លោកជំទាវ ឃួន ឃុនឌី សមាជិកព្រឹទ្ធសភា និងគណៈកម្មការសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ខេត្តកំពង់ធំ អមដំណើរដោយលោកជំទាវ យស ថានារី សមាជិករដ្ឋសភា ព្រមទាំងសប្បុរសជនជាច្រើនរូបបានចុះសួរសុខទុក្ខដល់វីរកងទ័ពចំនួន៧២នាក់ ដែលកំពុងសម្រាកព្យាបាលជំងែនៅមន្ទីរពេទ្យបង្អែកខេត្តកំពង់ធំ ថ្ងៃទី២៨ ខែ ធ្នូ ឆ្នាំ២០២៥នេះ ។
ថ្លែងក្នុងឱកាសនោះ លោកជំទាវ បាននាំយកប្រសាសន៍ផ្ដាំផ្ញើសាកសួរសុខទុក្ខ និងប្រកបដោយក្តីនឹករលឹកពីសំណាក់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន និងសម្តេចកិត្តិសង្គហបណ្ឌិត ម៉ែន សំអន ប្រធានគណៈកម្មាធិការសមាគមនារីកម្ពុជាដើម្បីសន្តិភាព និងអភិវឌ្ឍន៍។
ក្នុងឱកាសនោះលោកជំទាវបានសម្តែងការសោកស្តាយចំពោះបងប្អូនវីរកងទ័ពដែលបានរងរបួស ហើយក៏សូមកោតសរសើរ និងថ្លែងអំណរគុណយ៉ាងជ្រាលជ្រៅ ចំពោះបងប្អូនវីរកងទ័ព ដែលបានលះបង់ អាយុជីវិតដើម្បីជាតិមាតុភូមិ និងប្រជាជន និងសូមជូនពរឱ្យបងប្អូនវីរកងទ័ព ឆាប់បានជាសះស្បើយឡើង។
លោកជំទាវបានក្រើនរំលឹកដល់បងប្អូនវីរកងទ័ពត្រូវយកចិត្តទុកដាក់ចូលរួមរក្សាអនាម័យ ថែទាំសុខភាព ដើម្បីបង្ការជំងឺនានា និងសូមឱ្យបងប្អូនប្រជាពលរដ្ឋ មានភាពនឹងនរ និងកក់ក្តៅក្នុងចិត្ត ព្រោះថារាជរដ្ឋាភិបាល និងសប្បុសរជនទាំងអស់ នឹងនៅរួមសុខ រួមទុក្ខជាប់ជានិច្ច ដោយមិនបោះបង់បងប្អូនចោលឡើយ ពិសេសត្រូវមានការអត់ធ្មត់ និងជឿជាក់លើការដឹកនាំរបស់ប្រមុខរាជរដ្ឋាភិបាល ក្នុងការស្វែងរកដំណោះស្រាយទាំងផ្លូវការទូត ផ្លូវច្បាប់ និងយោធា ដើម្បីការពារអាយុជីវិតប្រជាជន បូរណភាពទឹកដី និងឈានទៅបញ្ចប់សង្រ្គាម នាំយកសុខសន្តិភាព នាពេលខាងមុខនេះ ហើយបងប្អូនអាចវិលត្រឡប់ទៅលំនៅដ្ឋាន ភូមិ ស្រុក រៀងៗខ្លួនវិញ។
ជាមួយគ្នានេះដែរលោកជំទាវ ឃួន ឃុនឌី បាននាំយករឿងឧបភោគបរិភោគមួយចំនួនទៅប្រគល់ជូនតំបន់ប្រតិបត្តិការសឹករងកំពង់ធំ ដើម្បីយកទៅផ្គត់ផ្គង់ជីវភាពរស់នៅរបស់វីរកងទ័ពជួរមុខ។
ទន្ទឹមគ្នានេះ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំបានថ្លែងអំណរគុណយ៉ាងជ្រាលជ្រៅបំផុតចំពោះលោកជំទាវ ឃួន ឃុនឌី រួមទាំងសប្បុរសជនសូមមានសេចក្តីសុខ មានសុខភាពល្អនិងគាំទ្រដល់រាជរដ្ឋាភិបាលដើម្បីប្រទេសជាតិមានការអភិវឌ្ឍបន្ថែមទៀត៕
