ឯកឧត្តមបណ្ឌិត ហ៊ឺ វីរៈ អញ្ជើញប្រគេនទៀនចំណាំព្រះវស្សា និងទេយ្យវត្ថុមួយចំនួនដល់ព្រះសង្ឃដែលនឹងត្រូវគង់ចាំព្រះវស្សាអស់កាលត្រីមាសចំនួន ២វត្ត នៅក្នុងខេត្តកោះកុង

ពិធីប្រគេនទៀនចំណាំព្រះវស្សានេះ ធ្វើឡើងទៅតាមគន្លងប្រពៃណីព្រះពុទ្ធសាសនា ដែលជាសាសនារបស់រដ្ឋ ក្នុងគោលបំណងជួយទ្រទ្រង់នូវចតុបច្ច័យ និងជីវភាពរបស់ព្រះសង្ឃក្នុងអំឡុងពេលគង់ចាំព្រះវស្សាអស់កាលត្រីមាស (រយៈពេល៣ខែ) ដែលជារដូវមានភ្លៀងធ្លាក់ញឹកញាប់ បង្កការលំបាកដល់ព្រះសង្ឃក្នុងការនិមន្តបិណ្ឌបាត ជាពិសេសវត្តអារាមដែលស្ថិតនៅតំបន់ដាច់ស្រយាល និងអត្តខាត់។

ការប្រគេនទៀនចំណាំព្រះវស្សា មិនត្រឹមតែជាការបូជាគ្រឿងសក្ការៈថ្វាយចំពោះព្រះរតនត្រ័យ និងជួយបំភ្លឺដល់ការសិក្សាធម៌វិន័យរបស់ព្រះសង្ឃប៉ុណ្ណោះទេ ប៉ុន្តែថែមទាំងនាំមកនូវ «អានិសង្សយ៉ាងធំធេង» ដល់ពុទ្ធបរិស័ទអ្នកមានសទ្ធាជ្រះថ្លាផងដែរ។ តាមជំនឿព្រះពុទ្ធសាសនា តេជៈបារមីនៃការប្រគេនពន្លឺប្រទីប ឬទៀនវស្សានេះ នឹងជួយបំភ្លឺជីវិតឱ្យជួបតែពន្លឺបញ្ញាញាណ ភាពរុងរឿង ជម្រះអស់ភាពងងឹតអន្ធការ គ្រោះភ័យ និងឧបទ្រពចង្រៃទាំងឡាយនៅក្នុងចិត្ត និងក្នុងឆាកជីវិត ព្រមទាំងនាំមកនូវសេចក្តីសុខក្សេមក្សាន្ត សុខភាពល្អបរិបូរណ៍ និងភព្វសំណាងល្អដល់ក្រុមគ្រួសារ ទាំងក្នុងជាតិបច្ចុប្បន្ននិងជាតិខាងមុខ។ ចំពោះគ្រឿងទេយ្យទាន ដែលបាននាំយកទៅប្រគេនដល់ព្រះសង្ឃក្នុង ១វត្តៗ រួមមាន៖

-ទៀនវស្សា៖ ១គូ

-អង្ករ៖ ១០០ គីឡូក្រាម

-សាដក៖ ១

-គ្រឿងភេសជ្ជៈ៖ ទឹកសុទ្ធ ២កេស និងទឹកក្រូច ២កេស

-គ្រឿងឧបភោគបរិភោគ៖ មីជាតិ ២កេស, ត្រីខ ២យួរ, ទឹកត្រី ២យួរ, ទឹកស៊ីអ៊ីវ ២យួរ, ប្រេងឆា ១ដប, ស្ករស ១គីឡូក្រាម, តែ ១កញ្ចប់, កាហ្វេ ១កញ្ចប់

-គ្រឿងសក្ការៈ៖ ធូប ១ដុំ និងទៀនតូច ១ដុំ

-ព្រមទាំងបច្ច័យ (ថវិកា) មួយចំនួន សម្រាប់ចូលរួមចាប់មគ្គផលកសាងវត្តនីមួយៗផងដែរ។

ក្នុងឱកាសដ៏មានអត្ថន័យនោះ ឯកឧត្តមបណ្ឌិត និងក្រុមការងារ ព្រមទាំងអាជ្ញាធរមូលដ្ឋាន ក៏បានឧទ្ទិសកុសលផលបុណ្យដែលកើតពីសទ្ធាដ៏បរិសុទ្ធនេះ ជូនដល់បុព្វការីជន ញាតិការទាំងប្រាំពីរសន្តាន ជាពិសេសវីរកងទ័ពកម្ពុជាដែលបានពលីជីវិតដើម្បីការពារជាតិមាតុភូមិ និងបានបួងសួងសុំសេចក្ដីសុខ សេចក្ដីចម្រើន ជូនដល់ប្រជាពលរដ្ឋកម្ពុជាគ្រប់រូបឱ្យទទួលបាននូវព្រះពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ ជានិច្ចនិរន្តរ៍តរៀងទៅ។

«ប្រគេនទៀនវស្សា បំភ្លឺបញ្ញា ថែរក្សាប្រពៃណី នាំសិរីសួស្តីដល់គ្រួសារ»៕