ឯកឧត្តមបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុក រដ្ឋលេខាធិការដ្ឋានអាកាសចរស៊ីវិល នៅថ្ងៃទី៦ ខែឧសភា ឆ្នាំ២០២៤នេះ បានអញ្ជើញចុះហត្ថលេខា លើអនុស្សរណៈនៃការយោគយល់គ្នា ស្តីពីការស៊ើបអង្កេតគ្រោះថ្នាក់ និងឧប្បត្តិហេតុអាកាសយាន ជាមួយឯកឧត្តមបណ្ឌិត សឺចានតូ ចាចូណូ ប្រធានគណៈកម្មាធិការ ជាតិសុវត្ថិភាពដឹកជញ្ជូន ប្រទេសឥណ្ឌូនេស៉ី និងបើកវគ្គបណ្តុះបណ្តាល ស្តីពីការស៊ើបអង្កេតគ្រោះថ្នាក់អាកាសយាន។
ឯកឧត្តម ស៊ីន ចាន់សិរីវុត្ថា អនុរដ្ឋលេខាធិការ និងអ្នកនាំពាក្យអាកាសចរណ៍ស៊ីវិល បានបញ្ជាក់ថា ក្នុងពិធីនោះ ឯកឧត្តមបណ្ឌិត ម៉ៅ ហាវណ្ណាល់ បានរំលឹកពីប្រវត្តិទំនាក់ទំនងរវាងកម្ពុជា និងឥណ្ឌូនេស៊ី ដោយបានបង្កើតទំនាក់ទំនងការទូត នៅឆ្នាំ១៩៥៧។ ចាប់តាំងពីទំនាក់ទំនងការទូតត្រូវបានបង្កើតឡើង ឥណ្ឌូនេស៊ី គឺជាអ្នកគាំទ្រដ៏រឹងមាំនៃសន្តិភាព និងស្ថិរភាពនៅកម្ពុជា។
ឯកឧត្តមរដ្ឋមន្ត្រី បានបង្ហាញនូវសេចក្តីសោមនស្សរីករាយ ដែលបានចូលរួមចុះហត្ថលេខាលើអនុស្សរណៈនៃការយោគយល់គ្នា ស្តីពីការស៊ើបអង្កេតគ្រោះថ្នាក់ និងឧប្បត្តិហេតុអាកាសយាន រវាងរដ្ឋលេខាធិការដ្ឋានអាកាសចរស៊ីវិលកម្ពុជា និងគណៈកម្មាធិការ ជាតិសុវត្ថិភាពដឹកជញ្ជូន នៃសាធារណរដ្ឋឥណ្ឌូនេស៊ី។ កិច្ចសហការនេះបង្ហាញពីការប្តេជ្ញាចិត្តរួមគ្នា ក្នុងការលើកកម្ពស់សុវត្ថិភាពអាកាសចរណ៍ និងធានាការស៊ើបអង្កេតឱ្យបានហ្មត់ចត់ និងមានប្រសិទ្ធភាព ចំពោះគ្រោះថ្នាក់ និងឧប្បត្តិហេតុអាកាសយាន។
ឯកឧត្តមរដ្ឋមន្ត្រីបានថ្លែងថា ការផ្លាស់ប្តូរជំនាញ និងចំណេះដឹងរវាងប្រជាជាតិទាំងពីរ ពិតជា នឹងពង្រឹងសមត្ថភាពរបស់យើងក្នុងការធ្វើការស៊ើបអង្កេតយ៉ាងទូលំទូលាយ និងប្រកបដោយតម្លាភាព ដែលទីបំផុតរួមចំណែកដល់សុវត្ថិភាព និងសន្តិសុខនៃផ្ទៃមេឃរបស់ប្រទេសទាំងពីរ។
ឯកឧត្តមរដ្ឋមន្ត្រី ម៉ៅ ហាវណ្ណាល់ បន្តថា «ថ្ងៃនេះក៏ជាថ្ងៃចាប់ផ្តើមនៃការបណ្តុះបណ្តាល ស្តីពីការស៊ើបអង្កេតគ្រោះថ្នាក់អាកាសយាន ដែលធ្វើឡើងដោយអ្នកស៊ើបអង្កេតឥណ្ឌូនេស៊ីដែលមានបទពិសោធន៍។ ឱកាសបណ្តុះបណ្តាលនេះ គឺមានតម្លៃមិនអាចកាត់ថ្លៃបាន ព្រោះវានឹងបំពាក់ឱ្យអ្នកជំនាញអាកាសចរណ៍របស់យើង នូវបច្ចេកទេស និងជំនាញចាំបាច់ ដើម្បីដោះស្រាយប្រតិបត្តិការស៊ើបអង្កេតដ៏ស្មុគស្មាញ ច្បាស់លាស់ និងឧស្សាហ៍ព្យាយាម»។
ឯកឧត្តមសង្កត់ធ្ងន់ថា កម្មវិធីបណ្តុះបណ្តាលប្រកបដោយជោគជ័យ ដែលនឹងមិនត្រឹមតែផ្តល់ផលប្រយោជន៍ដល់ប្រទេសរៀងៗខ្លួនប៉ុណ្ណោះទេ ប៉ុន្តែថែមទាំងរួមចំណែកដល់ការជឿនលឿននៃស្តង់ដារសុវត្ថិភាពអាកាសចរណ៍ពិភពលោកផងដែរ៕
