ដោយមានការយកចិត្តទុកដាក់ពីសំណាក់ សម្ដេចព្រះមហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរព្រះប្រធានកិត្តិយសកាកបាទក្រហមកម្ពុជា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចង្អុលបង្ហាញនិងណែនាំដល់ ឯកឧត្តម មាន ចាន់យ៉ាដា អភិបាលខេត្តឧត្ដរមានជ័យ និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត ដឹកនាំក្រុមការងារ ប្រគេននូវទេយ្យវត្ថុជាគ្រឿងឧបភោគ បរិភោគ ដល់ព្រះសង្ឃចំនួន៤១អង្គស្មើរនឹង៤១វត្ត ដើម្បីចូលរួមចំណែកក្នុងវិស័យព្រះពុទ្ធសាសនា និងប្រគល់ម៉ូតូម៉ាក Honda Wave ឆ្នាំ២០២៥ចំនួន០៧គ្រឿង ខ្ទឹមសរចំនួន០២តោនដល់វីរកងទ័ពជួរមុខពិធីនេះប្រព្រឹត្តធ្វើឡើងនៅបរិវេណសាលាខេត្តផ្ទាល់ នៅរសៀលថ្ងៃទី២៣ ខែសីហា ឆ្នាំ២០២៥នេះ។
ឯកឧត្តម មាន ចាន់យ៉ាដា ក៏បានពាំនាំមកនូវការផ្តាំផ្ញើសាកសួសុខទុក្ខដ៏ខ្ពង់ខ្ពស់ពីសំណាក់ សម្ដេចព្រះមហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលជានិច្ចជាកាលសម្តេចទាំងទ្វេរ តែងតែយកចិត្តទុកដាក់ចំពោះសុខទុក្ខព្រះមេគុណខេត្ត ព្រះអនុគុណ ព្រះចៅអធិកាវត្ត រួមទាំងមន្រ្តីសង្ឈទូទាំងខេត្ត។
ចំពោះ ជនភៀសសឹក ដែលបានចាកចេញឆ្ងាយពីផ្ទះសម្បែងមកស្នាក់អាស្រ័យនៅតំបន់ទីទួលសុវត្ថិភាព សម្តេចទាំងទ្វេរ ក៏ផ្ដល់នូវភាពកក់ក្ដៅ និងការស្រឡាញ់ រាប់អាន អាណិតអាសូរ យ៉ាង ជ្រាលជ្រៅ បំផុត ជាពិសេសសម្តេចតែងតែយកចិត្តទុកដាក់ជានិច្ចចំពោះសុខុមាលភាពរបស់វីរៈកងទ័ពនិងក្រុមគ្រួសារ ដែលមានឪពុក មានកូន បងប្អូន ដែលឈរជើងការពារបូរណភាពទឹកនៅតាមបន្ទាត់ព្រំដែននៅសមរភូមិមុខមិនថាប្រទេសមិនមានសង្គ្រាម ឬជួបប្រទះនូវសង្គ្រាមឈ្លានពាននោះទេ។
ឯកឧត្តម មាន ចាន់យ៉ាដា បានបន្តថា ក្រោមការដឹកនាំរបស់សម្តេចធិបតី ហ៊ុន ម៉ាណែត ជានាយករដ្ឋមន្ត្រីនៃកម្ពុជា បានបន្តយកចិត្តទុកដាក់យ៉ាងខ្លាំងបំផុតចំពោះវឌ្ឍនភាព និងសុខដុមនីយកម្មសាសនា ហើយក្នុងនោះវិស័យពុទ្ធចក្រ និងអាណាចក្រ ក៏មានការរីកចម្រើន ទន្ទឹមគ្នាក្រោមបរិយាកាសសុខសន្តិភាព ស្ថេរភាពនយោបាយ និងការអភិវឌ្ឍន៍លើគ្រប់វិស័យដែលជាចលករធ្វើ អោយពុទ្ធបរិស័ទមានជីវភាពធូរធារ និងបានចូលរួមកសាងទីវត្តអារាមឱ្យមានការរីកចម្រើនជាលំដាប់។
ឯកឧត្តមបន្តថា ការប្រគេនទេយ្យវត្ថុជាគ្រឿងឧបភោគ បរិភោគ ដល់ព្រះសង្ឃនាពេលនេះ គឺជាទឹកចិត្តរបស់កាកបាទក្រហមកម្ពុជា ដែលតែងតែយកចិត្តទុកដាក់ខ្ពស់ចំពោះសុខទុក្ខរបស់ព្រះសង្ឃ និងការរីកចម្រើននៃវិស័យព្រះពុទ្ធសាសនា ដែលជាសាសនារបស់រដ្ឋ។
ឆ្លៀតក្នុងឱកាសនោះដែរ ឯកឧត្តម មាន ចាន់យ៉ាដា អភិបាលខេត្ត ក៏បាននាំយកម៉ូតូសរុបចំនួន០៧គ្រឿង និងខ្ទឹមសរចំនួន០២តោន ប្រគល់ដល់វីរកងទ័ពជួរមុខការពារព្រំដែន ដើម្បីជាមធ្យោបាយដ៏ចាំបាច់សម្រាប់សម្រួលដល់ការល្បាត ការបំពេញបេសកកម្ម និងការងារប្រចាំថ្ងៃរបស់កងទ័ពនៅតាមបន្ទាត់ព្រំដែនផងដែរ៕
