កម្ពុជា និងតួកគី បើកកិច្ចប្រជុំពិគ្រោះយោបល់ទ្វេភាគី លើកទី៣

(ភ្នំពេញ)៖ ឯកឧត្តមបណ្ឌិត ចែម វីឌ្យ៉ា រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា និងឯកឧត្តម Burak Akçapar អនុរដ្ឋមន្រ្តីក្រសួងការបរទេសនៃសាធារណរដ្ឋតួកគី នៅថ្ងៃទី១៩-២០ ខែមីនា ឆ្នាំ២០២៤ បានធ្វើជាសហប្រធាននៃកិច្ចប្រជុំពិគ្រោះយោបល់ទ្វេភាគី លើកទី៣ រវាងក្រសួងការបរទេសទាំងពីរ ដែលបានប្រារព្ធឡើងនៅទីក្រុងអង់ការ៉ា សាធារណរដ្ឋតួកគី។

បន្ទាប់ពីកិច្ចប្រជុំពិគ្រោះយោបល់ ឯកឧត្តមបណ្ឌិត ចែម វីឌ្យ៉ា បានចូលជួបសម្តែងការគួរសមជាមួយ ឯកឧត្តម Hakan Fidan រដ្ឋមន្ត្រីក្រសួងការបរទេសនៃសាធារណរដ្ឋតួកគី និងបានជួបពិភាក្សាការងារប្រកបដោយផ្លែផ្កាជាមួយឯកឧត្តម Afif Demirkiran អនុប្រធានគណបក្ស AK និងជា ប្រធានផ្នែកកិច្ចការបរទេស ឯកឧត្តម Serkan KAYALAR ប្រធានទីភ្នាក់ងារសហប្រតិបត្តិការ និងសម្របសម្រួលទួរគី (TIKA) និងសាស្រ្តាចារ្យ Necdet Ünüvar សាកលវិទ្យាធិការនៃសាកលវិទ្យាល័យអង់ការ៉ា។

កិច្ចប្រជុំទាំងអស់ខាងលើបានធ្វើឡើងក្នុងបរិយាកាសស្និទ្ធស្នាល និងទទួលបានលទ្ធផលវិជ្ជមាន។ ឥស្សរជននៃប្រទេសទាំងពីរបានសង្កត់ធ្ងន់ពីសារៈសំខាន់នៃដំណើរទស្សនកិច្ចថ្នាក់ខ្ពស់ ដើម្បីពង្រឹងបន្ថែមទៀតនូវទំនាក់ទំនង និងកិច្ចសហប្រតិបត្តិការល្អដែលមានស្រាប់ ជាពិសេសលើវិស័យពាណិជ្ជកម្ម និងការវិនិយោគ ដែលត្រូវបាន សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងឯកឧត្តម Recep Tayyip Erdoğan ប្រធានាធិបតីនៃសាធារណរដ្ឋតួកគីបានកំណត់ឱ្យឈានដល់ ១ ពាន់លានដុល្លារអាមេរិក នៅក្នុងជំនួបរវាងថ្នាក់ដឹកនាំទាំងពីរកាលពីឆ្នាំ២០១៨៕