អភិបាលខេត្តស្វាយរៀង បានអញ្ជើញធ្វើបទបង្ហាញស្តីពី ផែនការរៀបចំដែនដី ប្លង់គោលប្រើប្រាស់ដី និងផែនការប្រើប្រាស់ដីនៅរដ្ឋបាលថ្នាក់ក្រោមជាតិ

ឯកឧត្តម ប៉េង ពោធិ៍សា បានមានប្រសាសន៍លើកឡើងថាផែនការរៀបចំដែនដីថ្នាក់ខេត្ត គឺជាក្របខណ្ឌរៀបចំ ដែនដី ដើម្បីដោះស្រាយការអភិវឌ្ឍន៍រួម របស់ខេត្ត។ ផែនការនេះពណ៌នា វិភាគអំពីស្ថានភាពបច្ចុប្បន្ននៅ ក្នុងខេត្ត ពិនិត្យមើលនិន្នាការ និងឱកាសនៃការអភិវឌ្ឍនាពេលអនាគតជាផែនការពហុវិស័យដែល ទាក់ទងនឹងទិដ្ឋភាពសំខាន់ៗនៃបរិស្ថាន ហេដ្ឋារចនា សម្ព័ន្ធ ទីក្រុង ជនបទ សកម្មភាពសង្គម និងសេដ្ឋកិច្ចពីទស្សនៈនៃការរៀបចំដែនដី ដើម្បីជាមូលដ្ឋានក្នុង ការកសាងទិន្នន័យអំពីការគ្រប់គ្រងប្រើប្រាស់ដី ដើម្បីជាមូលដ្ឋានច្បាស់លាស់ក្នុងការរៀចំផែនការប្រើប្រាស់ដី និងបែងចែកឱ្យបានត្រឹមត្រូវ ចៀសវាងការប្រើប្រាស់ដីមិនចំសក្តានុពល សំដៅរក្សានូវចីរភាព បរិស្ថាន និងការអភិវឌ្ឍសេដ្ឋកិច្ច។

ក្នុងនោះ ឯកឧត្តម អភិបាលខេត្ត បានបង្ហាញអំពីផែនការរៀបចំដែនដីខេត្ត រួមមានយុទ្ធសាស្ត្រ អនុយុទ្ធសាស្ត្រ និងសកម្មភាពក្រោមគោលដៅរួមចំនួន៥ គឺ៖

ទី១៖ពង្រឹងមូលដ្ឋានសេដ្ឋកិច្ច និងលើកកំពស់តួនាទីរបស់ខេត្តក្នុងការអភិវឌ្ឍជាតិ

ទី២៖ការពារបរិស្ថានធម្មជាតិ និងជីវចម្រុះ

ទី៣៖បរិស្ថានទីក្រុងមានភាពប្រសើរឡើង

ទី៤៖លើកកម្ពស់លទ្ធភាពទទួលបានសេវាចំពោះប្រជាពលរដ្ឋគ្រប់រូប

ទី៥៖កែលម្អគុណភាព និងការគ្របដណ្តប់នៃហេដ្ឋារចនាសម្ព័ន្ធ។ ប្រើប្រាស់គោលនយោបាយ អាទិភាពខ្ពស់។ ពិចារណាពីផលប៉ះពាល់នៃការប្រែប្រួលអាកាសធាតុនៅក្នុងការ សម្រេចចិត្តអភិវឌ្ឍន៍គ្រប់យ៉ាង។

ឯកឧត្តម បានបញ្ជាក់បន្ថែមថា ចំពោះប្លង់គោលប្រើប្រាស់ដី បានបញ្ចប់និងបានអនុម័តដាក់ឱ្យប្រើប្រាស់ នៅថ្ងៃទី១៩ ខែធ្នូ ឆ្នាំ២០១៩ ក្រោយរយៈ ពេល៥ឆ្នាំនៃការដាក់ឱ្យប្រើប្រាស់ប្លង់គោល ប្រើប្រាស់ដីក្រុងបាវិត ត្រូវបានក្រុមការងារ ធនាគារ អភិវឌ្ឍន៍អាស៊ីហៅកាត់ថា (ADB) បានសហការជាមួយក្រុមការងារបច្ចេកទេស ក្រសួងរៀបចំដែនដីធ្វើបច្ចុប្បន្នភាព និងបានបញ្ចប់សេចក្តីព្រៀងប្លង់គោលប្រើប្រាស់ដី និងត្រៀមស្នើរសុំការអនុម័តពីក្រុមប្រឹក្សាខេត្ត។

ជាងនេះទៅទៀត ឯកឧត្តមអភិបាលខេត្ត ក៏បានបញ្ជាក់បន្ថែមអំពីផែនការប្រើប្រាស់ដីនៅរដ្ឋបាលថ្នាក់ក្រោមជាតិ ដោយត្រូវបានធ្វើឡើងនៅក្នុងសង្កាត់អាទិភាពចំនួន៥ មាន ផែនការប្រើប្រាស់ដី សង្កាត់សង្ឃរ ក្រុងស្វាយរៀង ក្នុងឆ្នាំ២០២១ ផែនការប្រើប្រាស់ដី ឃុំស្វាយជ្រំ ស្រុកស្វាយជ្រំ ក្នុងឆ្នាំ២០២៣ ផែនការប្រើប្រាស់ដី ឃុំកណ្តៀងរាយ ស្រុកស្វាយទាប ក្នុងឆ្នាំ២០២៣ ផែនការប្រើប្រាស់ដី ឃុំកំពង់ចក ស្រុករំដួល ក្នុងឆ្នាំ២០២៤ ផែនការប្រើប្រាស់ដី ឃុំមេសរថ្ងក ស្រុកចន្ទ្រា ក្នុងឆ្នាំ២០២៥ ។

បន្ថែមលើនេះទៀត ឯកឧត្តមក៏បានបញ្ជាក់អំពីទិសដៅការងារបន្តមួយចំនួនផងដែរដោយនៅក្នុងនោះ គណៈកម្មការរៀបចំដែនដីថ្នាក់ខេត្ត នឹងអនុវត្តន៍បន្ត លើការងារ ជ្រើសរើសឃុំ សង្កាត់ អាទិភាព នៅតាមបណ្តា ក្រុង ស្រុក លើការងារផែនការប្រើប្រាស់ដីថ្នាក់ឃុំ សង្កាត់។

គណៈកម្មការរៀបចំដែនដីថ្នាក់ខេត្ត និងបន្តរៀបចំប្លង់ គោលប្រើប្រាស់ដី នៅគ្រប់ក្រុង/ស្រុក ទូទាំងខេត្តដើម្បីជាឧត្តមប្រយោជន៍ដល់ថ្នាក់មូលដ្ឋាន។

ជំរុញការបោះបង្គោលព្រំដីរបស់រដ្ឋឱ្យបានច្បាស់លាស់ ដើម្បីកាត់បន្ថយការរុករានទន្ទ្រានកាន់កាប់ដីរដ្ឋ។

សហការជាមួយក្រសួងស្ថាប័នពាក់ព័ន្ធ ដើម្បីជំរុញការរៀបចំកសាង ផែនការប្រើប្រាស់ដីថ្នាក់ឃុំ/សង្កាត់អត្ថិភាពនៅថ្នាក់ក្រោមជាតិ ស្របតាមគោលការណ៍របស់រាជរដ្ឋាភិបាល នីតិកាលទី៧ នៃរដ្ឋសភា។