ជាប្រទេសមួយដែលបានក្លាយខ្លួនជាសមាជិកសន្និសីទអន្តរជាតិនៃបណ្ដាគណបក្សនយោបាយនៅអាស៊ី (ICAPP) នៅឆ្នាំ២០០៣ កម្ពុជាបានប្រែក្លាយខ្លួនជាសមាជិកម្នាក់ដ៏សកម្ម រហូតអាចវិវឌ្ឍខ្លួនក្លាយជារដ្ឋមួយដែលទទួលបានការកោតសរសើរ និងការគាំទ្រពេញលេញពីប្រទេសជាសមាជិក ICAPP ហើយត្រឹមតែរយៈពេល ៧ឆ្នាំប៉ុណ្ណោះ កម្ពុជាហ៊ានទទួលយកតួនាទីដ៏សំខាន់ជាប្រវត្តិសាស្ត្រធ្វើជាប្រធាន និងជាម្ចាស់ផ្ទះដឹកនាំកិច្ចប្រជុំមហាសន្និបាតសន្និសីទអន្តរជាតិនៃបណ្ដាគណបក្សនយោបាយនៅអាស៊ី លើកទី៦ នៅឆ្នាំ២០១០។
ដោយសារកម្ពុជាតែងតែដើរតួនាទីសកម្មនៅក្នុង ICAPP តាំងពីដំបូងទីមក កម្ពុជាបានចូលរួមចំណែកយ៉ាងច្រើន តាមរយៈការចូលរួមកិច្ចប្រជុំនានារបស់ ICAPP។ កម្ពុជាក៏ជាសមាជិកគណៈអចិន្ត្រៃយ៍របស់ ICAPP ផងដែរ។ កម្ពុជាបានរួមចំណែកយ៉ាងពេញលេញក្នុង ICAPP ជាពិសេសគណបក្សប្រជាជនកម្ពុជា បានដើរតួនាទីយ៉ាងសំខាន់ក្នុងការចូលរួមដឹកនាំស្ថាប័ន ICAPP ក៏ដូចជាក្រុមប្រឹក្សាវប្បធម៌អាស៊ី (ACC) របស់ ICAPP ដើម្បីការតភ្ជាប់វប្បធម៌ចម្រុះនៅអាស៊ី និងពិភពលោក តាមរយៈកិច្ចសន្ទនា ការយោគយល់គ្នា និងការគោរពគ្នា ព្រមទាំងការបង្កើតភាពជាដៃគូជាមួយនឹងអង្គការ UNESCO។ ចំណុចទាំងនេះហើយ បានធ្វើឱ្យបណ្តាគណបក្សនយោបាយជាសមាជិក ICAPP ផ្តល់គុណតម្លៃជូនកម្ពុជាធ្វើជាម្ចាស់ផ្ទះនៃមហាសន្និបាតសន្និសីទអន្តរជាតិនៃបណ្តាគណបក្សនយោបាយនៅអាស៊ី លើកទី១២ ជាថ្មីម្តងទៀត។
កម្ពុជានឹងធ្វើជាម្ចាស់ផ្ទះ នៃមហាសន្និបាតសន្និសីទអន្តរជាតិនៃបណ្តាគណបក្សនយោបាយនៅអាស៊ី (ICAPP) លើកទី១២ ចាប់ពីថ្ងៃទី២១ ដល់ថ្ងៃទី២៤ ខែវិច្ឆិកា ឆ្នាំ២០២៤ ដែលដឹកនាំដោយគណបក្សប្រជាជនកម្ពុជា ដែលនឹងក្លាយជាព្រឹត្តិការណ៍ប្រវត្តិសាស្ត្រដ៏ធំ និងជោគជ័យមួយបន្ថែមទៀត នៃការជួបជុំមហាគ្រួសារគណបក្សនយោបាយនៅអាស៊ីតំណាងឱ្យ ៥២ប្រទេស និងស្ថាប័នជាដៃគូមកពីតំបន់ផ្សេងៗ។ សម្តេចមហាបវរធិបតី ហ៊ុន ម៉ាណែត អនុប្រធានគណបក្សប្រជាជនកម្ពុជា និងជានាយករដ្ឋមន្ត្រីនៃព្រះរាជាណាចក្រកម្ពុជា នឹងធ្វើជាប្រធានដឹកនាំ «មហាសន្និបាតលើកទី១២ នៃសន្និសីទអន្តរជាតិនៃបណ្តាគណបក្សនយោបាយនៅអាស៊ី» (12 ICAPP-GA) អាណត្តិឆ្នាំ២០២៤-២០២៥ នៅរាជធានីភ្នំពេញ។
ការផ្តល់សេចក្តីទុកចិត្តពី ICAPP ដល់គណបក្សប្រជាជនកម្ពុជាដោយឡែក ហើយជារួមដល់កម្ពុជា ឃើញថាបណ្តាគណបក្សនយោបាយទាំងអស់បានសម្លឹងមើលតួនាទីសំខាន់របស់គណបក្សប្រជាជនកម្ពុជា ក៏ដូចជាកម្ពុជាដែលបានរក្សានូវគោលការណ៍គ្រឹះនៃប្រជាធិបតេយ្យ ផ្អែកលើវិធានច្បាប់ និងវិន័យរបស់ខ្លួន ពិសេសកម្ពុជាបានរួមចំណែកក្នុងការងារនានារបស់ ICAPP ក្នុងកិច្ចសហប្រតិបត្តិការរបស់ខ្លួនសំដៅឆ្ពោះទៅរកការកសាងពិភពលោកមួយដែលមានសន្តិភាពផងមានស្ថិរភាពផង និងមានការអភិវឌ្ឍ។ កម្ពុជាក៏ចូលរួមចំណែកនៅក្នុងកិច្ចសហប្រតិបត្តិការសន្តិសុខ សហប្រតិបត្តិការ ពហុភាគី ទ្វេភាគី និងសេដ្ឋកិច្ចសង្គម ជាដើម។ ហើយកម្ពុជាក៏បានជួយជំរុញឧត្តមគតិដ៏សំខាន់បំផុតរបស់ ICAPP គឺការជួយជំរុញការយោគយល់គ្នាទៅវិញទៅមករវាងគណបក្សនយោបាយនានា។
ទាំងអស់នេះធ្វើឱ្យកម្ពុជាមានការអភិវឌ្ឍ ហើយផ្តល់គុណតម្លៃពីបណ្តាគណបក្ស ICAPP ជូនកម្ពុជាក្នុងការដឹកនាំកិច្ចប្រជុំកំពូលម្តងទៀតជាលើកទី២ ដែលសបញ្ជាក់ឱ្យឃើញពីអ្វីដែលគណបក្សប្រជាជនកម្ពុជា ក៏ដូចជារាជរដ្ឋាភិបាលកម្ពុជាបានធ្វើគឺទទួលស្គាល់ជាអន្តរជាតិពីបណ្តាគណបក្សនយោបាយលើសកលលោក។
ឯកឧត្តម ប្រាក់ សុខុន អនុប្រធានទី១ព្រឹទ្ធសភា និងជាប្រធានគណៈកម្មការរៀបចំមហាសន្និបាតសន្និសីទអន្តរជាតិនៃបណ្តាគណបក្សនយោបាយនៅអាស៊ី (ICAPP) លើកទី១២ ធ្លាប់បានលើកឡើងថា កម្ពុជារៀបចំធ្វើយ៉ាងណាឱ្យមហាសន្និបាត ICAPP ប្រព្រឹត្តទៅដោយរលូន ហើយស្របតាមមូលបទ «ដំណើរស្វែងរកសន្តិភាព និងការផ្សះផ្សា»។ ត្រង់ចំណុចនេះ ឯកឧត្តម ប្រាក់ សុខុន បានលើកឡើងថា មានទិដ្ឋភាពពីរនៃភាពជាម្ចាស់ផ្ទះរបស់កម្ពុជា ទិដ្ឋភាពទី១ គឺពាក់ព័ន្ធទៅនឹងខ្លឹមសារ និងឯកសារនានា ហើយទិដ្ឋភាពទី២ គឺទាក់ទងទៅនឹងបដិសណ្ឋារកិច្ច ការស្នាក់នៅ និងសន្តិសុខ សុវត្ថិភាពរបស់ភ្ញៀវ ដែលបានអញ្ជើញមកចូលរួមក្នុងកិច្ចប្រជុំ ICAPP ដែលមានជាង ២០០ប្រតិភូ ហើយមកពីប្រទេសចំនួន៤២ ហើយមានគណបក្សនយោបាយប្រមាណ ៥៧ គណបក្ស និងអ្នកកាសែតមកពី ១១ ប្រទេសថែមទៀត។ ដូច្នេះ ក្នុងនាមជាម្ចាស់ផ្ទះ កម្ពុជាត្រូវធ្វើយ៉ាងណារៀបចំបរិស្ថានឱ្យបានល្អដើម្បីទទួលភ្ញៀវប្រកបដោយផាសុកភាព និងសុវត្ថិភាព ហើយកិច្ចប្រជុំដំណើរការទៅដោយរលូន។
ឯកឧត្តម ប្រាក់ សុខុន បន្តថា តួនាទីរបស់កម្ពុជាគឺខិតខំធ្វើឱ្យកិច្ចពិភាក្សានៃកិច្ចប្រជុំវិលជុំវិញប្រធានបទ ដើម្បីផ្ដល់ផលប្រយោជន៍ទាំងនេះទៅដល់ពិភពលោកផងដែរ។ ដូច្នេះយើងត្រូវប្រឹង ត្រូវធ្វើឱ្យចេញពីបេះដូងរបស់យើងដើម្បីឱ្យភ្ញៀវដែលមកចូលរួមប្រជុំនេះគេមានប្រយោជន៍ខាងនយោបាយផង និងគេសប្បាយចិត្តដែលបានមកស្គាល់ប្រទេសកម្ពុជាផង។
ឯកឧត្តម ប្រាក់ សុខុន បានសង្កត់ធ្ងន់ថា៖ «នេះហើយជាអ្វីដែលគេស្គាល់កម្ពុជា តាមរយៈការសម្រេចបានសន្តិភាព និងការបង្រួបបង្រួមជាតិពេញលេញរបស់កម្ពុជា អញ្ចឹងយើងមានលទ្ធភាពនៅក្នុងការដើរតួនាទីមួយ ប្រមូលបញ្ញាញាណ ប្រមូលគតិបណ្ឌិតរបស់គណបក្សនយោបាយនានានៅក្នុងតំបន់អាស៊ី ហើយក៏ជាមួយគណបក្សនយោបាយនានានៅទ្វីបផ្សេងទៀត មានមកពីអាមេរិកឡាទីន និងមកពីអឺរ៉ុប។ អញ្ចឹងបទពិសោធន៍កម្ពុជាគឺការស្វែងរកសន្តិភាពនេះតែម្ដង» ។
ឯកឧត្តម បានបន្តថា៖ “ទ្វីបអាស៊ីជាទ្វីបមួយធំបំផុតដែលមានប្រជាជនច្រើន ហើយជាទ្វីបដែលមានប្រទេសខុសៗគ្នាច្រើន ទាំងផ្នែកប្រជាសាស្ត្រ ទាំងផ្នែកផ្ទៃក្រឡា វប្បធម៌សាសនា ទំហំសេដ្ឋកិច្ច និងចំនួនប្រជាជន។ អញ្ចឹងវាមានភាពចាំបាច់ដើម្បីយល់គ្នាទោះជាសាសនាខុសគ្នា ទំហំសេដ្ឋកិច្ចខុសគ្នា ទំហំប្រទេសខុសគ្នា ប៉ុន្តែចាំបាច់ត្រូវមានការយល់គ្នា។ ការយល់គ្នានោះនៅក្នុងគោលដៅមួយជួយជំរុញវិបុលភាពនៅក្នុងតំបន់ ប៉ុន្តែវិបុលភាពនោះមិនអាចកើតឡើងដោយគ្មានសន្តិភាពបាននោះទេ លុះត្រាតែមានសន្តិភាពទើបមានការអភិវឌ្ឍ។ កម្ពុជាគាំទ្រដំណើរការអភិវឌ្ឍរបស់ប្រទេសនានា និងតំបន់ ក៏ដូចពិភពលោកទាំងមូល ហើយគាំទ្រនូវកិច្ចការប្រតិបត្តិការខាងផ្នែកសេដ្ឋកិច្ច សង្គមកិច្ច និងសហប្រតិបត្តិការនានានៅក្នុងការប្រឆាំងឧក្រិដ្ឋកម្មផ្សេងៗ ដែលជាឧត្តមគតិ ICAPP ហើយស្របទៅនឹងគោលនយោបាយរបស់ការបរទេសរបស់កម្ពុជាតែម្ដង អញ្ចឹងហើយបានជាកម្ពុជាអាចរួមចំណែកពេញលេញនៅក្នុងការងាររបស់ ICAPP។
លោក ជុង អ៊ីយ៉ុង (Jung Eui-Yong) ប្រធានគណៈកម្មាធិការអចិន្ត្រៃយ៍ ICAPP កាលពីថ្ងៃទី១៧ ខែឧសភា ឆ្នាំ២០២៤ នៅទីក្រុងសេអ៊ូល បានថ្លែងថា៖ «គណបក្សប្រជាជនកម្ពុជាបានដើរតួនាទីយ៉ាងសំខាន់ ក្នុងការចូលរួមដឹកនាំស្ថាប័ន ICAPP ក៏ដូចជា ACC របស់ ICAPP ដើម្បីការតភ្ជាប់វប្បធម៌ចម្រុះនៅអាស៊ី និងពិភពលោកតាមរយៈកិច្ចសន្ទនា ការយោគយល់គ្នា និងការគោរពគ្នា ជាពិសេសការបង្កើតភាពជាដៃគូជាមួយនឹងអង្គការ UNESCO»។
ក្នុងភាពជាម្ចាស់ផ្ទះ កម្ពុជាបានជ្រើសរើសមូលបទសម្រាប់មហាសន្និបាតគឺ «ដំណើរស្វែងរកសន្តិភាព និងការផ្សះផ្សា» នេះមិនមែនជាការធ្វើឡើងដោយចៃដន្យទេគឺផ្អែកទៅលើកត្តាពីរជាធំ ទីមួយគឺផ្អែកទៅលើបទពិសោធន៍របស់កម្ពុជា និងមេរៀនរបស់កម្ពុជាដែលទទួលបានក្នុងការស្វែងរកសុខសន្តិភាព ការចរចាសម្រេចបានសន្តិភាព ការផ្សះផ្សាជាតិ ការឯកភាពទឹកដី និងប្រមូលផ្ដុំកិច្ចប្រឹងប្រែងជាតិទាំងមូលដើម្បីកសាងប្រទេសឡើងវិញដែលមានការអភិវឌ្ឍរហូតដល់សព្វថ្ងៃនេះជាការពិតជាក់ស្តែង។ ទីពីរ ផ្អែកទៅលើបំណងប្រាថ្នាជាអ្វីដែលប្រជាជននៅលើពិភពលោក និងនៅក្នុងតំបន់ និងក៏ជាតម្រូវការនៅក្នុងតំបន់ និងពិភពលោក គឺចង់បានសន្តិភាពខ្ពស់។ សន្តិភាពជាភាពចាំបាច់មួយសម្រាប់តំបន់ និងពិភពលោក ហើយនេះក៏អាចចាត់ទុកតួនាទីមួយនៅក្នុងការគិតគូរស្វែងរកពិភាក្សាបញ្ចុះបញ្ចូលប្រទេសនានាដែលកំពុងតែមានជម្លោះឱ្យវិលមកពិភាក្សាគ្នា ហើយស្វែងរកការបញ្ចប់សង្គ្រាមតាមមធ្យោបាយការទូត និងការចរចាគ្នា។ អញ្ចឹងកម្ពុជាអាចមានតួនាទីនៅក្នុងកិច្ចការងារនេះ ដែលធ្វើឱ្យពិភពលោកកាន់តែស្គាល់កម្ពុជា ក្នុងភាពជាម្ចាស់ផ្ទះរបស់កម្ពុជា ក្នុងទិដ្ឋភាពពីរ ទី១ គឺទិដ្ឋភាពវប្បធម៌ដោយសារតែប្រាសាទអង្គរវត្តនិងទី២ គឺទិដ្ឋភាពសន្តិភាព ដែលប្រទេសតិចតួចណាស់នៅលើពិភពលោកសម្រេចបានសមិទ្ធផលក្នុងការស្វែងរកសន្តិភាព និងការផ្សះផ្សាជាតិដូចកម្ពុជាដែលបានបញ្ចប់សង្គ្រាមរាំរ៉ៃដែលអូសបន្លាយមកជាង ៥០០ឆ្នាំ មកជាប្រទេសមួយមានសុខសន្តិភាពពេញលេញ មានការផ្សះផ្សាជាតិ បង្រួបបង្រួមជាតិ និងឯកភាពទឹកដី។
ប្រជាពលរដ្ឋទូទាំងប្រទេសពិតជាមានក្តីសោមនស្សរីករាយ និងមោទនភាព ដែលព្រះរាជាណាចក្រកម្ពុជាធ្វើជាម្ចាស់ផ្ទះនៃមហាសន្និបាតសន្និសីទអន្តរជាតិនៃបណ្តាគណបក្សនយោបាយនៅអាស៊ី ICAPP លើកទី១២។ ហេតុនេះសូមបងប្អូនជនរួមជាតិ សូមត្រៀមរៀបចំគ្រប់លក្ខណៈសម្បត្តិក្នុងនាមជាម្ចាស់ផ្ទះ ដោយរង់ចាំទទួលស្វាគមន៍ប្រតិភូ និងភ្ញៀវអន្តរជាតិមកពីគ្រប់ទិសទីជុំវិញពិភពលោកដើម្បីទទួលយកនូវស្នាមញញឹមរួសរាយរាក់ទាក់ជាមួយនឹងឥរិយាបថស្លូតបូតសុភាពរាបសាថ្លៃថ្នូររបស់ប្រជាជនកម្ពុជាយើង ដែលកំពុងរស់នៅក្នុងសន្តិភាពពេញលេញ និងការអភិវឌ្ឍលើគ្រប់វិស័យ៕
