ឧបនាយករដ្ឋមន្ត្រីប្រចាំការ វង្សី វិស្សុត រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានគណៈកម្មាធិការតាមដាន ត្រួតពិនិត្យ និងវាយតម្លៃការអនុវត្តយុទ្ធសាស្ត្របញ្ចកោណ ដំណាក់កាលទី១ (គ.យ.ប.) នាថ្ងៃទី១១ ខែធ្នូ ឆ្នាំ២០២៥ បានអញ្ជើញដឹកនាំកិច្ចប្រជុំពិនិត្យលើសេចក្តីព្រាងបឋមនៃ «ក្របខ័ណ្ឌវាយតម្លៃពាក់កណ្តាលអាណត្តិនៃការអនុវត្តយុទ្ធសាស្ត្របញ្ចកោណ ដំណាក់កាលទី១» ដើម្បីពិភាក្សា ផ្លាស់ប្តូរយោបល់ និងប្រមូលធាតុចូលបន្ថែម សំដៅកែសម្រួលទម្រង់និងខ្លឹមសារនៃសេចក្តីព្រាងឯកសារក្របខ័ណ្ឌនេះ ឱ្យឆ្លុះបញ្ចាំងលើគ្រប់ទិដ្ឋភាពស្របតាមស្ថានភាពជាក់ស្តែងនាពេលបច្ចុប្បន្ន ប្រកបដោយគុណភាព និងភាពដែលអាចអនុវត្តបាន។
កិច្ចប្រជុំនេះមានការចូលរួមដោយលោក ឈៀង យ៉ាណារ៉ា ទេសរដ្ឋមន្ត្រីទទួលបន្ទុកបេសកកម្មពិសេស និងជាអនុប្រធានទី២ នៃក្រុមប្រឹក្សាអភិវឌ្ឍន៍កម្ពុជា, លោក ប៊ិន ត្រឈៃ រដ្ឋមន្ត្រីក្រសួងផែនការ, លោក ចាន់ សុធី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ព្រមទាំងមន្ត្រីជាន់ខ្ពស់ និងមន្រ្តីបច្ចេកទេសនៃអគ្គលេខាធិការដ្ឋាន គ.យ.ប. និងក្រសួងពាក់ព័ន្ធ។
ឧបនាយករដ្ឋមន្ត្រីប្រចាំការ បានមានប្រសាសន៍ថា កិច្ចការវាយតម្លៃការអនុវត្តយុទ្ធសាស្រ្តបញ្ចកោណ ជាកិច្ចការស្នូលរបស់ គ.យ.ប. បន្ថែមពីលើកិច្ចការតាមដាន និងត្រួតពិនិត្យ ដែល គ.យ.ប. បានរៀបចំនិងបោះផ្សាយកន្លងមក ដូចជា របាយការណ៍តាមដាន និងត្រួតពិនិត្យការអនុវត្តយុទ្ធសាស្រ្តបញ្ចកោណ ដំណាក់កាលទី១ ប្រចាំឆ្នាំ២០២៤ និងប្រចាំឆមាសទី១ ឆ្នាំ២០២៥។ កិច្ចការវាយតម្លៃនេះ មានចរិតខុសគ្នាពីកិច្ចការតាមដាន និងត្រួតពិនិត្យ ដោយពិនិត្យលើវឌ្ឍនភាពនៃការអនុវត្តយុទ្ធសាស្រ្តបញ្ចកោណ ដែលផ្តោតសំខាន់លើទិដ្ឋភាពប្រសិទ្ធភាព ស័ក្តិសិទ្ធិភាព ចីរភាព និងបច្ច័យនៃការអនុវត្តកន្លងមក ព្រមទាំងផ្តល់នូវអនុសាសន៍ក្នុងការកែតម្រូវនានា ម្ខាងវិធានការអន្តរាគមន៍ឬគោលនយោបាយ ម្ខាងទៀតយន្តការអនុវត្តការងារ ។ល។ សំដៅជំរុញការអនុវត្តយុទ្ធសាស្រ្តបញ្ចកោណដំណាក់កាលទី១ ឱ្យសម្រេចបាននូវភាពជោគជ័យពេញលេញ។
ស្របជាមួយបរិការណ៍នៃការកើនឡើងនូវកម្តៅភូមិសាស្រ្តនយោបាយ និងការផ្លាស់ប្តូរអាទិភាពរបស់សកល និងតំបន់ដោយផ្លាស់ប្តូរពីការប្រកាន់ខ្ជាប់នូវគោលការណ៍ប្រសិទ្ធភាព (Efficiency) ទៅជាគោលការណ៍សន្តិសុខនិងភាពធន់ (Security and Resilience) ឯកឧត្ដមឧបនាយករដ្ឋមន្រ្តីប្រចាំការ បានលើកឡើងពីភាពចាំបាច់នៃកិច្ចការវាយតម្លៃដែលត្រូវរៀបចំធ្វើឡើងនេះ ដើម្បីផ្តល់ជាសារប្រយោជន៍ដល់រាជរដ្ឋាភិបាល ជាពិសេស សម្តេចធិបតីនាយករដ្ឋមន្រ្តី ក្នុងការគិតគូរតម្រង់ទិសការអនុវត្តយុទ្ធសាស្រ្តបញ្ចកោណ ដំណាក់កាលទី១ បន្ថែម ឱ្យស្របទៅនឹងការវិវឌ្ឍជាក់ស្តែងនៃព្រឹត្តិការណ៍សកល តំបន់ និងជាតម្រូវការផ្ទៃក្នុងប្រទេសពាក់ព័ន្ធជម្លោះព្រំដែននាពេលបច្ចុប្បន្ន។
ទន្ទឹមនេះ បន្ទាប់ពីបានពិនិត្យលើបទបង្ហាញរបស់ក្រុមការងារអគ្គលេខាធិការដ្ឋាន គ.យ.ប. លើគោលបំណង អភិក្រម និងវិធីសាស្រ្តវាយតម្លៃ ឯកឧត្ដមឧបនាយករដ្ឋមន្រ្តីប្រចាំការ បានធ្វើការកត់សម្គាល់ថាកិច្ចការវាយតម្លៃនេះ គឺមានវិសាលភាពធំ ដែលត្រូវទាមទារការចូលរួមពីគ្រប់ភាគីពាក់ព័ន្ធទាំងអស់ ដោយប្រើប្រាស់អភិក្រម «រៀនផង-ធ្វើផង» ទាំងអ្នកធ្វើនិងអ្នកចូលរួមទាំងអស់គ្នា ព្រមទាំងត្រូវមានការប្រើប្រាស់ព័ត៌មាន ទិន្នន័យ លទ្ធផលនៃការស្រាវជ្រាវ និងករណីសិក្សាជាច្រើន ក្នុងការវិភាគនិងវាយតម្លៃនូវវឌ្ឍនភាពនិងការខិតខំសម្រេចគោលដៅជាយុទ្ធសាស្រ្ត ទាំង ៥ ដែលបានកំណត់ក្នុងយុទ្ធសាស្រ្តបញ្ចកោណ ដំណាក់កាលទី១។
ឧបនាយករដ្ឋមន្រ្តីប្រចាំការ បានផ្តល់នូវការណែនាំ និងកំណត់នូវទិសដៅការងារវាយតម្លៃនេះ រួមមាន៖
ទី១៖ កិច្ចការវាយតម្លៃពាក់កណ្តាលអាណត្តិនេះ នឹងផ្តោតលើការវាយតម្លៃលើដំណើរការ (Process Evaluation) ដោយហេតុថាយុទ្ធសាស្រ្តបញ្ចកោណ ដំណាក់កាលទី១ ទើបតែបានអនុវត្តរយៈពេល ២ឆ្នាំ ដែលការណ៍នេះធ្វើឱ្យមូលដ្ឋានព័ត៌មាននិងទិន្នន័យនៅមានកម្រិត ក្នុងការវាយតម្លៃលើលទ្ធផលឬបច្ច័យ (Outcome or Impact Evaluation)
ទី២៖ វិសាលភាពនៃការវាយតម្លៃ ត្រូវផ្តោតលើគោលដៅជាយុទ្ធសាស្រ្តទាំង៥ ដែលបានកំណត់ក្នុងយុទ្ធសាស្រ្តបញ្ចកោណ ដំណាក់កាលទី១ ព្រមទាំងទិដ្ឋភាពសន្តិសុខជាតិ ខណៈដែលកម្រងសំណួរជាក់ស្តែងតាមផ្នែកនីមួយៗសម្រាប់ធ្វើការវាយតម្លៃ ត្រូវបន្តពិគ្រោះយោបល់និងកំណត់ជាមួយនឹងក្រសួង ស្ថាប័នពាក់ព័ន្ធនានា
ទី៣៖ ការវិភាគ និងវាយតម្លៃត្រូវប្រើប្រាស់ព័ត៌មាន និងទិន្នន័យដែលមានស្រាប់ពីគ្រប់ប្រភពទាំងអស់ រួមមាន សូចនាករសមិទ្ធកម្មគន្លឹះទាំង៣៩ ដែលបានកំណត់ក្នុងក្របខ័ណ្ឌតាមដាន ត្រួតពិនិត្យ និងវាយតម្លៃការអនុវត្តយុទ្ធសាស្រ្តបញ្ចកោណ ដំណាក់កាលទី១, របាយការណ៍តាមដាន ត្រួតពិនិត្យ និងវាយតម្លៃផ្សេងៗទៀតរបស់រាជរដ្ឋាភិបាល លើការអនុវត្តផែនការយុទ្ធសាស្រ្តអភិវឌ្ឍន៍ជាតិ និងផែនការអភិវឌ្ឍន៍តាមវិស័យនានា ព្រមទាំងប្រើប្រាស់បញ្ញាសិប្បនិមិត្មនិងបច្ចេកវិទ្យាក្នុងការគាំទ្រដល់ដំណើរការវិភាគនិងវាយតម្លៃផងដែរ
និងទី៤៖ គ្រប់ដំណើរការនៃកិច្ចការវាយតម្លៃនេះ ត្រូវធ្វើការឱ្យបានជិតស្និទ្ធិជាមួយនឹងក្រសួងផែនការ ព្រមទាំងត្រូវមានសមាសភាពក្រុមការងារតាមដាន និងត្រួតពិនិត្យ និងក្រុមការងារគោលនយោបាយប្រចាំក្រសួង ពីគ្រប់ក្រសួង ស្ថាប័នពាក់ព័ន្ធទាំងអស់ ដើម្បីធានាឱ្យបាននូវគុណភាពនិងភាពគ្រប់ជ្រុងជ្រោយនៃឯកសារវាយតម្លៃពាក់កណ្តាល អាណត្តិនៃការអនុវត្តយុទ្ធសាស្ត្របញ្ចកោណ ដំណាក់កាលទី១នេះ៕
