(ប៉ៃលិន)៖ ឯកឧត្តម អ៊ី ឈាន ទេសរដ្ឋមន្ត្រី ទទួលបន្ទុកបេសកកម្មពិសេស និងជាប្រធានក្រុមការងាររាជរដ្ឋាភិបាល ចុះមូលដ្ឋានខេត្តប៉ៃលិន នៅព្រឹកថ្ងៃទី២០ ខែមករា ឆ្នាំ២០២៦ បានអញ្ជើញប្រគល់ម៉ូតូថ្មីចំនួន ៨គ្រឿង ដែលជាការចំណាយ ថវិកាផ្ទាល់របស់លោកផ្តល់ជូនសមត្ថកិច្ចពាក់ព័ន្ធ ក្នុងការចុះល្បាត ធានាសន្តិសុខ សណ្ដាប់ធ្នាប់ និងសុវត្ថិភាពមូលដ្ឋាននៅក្នុងខេត្តប៉ៃលិន។
ឯកឧត្តមទេសរដ្ឋមន្ត្រី អ៊ី ឈាន បានថ្លែងថា ការការពារ និងថែរក្សាសន្តិសុខ សណ្ដាប់ធ្នាប់នៅក្នុងមូលដ្ឋានពិតជាតម្លៃ និងមានសារៈសំខាន់ ដែលអាចធ្វើឲ្យប្រជាជនមានភាពកក់ក្តៅ និងមើលឃើញថាគ្រប់ៗគ្នាមានុវត្ថិភាព។ មធ្យោបាយនេះនឹងផ្តល់ភាពងាយស្រួលសម្រាប់សមត្ថកិច្ច ក្នុងការបំពេញបេសកកម្ម ចុះល្បាតគ្រប់បានគ្រប់ទីកន្លែង គ្រប់ច្រកល្ហកដោយគ្មានឧបសគ្គ។
ឯកឧត្តមទេសរដ្ឋមន្ត្រី អ៊ី ឈាន បានបន្តថា បច្ចុប្បន្ននេះ ខេត្តប៉ៃលិនរបស់យើងមានការអភិវឌ្ឍន៍ប្រែប្រួល រីកចម្រើនគួរគាត់សម្គាល់ ទាំងហេដ្ឋារចនាសម្ព័ន្ធរូបវ័ន្ត លើគ្រប់ផ្នែកគ្រប់វិស័យ ដូច្នេះការចូលរួមអនុវត្តនូវគោលនយោបាយភូមិ ឃុំមានសុវត្ថិភាពរបស់សមត្ថកិច្ចពាក់ព័ន្ធ ត្រូវបន្តសកម្មភាពចុះល្បាត និងត្រួតពិនិត្យជាអចិន្ត្រៃយ៍ ត្រូវធ្វើដូចភ្លៀងរលឹម ក៏ដូចជាការគាត់សម្គាល់នូវមុខសញ្ញានានាដែលបង្កអសន្តិសុខ នៅតាមទីសាធារណៈ ក៏ដូចជានៅគ្រប់មូលដ្ឋាន ព្រមទាំងការបង្ក្រាបឱ្យបានទាន់ពេលវេលា។
ម៉ូតូដែលបានប្រគល់ជូនសមត្ថកិច្ចទាំង ៨គ្រឿង គឺជាប្រភេទម៉ូតូម៉ាក យ៉ាម៉ាហា ភីស៊ី១ ដែលមានកម្លាំង ១២៥សេសេ ដោយក្នុងនោះបានប្រគល់ជូនបញ្ជាការដ្ឋានកងរាជអាវុធហត្ថខេត្តចំនួន ២គ្រឿង អធិការនគរបាលក្រុងប៉ៃលិន ៣គ្រឿង និងអធិការស្រុកសាលាក្រៅចំនួន ៣គ្រឿង៕
