(ភ្នំពេញ)៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានច្រានចោលនូវការលើកឡើងមួយចំនួន ដែលចោទប្រកាន់ថា រាជរដ្ឋាភិបាលកម្ពុជាបានបិទសិទ្ធិ ឬរឹតត្បិតសកម្មភាពរបស់អង្គការសង្គមស៊ីវិល។ ការថ្លែងច្រានចោលរបស់សម្ដេចបានធ្វើឡើងនៅក្នុងឱកាសដែលសម្ដេច អញ្ជើញជាអធិបតីដ៏ខ្ពង់ខ្ពស់ក្នុងពិធីអបអរសាទរខួបលើកទី៣០ឆ្នាំ នៃអង្គការដើម្បីភាពញញឹមនៃកុមារ PSE និងប្រគល់សញ្ញាបត្រជូនដល់សិស្ស-និស្សិតចំនួន ៥០០នាក់ សម្រាប់ឆ្នាំសិក្សា២០២១-២០២៤ នៅព្រឹកថ្ងៃទី២ ខែកក្កដា ឆ្នាំ២០២៦ ។
នៅក្នុងការច្រានចោលការចោទប្រកាន់មកលើរដ្ឋាភិបាលបែបនេះ សម្ដេចបវរធិបតី បានសង្កត់ធ្ងន់ថា ផ្ទុយទៅវិញ រាជរដ្ឋាភិបាលតែងតែបើកទូលាយ និងគាំទ្រយ៉ាងពេញទំហឹងចំពោះអង្គការសង្គមស៊ីវិលណា ដែលពិតជាបានបំពេញការងាររបស់ខ្លួនប្រកបដោយតម្លាភាព ស្មោះត្រង់ និងមានប្រសិទ្ធភាព ដើម្បីផលប្រយោជន៍ប្រជាពលរដ្ឋ និងការអភិវឌ្ឍសង្គមជាតិ ជាពិសេសលើការបណ្ដុះបណ្ដាលធនធានមនុស្ស។ តួយ៉ាងដូចជាអង្គការ PSE បានទទួលការគាំទ្រពីរដ្ឋាភិកបាលយ៉ាងខ្លាំង ព្រោះបាននិងកំពុងដើរតួនាទីយ៉ាងសំខាន់ក្នុងការជួយសង្គ្រោះ កុមារក្រីក្រ និងផ្ដល់ឱកាសអប់រំ បណ្ដុះបណ្ដាលវិជ្ជាជីវៈ ព្រមទាំងការងារសមរម្យដល់យុវជនកម្ពុជាអស់រយៈពេលបីទសវត្សរ៍មកហើយ។
សម្ដេចបវរធិបតី ហ៊ុន ម៉ាណែត បានថ្លែងយ៉ាងដូច្នេះថា៖ «មានការយល់ច្រឡំជាពិសេសការលើកឡើងក្នុងបណ្ដាសារព័ត៌មានមួយចំនួន ចោទថារដ្ឋាភិបាលមិនលើកទឹកចិត្ត ដល់អង្គការសង្គមស៊ីវិល បិទសេរីភាព បិទស្អីៗមិនឲ្យគេធ្វើការ។ អត់ទេ! រឿងអង្គមួយក្ដាប់តូច រឿងបញ្ចេញមតិ រឿងអីណា ជារឿងមួយ ធ្វើសកម្មភាពនៅក្នុងច្បាប់ ប៉ុន្តែយើងមាន៣,០០០សមាគមន៍ ៣,៥០០ NGO ៦,០០០ជាងដែលធ្វើការនៅទូទាំងប្រទេសដែលបានចុះឈ្មោះ មួយចំនួនបានបិទហើយរាប់ពាន់ NGO សង្គមស៊ីវិល ដែលជាដៃគូរដ៏ល្អរបស់រដ្ឋាភិបាល។ ដៃគូបែបនេះ រដ្ឋាភិបាលមានទៅបិទសិទ្ធិអី? មានតែសូមជួយឲ្យថែមទៀត ជួយឲ្យរីកចម្រើនថែមទៀត ព្រោះធ្វើពិតប្រាកដ»។
ជាមួយគ្នានេះសម្ដេចបានចោទជាសំណួរថា៖ «តើអង្គការ PSE ដែលធ្វើការអប់រំបណ្ដុះបណ្ដាល អត់មានតម្លៃស្មើនឹងអង្គការមួយ ដែលជ្រកក្រោមស្លាក ហើយទៅស្រែករឿងនេះរឿងនោះទេ? អត់ទេ។ អង្គការសង្គមស៊ីវិល ដែលធ្វើការពិតប្រាកដ ផ្ដល់សិទ្ធិសេរីភាពដល់ពលរដ្ឋពិប្រាកដ។ តើសិទ្ធិសេរីភាពយើងចង់និយាយពីអ្វី? មិនមែនសិទ្ធិ សម្រាប់ឡើងជេ ឡើងបាតុកម្មទេ តែសិទ្ធិដើម្បីទទួលបានការអប់រំ អាហ្នឹងជាសិទ្ធិរបស់មនុស្ស។ សិទ្ធិទទួលបានការថែទាំសុខភាព សិទ្ធិរបស់មនុស្ស សិទ្ធិទទួលបានការថែទាំសុខមាលភាពផ្សេងៗ អានេះជាសិទ្ធិមនុស្ស។ សិទ្ធិមូលដ្ឋាន សិទ្ធិទទួលបានការអប់រំ សិទ្ធិទទួលបានការថែទាំសុខភាពត្រឹមត្រូវ។ នេះហើយជាអង្គការផ្ដល់សិទ្ធិមូលដ្ឋាន បណ្ដុះបណ្ដាលធនធានមនុស្ស ឲ្យមានសិទ្ធិសេរីភាព មានចំណេះដឹង គឺមានសេរីភាព»។
សម្រាប់សម្ដេចការអប់រំបណ្ដុះបណ្ដាល គឺជាការផ្ដល់នូវសិទ្ធិមូលដ្ឋានសម្រាប់ប្រជាពលរដ្ឋ នៅពេលប្រជាពលរដ្ឋមានចំណេះដឹង ប្រជាពលរដ្ឋនឹងមានសមត្ថភាពក្នុងការគិត ការប្រកបរបរចិញ្ចឹមជីវិតបានដោយឯករាជ្យ និងអាចរៀបចំផែនការអនាគតរបស់ខ្លួនបាន មិនមែនគ្រាន់តែជាសិទ្ធិដែលនិយាយកាន់ក្បាលមេក្រូរឿងផ្សេងៗនោះទេ។ ជាមួយគ្នានេះ សម្ដេចក៏បានប្រកាសស្វាគមន៍រាល់អង្គការសង្គមស៊ីវិលទាំងឡាយណា ដែលធ្វើការពិតប្រាកដ ជាពិសេសលើការបណ្ដុះបណ្ដាលធនធានមនុស្ស ដូចជាអង្គការ PSE នេះជាដើម។
ជាងនេះទៅទៀត សម្ដេចមហាបវរធិបតី ហ៊ុន ម៉ាណែត បានអំពាវនាវដល់អង្គការសង្គមស៊ីវិលទាំងអស់ ឲ្យបន្តពង្រឹងកិច្ចសហប្រតិបត្តិការជាមួយរាជរដ្ឋាភិបាល និងដៃគូពាក់ព័ន្ធនានា ដើម្បីរួមចំណែកដោះស្រាយបញ្ហាសង្គម និងជំរុញការអភិវឌ្ឍប្រទេសជាតិឲ្យកាន់តែរីកចម្រើន។ សម្ដេចធិបតីបានបញ្ជាក់ថា រាជរដ្ឋាភិបាលតែងតែស្វាគមន៍រាល់កិច្ចខិតខំប្រឹងប្រែងប្រកបដោយសុចរិតភាព និងស្ថាបនាពីគ្រប់ភាគីទាំងអស់ ដើម្បីកសាងសង្គមកម្ពុជាមួយដែលកាន់តែប្រសើរឡើង៕
