ថ្ងៃទី៩ ខែកញ្ញា ឆ្នាំ២០២៥ – តាងនាមរាជរដ្ឋាភិបាលកម្ពុជា ឯកឧត្តម សុខ សូកេន រដ្ឋមន្រ្តីក្រសួងអធិការកិច្ច បានអញ្ជើញជាអធិបតីក្នុងពិធីលាងសាយភោជន៍ទទួលស្វាគមន៍គណៈប្រតិភូខេត្តហឺណាននៃសាធារណរដ្ឋប្រជាមានិតចិន ដឹកនាំដោយឯកឧត្តម ចឹង ហៃយ៉ាង (ZHENG Haiyang) អភិបាលរងខេត្តហឺណាន នៅសណ្ឋាគារសូហ្វីតែលភ្នំពេញភូគីត្រា។ ក្នុងពិធីទទួលស្វាគមន៍នោះក៏មានការអញ្ជើញចូលរួមពីលោក ចាន់ ដេវីដ នាយកប្រតិបត្តិក្រុមហ៊ុនអាកាសចរណ៍ជាតិកម្ពុជា, ឯកឧត្តម លោកជំទាវ លោក លោកស្រី និងភ្ញៀវកិត្តិយសជាច្រើនរូប។
ថ្លែងក្នុងពិធីដ៏មានអត្ថន័យនេះ ឯកឧត្តមរដ្ឋមន្ត្រី បានគូសរំលេចពីចំណងមិត្តភាព សាមគ្គីភាព កិច្ចសហប្រតិបត្តិការ និងភាពជាដៃគូយុទ្ធសាស្ត្រគ្រប់ជ្រុងជ្រោយរវាងកម្ពុជា និងចិន ដែលមានការរីកលូតលាស់លើគ្រប់វិស័យអស់រយៈពេល ៦៧ឆ្នាំកន្លងមកហើយ។ បន្ថែមលើនោះ ឯកឧត្តមរដ្ឋមន្ត្រី បានរំលេចឡើងពីលទ្ធផលប្រកបដោយផ្លែផ្កានៃជំនួបទ្វេភាគីរវាង សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងឯកឧត្តមប្រធានាធិបតីចិន ស៊ី ជិនពីង នៅសាធារណរដ្ឋប្រជាមានិតចិន កាលពីពេលថ្មីៗកន្លងទៅនេះ ដែលបានបង្ហាញពីការរឹតចំណងមិត្តភាពដែកថែប និងពង្រីកសាមគ្គីភាព កម្ពុជា-ចិន ឱ្យកាន់តែរឹងមាំបន្ថែមទៀត សំដៅកសាងសហគមន៍វាសនារួមកម្ពុជា-ចិន គ្រប់រដូវកាល ក្នុងយុគសម័យថ្មី ប្រកបដោយគុណភាពខ្ពស់ កម្រិតខ្ពស់ និងស្តង់ដាខ្ពស់ក្នុងឆ្នាំ២០២៥នេះ។ ជាមួយគ្នានេះ ឯកឧត្តមរដ្ឋមន្ត្រីក៏បានថ្លែងអំណរគុណដល់រដ្ឋាភិបាលចិន ដែលបានគាំទ្របទឈប់បាញ់ និងបានផ្តល់ជំនួយមនុស្សធម៌ចំនួន ២០លានយ័នដល់កម្ពុជា ដើម្បីជួយស្ដារឡើងវិញនូវការខូចខាត និងជួយសម្រួលដល់ទុក្ខលំបាករបស់ប្រជាពលរដ្ឋដែលរងគ្រោះដោយសារជម្លោះតាមបណ្តោយព្រំដែនកម្ពុជា-ថៃផងដែរ។
ទន្ទឹមនឹងកិច្ចសហប្រតិបត្តិការលើវិស័យសំខាន់ៗជាច្រើនជាមួយខេត្តហឺណាន ឯកឧត្តមរដ្ឋមន្ត្រី បានស្នើសុំជំរុញកិច្ចសហប្រតិបត្តិការថ្មីលើវិស័យអធិការកិច្ច រវាងក្រសួងអធិការកិច្ច និងរដ្ឋបាលខេត្តហឺណាន ដើម្បីជាប្រយោជន៍ក្នុងការជំរុញកិច្ចសហប្រតិបត្តិការប្រកបដោយតម្លាភាព ភាពជឿជាក់ និងអភិបាលកិច្ចល្អរវាងប្រទេសទាំងពីរ៕
