កណ្តាល: នាព្រឹកថ្ងៃទី ២១ ខែ កុម្ភៈ ឆ្នាំ ២០២១នេះ លោក ជិន ប៊ុនធឿន លេខាសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាសមាជិកគណៈកម្មាធិការសាខាគណបក្ស “ខ៧“ នៃគណៈកម្មាធិការគណបក្សខុទ្ទកាល័យសម្តេចតេជោ ហ៊ុន សែន រួមនឹងក្រុមការងារ បានចុះជួបសំណេះសំណាលជាមួយយុវជនគណបក្សប្រជាជនកម្ពុជា ប្រចាំភូមិឃុំពាមរាំង ចំនួន៣០នាក់ នៅភូមិពាមរាំងក្រោម ឃុំពាមរាំង ស្រុកលេីកដែក ខេត្តកណ្តាល ។
នាឱកាសនោះ ក្នុងនាម លោកជំទាវ ម៉ែន នារីសោភគ័ ប្រធានគណៈកម្មាធិការសាខាគណបក្ស “ខ៧“ នៃគណៈកម្មាធិការគណបក្សខុទ្ទកាល័យសម្តេចតេជោ ហ៊ុន សែន និងជាអនុប្រធានក្រុមការងារថ្នាក់កណ្តាលចុះជួយឃុំពាមរាំង លោក ជិន ប៊ុនធឿន បានលេីកឡេីងពីការដឹកនាំដ៏ឆ្នេីមរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលនាំឲ្យកម្ពុជាទទួលបានសុខសន្តិភាពពេញលេញ មានការអភិវឌ្ឍន៍ឈានឡេីងគ្រប់វិស័យ ដូចនេះសូមប្អូនៗជាយុវជន យុវនារីជំនាន់ក្រោយរួមគ្នាថែរក្សាសន្តិភាពនេះបន្តជានិរន្ត ដេីម្បីប្រទេសកម្ពុជាយេីងកាន់តែមានការរីកចំរេីនថែមទៀត ។ ទន្ទឹមនឹងនេះ លោកក៏បានផ្តល់នូវបទពិសោធន៍ជាច្រេីនពាក់ព័ន្ធនឹងការប្រព្រឹត្តខ្លួនឲ្យក្លាយជាយុវជនគណបក្សល្អ រឹងម៉ាំ និងការប្រព្រឹត្តក្នុងសង្គមឲ្យសាកសមជាយុវជន យុវនារីល្អឈានមុខគេ ក្នុងការបម្រេីប្រជាពលរដ្ឋ និងផលប្រយោជន៍របស់សង្គមជាតិទាំងមូល ។ ជាមួយគ្នានេះ លោកក៏បានជម្រាបជូនពីស្ថានការណ៍វិវត្តន៍ថ្មីនៃជំងឺកូវីដ១៩ ក្នុងព្រឹត្តិការណ៍សហគមន៍ ២០ កុម្ភៈ ព្រមទាំងសូមឲ្យបងប្អូនទាំងអស់បន្តចូលរួមទប់ស្កាត់ និងការពារការរីករាលដាលនៃជំងឺកូវីដ១៩នេះ តាមរយៈការបន្តអនុវត្តវិធានការរបស់ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នាយករដ្ឋមន្ត្រី គឺ៖ ៣ ការពារ (១.ពាក់ម៉ាស់ ២.លាងដៃ ៣.គម្លាតសុវត្ថិភាពសង្គម និងគម្លាតសុវត្ថិភាពបុគ្គល ) និង ៣ កុំ ( ១.កុំចូលទៅកន្លែងបិទជិត គ្មានខ្យល់ចេញចូល និងប្រេីម៉ាសុីនត្រជាក់ច្រេីនពេក រកកន្លែងមានខ្យល់ចេញចូល ២.កុំទៅកន្លែងមនុស្សច្រេីនកុះករ ៣.កុំប៉ះពាល់គ្នា កុំចាប់ដៃគ្នា កុំកៀកស្មាគ្នា កុំឱបគ្នាជាដេីម ) ។
ចុងបញ្ចប់ ក្រុមការងារក៏បានប្រគល់អំណោយជាគ្រឿងឧបភោគបរិភោគ និងថវិកាមួយចំនួន ជូនដល់ក្រុមការងារយុវជនឃុំ សម្រាប់យកទៅចែកជូនបន្តដល់ប្រជាពលរដ្ឋដែលមានជីវភាពខ្វះខាតចំនួន១០គ្រួសារ នៅអំឡុងពេលជំងឺកូវីដ១៩នេះផងដែរ ៕
