សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា បានផ្ញើសារអបអរសាទរលោក ដាតុ ស៊េរី អាន់វ៉ា អ៊ីប្រាហ៊ីម នាយករដ្ឋមន្ត្រី នៃប្រទេសម៉ាឡេស៊ី នៅក្នុងឱកាសខួបលើកទី៦៨ នៃទិវាឯករាជ្យជាតិម៉ាឡេស៊ី។
សារលិខិតរបស់សម្ដេចតេជោ ហ៊ុន សែន មានខ្លឹមសារដូចតទៅ៖ «ក្នុងនាមអង្គការនីតិប្បញ្ញត្តិ និងនីតិប្រតិបត្តិ ព្រមទាំងប្រជាជន នៃព្រះរាជាណាចក្រកម្ពុជា និងក្នុងនាមខ្លួន ខ្ញុំផ្ទាល់ ខ្ញុំសូមចូលរួមអបអរសាទរយ៉ាងកក់ក្តៅបំផុត និងសូមជូនពរ ឯកឧត្តម រដ្ឋាភិបាល និងប្រជាជន ម៉ាឡេស៊ី ជាទីរាប់អាន ក្នុងឱកាសដ៏នក្ខត្តឫក្ស ខួបលើកទី៦៨ នៃទិវាបុណ្យជាតិម៉ាឡេស៊ី។
ខ្ញុំ សូមកោតសរសើរចំពោះសមិទ្ធផលដ៏ធំធេង ដែលប្រជាជន និងរដ្ឋាភិបាលម៉ាឡេស៊ី សម្រេចបានក្នុងការ ប្រែក្លាយម៉ាឡេស៊ីទៅជាប្រទេសមួយក្នុងចំណោមប្រទេសទំនើប និងវិបុលភាពបំផុតនៅក្នុងតំបន់អាស៊ី អាគ្នេយ៍។ ខ្ញុំជឿជាក់ថា ក្រោមការដឹកនាំដ៏ឈ្លាសវៃរបស់ឯកឧត្តម ប្រទេសម៉ាឡេស៊ី នឹងបន្តរីកចម្រើន និង សម្រេចបានជោគជ័យកាន់តែធំធេងថែមទៀត និងដើរតួនាទីដ៏សំខាន់ទាំងក្នុងតំបន់ និងលើពិភពលោក។ ទន្ទឹមនឹងការបង្ហាញពីការដឹងគុណដ៏ជ្រាលជ្រៅរបស់កម្ពុជា ចំពោះតួនាទីរបស់ ម៉ាឡេស៊ី និងជាពិសេស តួនាទីរបស់ ឯកឧត្តម ជាអន្តរការីដ៏សំខាន់នៅក្នុងកិច្ចព្រមព្រៀងឈប់បាញ់រវាងកម្ពុជា និងថៃ នាពេលថ្មីៗ នេះ ខ្ញុំសូមអបអរសាទរដល់ប្រទេសម៉ាឡេស៊ី ចំពោះការដឹកនាំប្រកបដោយប្រសិទ្ធភាពក្នុងនាមជាប្រធាន អាស៊ាន ប្រចាំឆ្នាំ២០២៥ ក្រោមប្រធានបទ «បរិយាបន្ន និងចីរភាព»។
ខ្ញុំមានសេចក្តីសោមនស្សរីករាយក្រៃលែង ដែលទំនាក់ទំនងទ្វេភាគីល្អប្រសើរ និងកិច្ចសហប្រតិបត្តិការដែល ផ្តល់ផលប្រយោជន៍ទៅវិញទៅមក បន្តរីកចម្រើនពីមួយឆ្នាំទៅមួយឆ្នាំ។ កម្ពុជាបន្តប្តេជ្ញាចិត្តមុតមាំក្នុងការ ពង្រឹង និងធ្វើឱ្យស៊ីជម្រៅនូវទំនាក់ទំនងដ៏វិសេសវិសាលដើម្បីឧត្តមប្រយោជន៍នៃប្រជាជនយើងទាំងពីរដែល រួមចំណែកដល់សន្តិភាព ស្ថិរភាព និងវិបុលភាពនៅក្នុងសហគមន៍អាស៊ានរបស់យើង និងក្នុងពិភពលោក។
ជាថ្មីទៀត សូម ឯកឧត្តម ទទួលនូវសេចក្ដីរាប់អានដ៏ជ្រាលជ្រៅបំផុតពីខ្ញុំ និងសូមប្រសិទ្ធពរជូន ឯកឧត្តម សូមបន្តបាននូវសុខភាពល្អ និងជោគជ័យ ព្រមទាំងសុខុមាលភាព និងវិបុលភាពសម្រាប់ប្រជាជនម៉ាឡេស៊ី ទាំងអស់»៕
