នារសៀលថ្ងៃទី០៧ ខែសីហា ឆ្នាំ២០២៥នេះ ឯកឧត្តម ប៉េង ពោធិ៍សា អភិបាលនៃគណៈអភិបាលខេត្តស្វាយរៀងតំណាងដ៏ខ្ពង់ខ្ពស់សម្តេចកិត្តិសង្គហបណ្ឌិត ម៉ែន សំអន ឧត្តមក្រុមប្រឹក្សាផ្ទាល់ព្រះមហាក្សត្រ និងជាអ្នកតំណាងរាស្ត្រមណ្ឌលស្វាយរៀង បានអញ្ជើញចុះសួរសុខទុក្ខ និងនាំយកអំណោយឧបត្ថម្ភដល់វីរកងទ័ពដែលរងរបួសឈ្មោះ ស៊ឹម វាស្នាបម្រេីការងារនៅទីបញ្ជាការកងវិស្វកម្មផ្អាវ ខេត្តកំពង់ចាម ឈជេីងនៅសមរភូមិប្រយុទ្ធទិសប្រាសាទតាមាន់ធំ ខេត្តឧត្តរមានជ័យ ក្នុងកំឡុងពេលសង្គ្រាមឈ្លានពានរបស់សៀម។
ក្រោយពីវះកាត់ និងការព្យាបាល រយៈពេលប៉ុន្មានថ្ងៃកន្លងមកនេះ សភាពជំងឺមានភាពធូស្រាលបន្តិច បច្ចុប្បន្នលោកបានសុំច្បាប់អង្គភាពមកលេងផ្ទះនៅស្រុកកំណេីតស្ថិតនៅភូមិក្រូច ឃុំជ្រុងពពេល ស្រុករំដួល ខេត្តស្វាយរៀង ។
នៅក្នុងពេលចុះសួសុខទុក្ខនេះដែរ ឯកឧត្តមអភិបាលបានសម្តែងនូវការគោរពកោតសរសើរម្តងហើយម្តងទៀតដល់វីរៈកងទ័ព ស៊ឹម វាស្នា និងដឹងគុណដល់វីរភាពកងទ័ពទាំងអស់ដែលបានរួមអាវុធ តស៊ូ លះបង់សាច់ស្រស់ ឈាមស្រស់ ដើម្បីបុព្វហេតុការពារបូរណៈភាពទឹកដី និងសេចក្តីសុខរបស់ប្រជាជនកម្ពុជា និងសម្តែងនូវអំណរគុណដល់ក្រុមគ្រូពេទ្យ បុគ្គលិកសុខាភិបាលទាំងអស់ ដែលកំពុងបំពេញតួនាទីជាកងទ័ពអាវសជួរក្រោយ ឈរលើស្មារតីសាមគ្គីភាព យកចិត្តទុកដាក់មិនរាថយ ថែទាំព្យាបាលអ្នកជំងឺគ្រប់ស្ថានការណ៍ ប្រកបដោយវិជ្ជាជីវៈ និងសេចក្តីស្រឡាញ់ អាណិតអាសូរ ជូនដល់វីរៈកងទ័ព និងប្រជាជនទូទៅរបស់យេីង។
ឯកឧត្តមបន្ថែមទៀតថា ជាការពិតណាស់ផលវិបាកនៃសង្គ្រាម បានបង្កមហន្តរាយ បំផ្លិចបំផ្លាញទ្រព្យសម្បត្តិ និងសោកនាដកម្ម ផ្តាច់ជីវិតមិនរើសមុខ ទាំងទាហាន និងជនស៊ីវិលស្លូតត្រង់ ហើយប្រជាពលរដ្ឋត្រូវបង្ខំចិត្តភៀសខ្លួន ចាកចេញពីផ្ទះសម្បែង ទ្រព្យសម្បត្តិ និងសត្វចិញ្ចឹមដែលមិនអាចយកមកជាមួយបាន ដែលទុក្ខលំបាកនេះធ្វើឱ្យយើងទាំងអស់គ្នាយល់យ៉ាងច្បាស់ពីតម្លៃនៃសន្តិភាព អរគុណសន្តិភាព។
ឯកឧត្តមអភិបាលខេត្តបាននាំមកនូវថវិការបស់សម្តេចកិត្តិសង្គហបណ្ឌិត ម៉ែន សំអន,ថវិកាលោកជំទាវបណ្ឌិតសភាចារ្យ ភឿង សកុណា,ថវិការដ្ឋបាលខេត្ត និងថវិកាចូលរួមឧប្ថម្ភរបស់មន្ទីរ/អង្គភាពនានាក្នុងខេត្តជូនដល់វីរកងទ័ព ស៉ឹម វាស្នា សរុបចំនួន ១១លានរៀល ព្រមទាំងគ្រឿងឧបភោគ បរិភោគមួយចំនួនទៀតផងដែរ៕
