នៅថ្ងៃសៅរ៍ ៦កើត ខែមាឃ ឆ្នាំម្សាញ់ សប្ដស័ក ពុទ្ធសករាជ ២៥៦៩ ត្រូវនឹងថ្ងៃទី២៤ ខែមករា ឆ្នាំ២០២៦នេះ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងជាប្រធានគណៈកម្មាធិការជាតិទន្លេមេគង្គកម្ពុជា បានដឹកនាំគណៈប្រតិភូក្រសួង-ស្ថាប័នពាក់ព័ន្ធដែលជាសមាជិកគណៈកម្មាធិការជាតិទន្លេមេគង្គកម្ពុជា អញ្ជើញធ្វើទស្សនកិច្ចសិក្សា ដើម្បីពង្រីកការស្វែងយល់បន្ថែមអំពីស្ថានភាពអន្លង់អភិរក្សត្រីមេពូជ អន្លង់វឿនឌុក និងការគ្រប់គ្រងរបស់សហគមន៍នេសាទភូមិថ្មី ក្នុងទន្លេមេគង្គនៃតំបន់រ៉ាមសារស្ទឹងត្រែង ស្ថិតក្នុងភូមិថ្មី សង្កាត់សាមគ្គី ក្រុងស្ទឹងត្រែង ខេត្តស្ទឹងត្រែង។
សូមជម្រាបថា គណៈកម្មាធិការជាតិទន្លេមេគង្គកម្ពុជា ជាស្ថាប័នជាតិមួយស្ថិតក្រោមការគ្រប់គ្រងផ្ទាល់របស់រាជរដ្ឋាភិបាលដែលមានបេសកកម្មសម្របសម្រួលក្នុងការគ្រប់គ្រង ការការពារ ការអភិរក្ស និងការអភិវឌ្ឍប្រកបដោយចីរភាពនូវធនធានទឹក និងធនធានពាក់ព័ន្ធដទៃទៀតក្នុងអាងទន្លេមេគង្គ។ នៅក្នុងក្របខ័ណ្ឌកិច្ចសហប្រតិបត្តិការគណៈកម្មការទន្លេមេគង្គ (MRC) គណៈកម្មាធិការជាតិទន្លេមេគង្គកម្ពុជា មានតួនាទីក្នុងការសម្របសម្រួលនៅថ្នាក់ជាតិ និងក្របខ័ណ្ឌតំបន់លើការរៀបចំ ការអនុវត្ត ការពិនិត្យតាមដាន ការវាយតម្លៃលើផែនការ យុទ្ធសាស្ត្រ គម្រោង កម្មវិធី និងសកម្មភាពនានារបស់គណៈកម្មការទន្លេមេគង្គ។
សូមបញ្ជាក់ថា គណៈកម្មាធិការជាតិទន្លេមេគង្គកម្ពុជា បានបង្កើតឡើងដំបូងតាមសេចក្តីសម្រេចលេខ៣១៩/៨០ ចុះថ្ងៃទី១៤ ខែតុលា ឆ្នាំ១៩៨០ របស់ក្រុមប្រឹក្សាប្រជាជនបដិវត្តន៍នៃសាធារណរដ្ឋប្រជាមានិតកម្ពុជា និងតាមព្រះរាជក្រឹត្យលេខ នស/រកត/០៩០៩/៩៤៣ ចុះថ្ងៃទី២៣ ខែកញ្ញា ឆ្នាំ២០០៩ ស្ដីពីការកែសម្រួល និងការធ្វើនិយ័តភាពការបង្កើតគណៈកម្មាធិការជាតិទន្លេមេគង្គ។ បច្ចុប្បន្នគណៈកម្មាធិការជាតិទន្លេមេគង្គកម្ពុជា មានក្រសួង-ស្ថាប័នពាក់ព័ន្ធជាសមាជិកចំនួន១៧ ដែលជាភ្នាក់ងារអនុវត្ត និងផ្ដល់កិច្ចសហការ និងការចូលរួមក្នុងក្របខ័ណ្ឌការងាររបស់គណៈកម្មការទន្លេមេគង្គ ដើម្បីរួមចំណែកលើកកម្ពស់ប្រសិទ្ធភាពសម្រាប់ការគ្រប់គ្រង និងការអភិវឌ្ឍប្រកបដោយចីរភាពក្នុងអាងទន្លេមេគង្គ៕
