(កំពង់ចាម) ដើម្បីលើកស្ទួយវិស័យកីឡាដែលជាវិស័យស្នូល និងមានតួយ៉ាងសំខាន់ក្នុងការពង្រឹងសុខភាពទាំងផ្លូវកាយ ផ្លូវចិត្តឲ្យរឹងមាំ ការលើកកម្ពស់គុណភាពជីវិត និងសុភមង្គលក្នុងក្រុមគ្រួសារ ក៏ដូចជាការលប់បំបាត់ការប្រើប្រាស់គ្រឿងញៀន និងក្មេងទំនើងជាដើម នៅព្រឹកថ្ងៃទី១០ ខែកក្កដា ឆ្នាំ២០២៦ នេះ ឯកឧត្តម អ៊ុន ចាន់ដា អភិបាលខេត្តកំពង់ចាម បានអញ្ជើញជាអធិបតីក្នុងពិធីបើកការប្រកួតកីឡាមហាជន ពានរង្វាន់ ឯកឧត្តម អ៊ុន ចាន់ដា អភិបាលខេត្តកំពង់ចាម ថ្នាក់ខេត្ត ឆ្នាំ២០២៦ ស្ថិតនៅពហុកីឡដ្ឋានបាលទះ សាលាខេត្តកំពង់ចាម។
ក្នុងឱកាសនោះ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានថ្លែងថា កីឡាពិតជាបានរួមចំណែកដ៏សំខាន់ដល់ការពង្រឹងរាងកាយឱ្យមានភាពរឹងមាំ និងលើកកម្ពស់ និងជាកត្តាកំណត់ដ៏សំខាន់នៃផលិតភាព ពលកម្ម និងសុខភាពល្អដែលជាទ្រព្យសម្បត្តិដ៏ប្រពៃ ការកសាងមូលធនមនុស្សសម្រាប់ដំណើរការអភិវឌ្ឍសេដ្ឋកិច្ច និងសង្គមជាតិ ប្រកបដោយភាពធន់ និងចីរភាព។
ស្ថិតនៅក្នុងឱកាសនោះដែរ ឯកឧត្តមអភិបាលខេត្តកំពង់ចាម បានផ្តាំផ្ញើរដល់ក្រុមកីឡាករ កីឡារនី យុវជន យុវនារី និងសិស្សានុសិស្សទាំងអស់យកពេលវេលាពីការសិក្សា ចូលរួមលេងកីឡាឱ្យបានគ្រប់ៗគ្នា ជៀសវាងការប្រើប្រាស់គ្រឿងញៀន លប់បំបាត់ក្មេងទំនើង និងអំពើអបាយមុខទាំងឡាយ ដើម្បីរក្សាបាននូវភាព សុខដុមរមនា ដល់ប្រជាជាតិទាំងមូល៕
