នៅថ្ងៃទី៣០ ខែកក្កដា ឆ្នាំ២០២៥នេះ ឯកឧត្តម ប៉េង ពោធិ៍សា អភិបាល នៃគណៈអភិបាលខេត្តស្វាយរៀងបានដឹកនាំប្រតិភូខេត្តនាំយកអំណោយរបស់រដ្ឋបាលខេត្ត និងសប្បុរសជនឧត្ថម្ភដល់សមរភូមិមុខនៅទិសទី៣ និងកងពលតូចលេខ៦ និងបានបន្តដំណេីរនាំយកអំណោយនិងវិកាចុះសួសុខទុក្ខបងប្អូនប្រជាពលរដ្ឋដែលកំពុងស្នាក់នៅក្នុងទីតាំងជនភៀសខ្លួនស្ថិតនៅទីតាំងវត្តពុទ្ធិជោត មហាវ័ន្តតារៈតាប់ផ្តៅ ស្រុកចុងកាល់ ដែលទទួលបានការស្វាគមន៍យ៉ាងកក់ក្តៅពីសំណាក់ឯកឧត្តម មាន ចាន់យ៉ាដា អភិបាល នៃគណៈអភិបាលខេត្តឧត្តរមានជ័យព្រមទាំងមន្ត្រីពាក់ព័ន្ធផងដែរ។
ឯកឧត្តមអភិបាលខេត្តបានថ្លែងអំណរគុណយ៉ាងជ្រាលជ្រៅចំពោះទឹកចិត្ត ថ្នាក់ដឹកនាំ មន្ត្រីរាជការ ក្រុមហ៊ុន ព្រមទាំងបងប្អូនប្រជាពលរដ្ឋ និងសប្បុរសជនគ្រប់មជ្ឈដ្ឋាន ដែលបានចូលរួមចែករំលែកធនធានទៅតាមលទ្ធលភាពរៀងៗខ្លួន តាមរយៈរដ្ឋបាលខេត្តស្វាយរៀង ដេីម្បីឧបត្ថម្ភដល់វីរកងទ័ពជួរមុខ និងក្រុមគ្រួសារប្រជាពលរដ្ឋដែលកំពុងជម្លៀសចេញពីផ្ទះសម្បែងមករកទីកន្លែងសុវត្ថិភាព ដែលនេះពិតជាបានបង្ហាញពីសាមគ្គីភាពជាធ្លុងមួយក្នុងនាមខ្មែររួមឈាមតែមួយ។
សូមជម្រាបជូនថា អំណោយដែលរដ្ឋបាលខេត្តស្វាយរៀងបាននាំយកមកចែកជូននៅពេលនេះរួមមាន ៖ អង្ក ថ្នាំពេទ្យ មី ត្រីខកំប៉ុង ទឹកត្រី ទឹកស៊ីអៀវ ទឹកសុទ្ធ ទឹកក្រូច មី ភួយមុង សំលៀកបំពាក់ អំបុក សម្ភារប្រើប្រាស់ផ្សេងៗជាច្រេីនទៀត និងថវិកាផងដែរ។
