ឯកឧត្តមបណ្ឌិត កៅ គឹមហួន អគ្គលេខាធិការអាស៊ាន បន្ដជួបថ្នាក់ដឹកនាំ និងចូលរួមក្នុងកិច្ចប្រជុំសំខាន់ៗ នៅទីក្រុងហ្សាការតា ប្រទេសឥណ្ឌូណេស៊ី

(ឥណ្ឌូណេស៊ី)៖ នៅថ្ងៃទី១៧ ខែឧសភា ឆ្នាំ២០២៣ នៅលេខាធិការដ្ឋានអាស៊ាន ក្នុងទីក្រុងហ្សាការតា សាធារណរដ្ឋឥណ្ឌូណេស៊ី ឯកឧត្តមបណ្ឌិត កៅ គឹមហួន អគ្គលេខាធិការអាស៊ាន បានអញ្ជើញចូលរួម ក្នុងការជួបជុំបាយថ្ងៃត្រង់ ជាមួយបុគ្គលិកលេខាធិការដ្ឋានអាស៊ាន ក្នុងពិធី Halal Bihalal។

នៅរសៀលថ្ងៃទី១៧ ខែឧសភា ឆ្នាំ២០២៣ នៅលេខាធិការដ្ឋានអាស៊ាន ក្នុងទីក្រុងហ្សាការតា សាធារណរដ្ឋឥណ្ឌូណេស៊ី ឯកឧត្តមបណ្ឌិត កៅ គឹមហួន អគ្គលេខាធិការអាស៊ាន បានអនុញ្ញាតឲ្យគណៈប្រតិភូ ស្ថាប័នសិក្សាស្រាវជ្រាវ Delhi Policy Group ដែលមានមូលដ្ឋាននៅទីក្រុងញូវដេលី ប្រទេសឥណ្ឌា ដឹកនាំដោយលោក Hemant Krishan Singh ចូលជួបសំដែងការគួរសម និងពិភាក្សាការងារ។

នៅក្នុងជំនួបនោះ ភាគីទាំងពីរ បានផ្លាស់ប្តូរយោបល់អំពីការវិវត្តន៍ថ្មីៗ នៅក្នុងអាស៊ាន និងឥណ្ឌា ហើយបានរិះរកវិធី ដើម្បីពង្រឹងទំនាក់ទំនងអាស៊ាន-ឥណ្ឌាបន្ថែមទៀត ក្រោយពីអាស៊ាន និងឥណ្ឌា បានបង្កើតភាពជាដៃគូយុទ្ធសាស្ត្រគ្រប់ជ្រុងជ្រោយ កាលពីឆ្នាំ២០២២។

នៅរសៀលថ្ងៃទី១៧ ខែឧសភា ឆ្នាំ២០២៣ នៅលេខាធិការដ្ឋានអាស៊ាន ក្នុងទីក្រុងហ្សាការតា សាធារណរដ្ឋឥណ្ឌូណេស៊ី ឯកឧត្តមបណ្ឌិត កៅ គឹមហួន អគ្គលេខាធិការអាស៊ាន បានជួបពិភាក្សាការងារតាមអនឡាញ ជាមួយលោកជំទាវ Anne-Marie Trevelyan រដ្ឋមន្ត្រីទទួលបន្ទុកតំបន់ឥណ្ឌូ-ប៉ាស៊ីហ្វិក។

នៅក្នុងជំនួបនោះ ភាគីទាំងពីរ បានផ្លាស់ប្តូរយោបល់ស្តីពីវឌ្ឍនភាពថ្មីៗ ក្នុងគោលនយោបាយការបរទេសរបស់អាស៊ាន និងអង់គ្លេស ហើយបានពិភាក្សារិះរកដើម្បីពង្រឹងបន្ថែមទៀតនូវទំនាក់ទំនងរវាងអាស៊ាន និងអង់គ្លេស។

នៅរសៀលថ្ងៃទី១៧ ខែឧសភា ឆ្នាំ២០២៣ នៅលេខាធិការដ្ឋានអាស៊ាន ក្នុងទីក្រុងហ្សាការតា សាធារណរដ្ឋឥណ្ឌូណេស៊ី ឯកឧត្តមបណ្ឌិត កៅ គឹមហួន អគ្គលេខាធិការអាស៊ាន បានផ្តល់កិច្ចសម្ភាសន៍ ដល់សារព័ត៌មាន People’s Daily របស់ចិន។

នៅក្នុងកិច្ចសម្ភាសន៍នោះ លោកអគ្គលេខាធិការអាស៊ាន បានចែករំលែកទស្សនៈរបស់គាត់លើវិស័យកិច្ចសហប្រតិបត្តិការនានា នៅក្រោមក្របខណ្ឌនៃកិច្ចសហប្រតិបត្តិការអាស៊ាន-ចិន ជាពិសេស សារៈសំខាន់នៃការថែរក្សាសន្តិភាព ស្ថិរភាព សន្តិសុខ និងការអភិវឌ្ឍតំបន់ ដើម្បីជាប្រយោជន៍ដល់ប្រជាជនអាស៊ាន និងចិន៕