(រាជធានីភ្នំពេញ)៖ នារសៀលថ្ងៃទី៧ ខែកក្កដា ឆ្នាំ២០២៦ នៅទីស្ដីការក្រសួង ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានទទួលជួបសម្ដែងការគួរសម និងពិភាក្សាការងារជាមួយឯកឧត្តម Sonexay Vannaxay ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋប្រជាធិបតេយ្យប្រជាមានិតឡាវប្រចាំព្រះរាជាណាចក្រកម្ពុជា និងសហការី ដោយមានការចូលរួមពីសំណាក់ឯកឧត្តម លោកជំទាវ ថ្នាក់ដឹកនាំក្រសួងអប់រំ យុវជន និងកីឡា និងមន្ត្រីពាក់ព័ន្ធក្រោមឱវាទ។
ក្នុងឱកាសនេះ ឯកឧត្តមឯកអគ្គរដ្ឋទូតឡាវប្រចាំកម្ពុជា បានបង្ហាញសេចក្ដីរីករាយដែលបានមកបំពេញភារកិច្ចការងារនៅកម្ពុជា និងបានវាយតម្លៃខ្ពស់ចំពោះភាពរីកចម្រើនលើគ្រប់វិស័យរបស់កម្ពុជា ជាពិសេសវឌ្ឍនភាពនៃកំណែទម្រង់វិស័យអប់រំ ក្រោមការដឹកនាំដ៏ឈ្លាសវៃរបស់ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី និងយុទ្ធសាស្ត្រអភិវឌ្ឍធនធានមនុស្សប្រកបដោយជំនាញឌីជីថលរបស់រាជរដ្ឋាភិបាលកម្ពុជា។
ជាមួយគ្នានេះ ឯកឧត្តមឯកអគ្គរដ្ឋទូតឡាវប្រចាំកម្ពុជា បានថ្លែងអំណរគុណយ៉ាងជ្រាលជ្រៅដល់ក្រសួងអប់រំ យុវជន និងកីឡា ដែលបានយកចិត្តទុកដាក់ចំពោះនិស្សិតឡាវដែលកំពុងសិក្សានៅភ្នំពេញ ទាំងលើការផ្ដល់អាហារូបករណ៍ និងកិច្ចសម្រួលការស្នាក់នៅនានា។ ដោយផ្អែកលើចំណងមិត្តភាព វប្បធម៌ និងប្រពៃណីដ៏រឹងមាំដែលមានស្រាប់ ប្រទេសឡាវក៏កំពុងមានទិសដៅស្រដៀងគ្នានេះក្នុងការបង្កើនគុណភាពអប់រំ ដើម្បីកសាងមូលធនមនុស្សប្រកបដោយសក្ដានុពលឆ្លើយតបនឹងតម្រូវការទីផ្សារការងារជាតិ ក្នុងតំបន់ និងអន្តរជាតិ។
បន្ថែមលើនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានបង្ហាញនូវការប្ដេជ្ញាចិត្តយ៉ាងមុតមាំក្នុងការបន្តពង្រឹង និងពង្រីកកិច្ចសហប្រតិបត្តិការទ្វេភាគីលើវិស័យអប់រំ យុវជន និងកីឡាឱ្យកាន់តែស៊ីជម្រៅ ដោយនឹងមានការពិនិត្យ និងរៀបចំឡើងនូវអនុស្សរណៈនៃការយោគយល់គ្នា (MoU) ដើម្បីពង្រីកកូតាអាហារូបករណ៍ កម្មវិធីផ្លាស់ប្ដូរវប្បធម៌យុវជន និងការអភិវឌ្ឍវិស័យកីឡា។
ក្នុងន័យនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី ជឿជាក់ថា ការរួមគ្នាបណ្ដុះបណ្ដាល និងគាំទ្រយុវជនជំនាន់ក្រោយនេះ នឹងក្លាយជាគ្រឹះដ៏រឹងមាំក្នុងការបន្តថែរក្សាចំណងមិត្តភាពជាប្រពៃណី និងភាពជាដៃគូយុទ្ធសាស្ត្រគ្រប់ជ្រុងជ្រោយរវាងកម្ពុជា-ឡាវ ឱ្យកាន់តែរឹងមាំ និងស្ថិតស្ថេរជានិរន្តរ៍៕
