំទាវ លោក លោកស្រី ប្រធាននាយកដ្ឋានជំនាញពាក់ព័ន្ធ នៃក្រសួងធនធានទឹក និងឧតុនិយម។
ក្នុងឱកាសនោះ ឯកឧត្តមរដ្ឋលេខាធិការ បានគូសបញ្ជាក់ថា ប្រព័ន្ធរ៉ាដាតេជោសែនទី១ គឺជាឧបករណ៍ដែលក្រសួងបានប្រើប្រាស់កន្លងមក ហើយពិតជាបានផ្តល់បទពិសោធន៍យ៉ាងសំខាន់សម្រាប់យើងគិតគូរឈានទៅរកការបង្កើតរ៉ាដាតេជោសែនទី២ ឱ្យកាន់តែទំនើប អាចព្យាករកាន់តែមានប្រសិទ្ធភាពខ្ពស់ ព្រមទាំងមានការតភ្ជាប់ជាខ្សែសង្វាក់ទៅនឹងមជ្ឈមណ្ឌលជាតិគ្រប់គ្រងទិន្នន័យធនធានទឹក និងឧតុនិយម ដែលជាសមិទ្ធផលវិស្វកម្មដ៏ទំនើប បំពាក់ដោយប្រព័ន្ធបច្ចេកវិទ្យាជឿនលឿនសម្រាប់ប្រមូលផ្តុំ រក្សាទុក និងវិភាគទិន្នន័យប្រកបដោយប្រសិទ្ធភាព។
ឯកឧត្តមបានសង្កត់ធ្ងន់ថា មជ្ឈមណ្ឌលនេះដើរតួនាទីយ៉ាងសំខាន់ក្នុងការបម្រើដល់ការអភិវឌ្ឍជាតិគ្រប់វិស័យ រួមមាន៖ វិស័យកសិកម្ម ការគ្រប់គ្រងគ្រោះមហន្តរាយ អាកាសចរណ៍ ទេសចរណ៍ និងវិស័យពាក់ព័ន្ធដទៃទៀត ព្រមទាំងចូលរួមចំណែកយ៉ាងសំខាន់ក្នុងការត្រៀមលក្ខណៈបង្ការទុកជាមុន ដើម្បីកាត់បន្ថយហានិភ័យពីគ្រោះទឹកជំនន់ និងទប់ស្កាត់បញ្ហាភាពរាំងស្ងួតឱ្យបានជាអតិបរមា៕
