កម្ពុជា និងសិង្ហបុរី បន្តចុះអនុស្សារណៈយោគយល់គ្នា (MoU) ដើម្បីពង្រីកកិច្ចសហប្រតិបត្តិការលើការអភិវឌ្ឍហេដ្ឋារចនាសម្ព័ន្ធប្រកបដោយចីរភាព។ MoU នេះ បានធ្វើឡើងតាមរយៈក្រសួងសេដ្ឋកិច្ច និងហិរញ្ញវត្ថុរបស់កម្ពុជា ជាមួយស្ថាប័នហេដ្ឋារចនាសម្ព័ន្ធអាស៊ី របស់សិង្ហបុរី។
ពិធីចុះហត្ថលេខាលើ MoU នេះ បានធ្វើឡើងនៅថ្ងៃទី៣០ ខែមករា ឆ្នាំ២០២៦ នៅទីស្តីការក្រសួងសេដ្ឋកិច្ច និងហិរញ្ញវត្ថុ រវាងលោក មាស សុខសេនសាន រដ្ឋលេខាធិការ និង ជាតំណាងអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្ត្រីក្រសួងសេដ្ឋកិច្ច និង ហិរញ្ញវត្ថុ ជាមួយលោក Lavan Thiru នាយកប្រតិបត្តិ នៃស្ថាប័នហេដ្ឋារចនាសម្ព័ន្ធអាស៊ី របស់សិង្ហបុរី។
ផ្អែកតាមក្របខណ្ឌនៃ MoU ថ្មីនេះ, ភាគីទាំងពីរនឹងបន្តកិច្ចសហការលើការពង្រឹងដល់ការរៀបចំរចនាសម្ព័ន្ធ និងការអនុវត្តគម្រោងហេដ្ឋារចនាសម្ព័ន្ធ, សម្របសម្រួលទំនាក់ទំនងរវាងភាគីពាក់ព័ន្ធគន្លឹះ, ជំរុញការអភិវឌ្ឍសមត្ថភាព និងការជំរុញវិនិយោគឯកជនសម្រាប់គាំទ្រដល់ការអភិវឌ្ឍរបស់កម្ពុជា។
កិច្ចសហប្រតិបត្តិការនេះ នឹងផ្តោតសំខាន់ទៅលើវិស័យអាទិភាពរបស់កម្ពុជា រួមមាន ថាមពលកកើតឡើងវិញ ទឹកស្អាត ការគ្រប់គ្រងសំណល់ ការដឹកជញ្ជូន និងភស្តុភារកម្ម ព្រមទាំងពង្រីកទៅកាន់វិស័យមានសក្ដានុពលផ្សេងទៀតផងដែរ។
នៅក្នុងពិធីនោះ លោក មាស សុខសេនសាន បានគូសរំលេចថា ហេដ្ឋារចនាសម្ព័ន្ធដែលមានគុណភាព គឺជាអភិក្រមគន្លឹះមួយ ដើម្បីជំរុញភាពប្រកួតប្រជែង ពាណិជ្ជកម្ម និងជីវភាពរស់នៅរបស់ប្រជាជនកម្ពុជា។ ក្នុងនោះ យន្តការភាពជាដៃគូរវាងរដ្ឋ និងឯកជន នឹងដើរតួយ៉ាងសំខាន់ក្នុងការទាក់ទាញទុនវិនិយោគឯកជន ដែលមានការគាំទ្រដោយក្របខណ្ឌច្បាប់ និងនីតិវិធីគ្រប់គ្រងប្រតិបត្តិការរួមសម្រាប់គម្រោងភាពជាដៃគូរវាងរដ្ឋ និង ឯកជន ស្របតាមឧត្តមានុវត្តន៍អន្តរជាតិ។
លោករដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានបន្តថា តាមរយៈ MoU ថ្មីនេះ ភាគីទាំងពីរនឹងបន្តកិច្ចសហប្រតិបត្តិការរវាងគ្នា ក្នុងការជំរុញការអភិវឌ្ឍគម្រោងហេដ្ឋារចនាសម្ព័ន្ធដែលអាចទទួលបានហិរញ្ញប្បទាន ក្នុងទិសដៅទាក់ទាញដៃគូវិនិយោគិនសក្តានុពល ដើម្បីគាំទ្រដល់ការអភិវឌ្ឍលើវិស័យអាទិភាពរបស់កម្ពុជា។
លោក មាស សុខសេនសាន បានថ្លែងអំណរគុណចំពោះស្ថាប័នហេដ្ឋារចនាសម្ព័ន្ធអាស៊ី សម្រាប់កិច្ចសហប្រតិបត្តិការយ៉ាងជិតស្និទ្ធិក្នុងក្របខណ្ឌនៃ MoU ថ្មីនេះ ដែលជាការឆ្លុះបញ្ចាំងពីភាពជាដៃគូយូរអង្វែងរវាងកម្ពុជា និងសិង្ហបុរី ក៏ដូចជាបង្ហាញអំពីការប្តេជ្ញាចិត្តរួមគ្នា ក្នុងការជំរុញហេដ្ឋារចនាសម្ព័ន្ធដែលមានគុណភាព បរិយាប័ន្ន និងចីរភាពនៅកម្ពុជា។
សូមបញ្ជាក់ថា ចាប់តាំងពីការចុះហត្ថលេខា MoU លើកដំបូងកាលពីឆ្នាំ២០១៩ មកដល់បច្ចុប្បន្ននេះ ក្រសួងសេដ្ឋកិច្ច និងហិរញ្ញវត្ថុ និងស្ថាប័នហេដ្ឋារចនាសម្ព័ន្ធអាស៊ី បានសហការគ្នាយ៉ាងជិតស្និទ្ធិ ដើម្បីគាំទ្រដល់របៀបវារៈនៃការអភិវឌ្ឍហេដ្ឋារចនាសម្ព័ន្ធ ការកសាងសមត្ថភាព និង ការដាក់បង្ហាញអំពីកាលានុវត្តភាពសម្រាប់ការវិនិយោគនៅកម្ពុជា៕
