មន្ត្រីរាជការចំនួន២០រូប ត្រូវបានប្រកាសតែងតាំង ឲ្យទទួលភារកិច្ច ក្នុងនោះ៤រូប មកពីមន្ទីរធនធានទឹក និងឧតុនិយម, ១រូប មកពីមន្ទីរកសិកម្ម និង១៥រូបមកពីមន្ទីរសុខាភិបាលរដ្ឋបាលខេត្ត។
ពិធីប្រកាសនេះធ្វើឡើងនៅព្រឹកថ្ងៃទី១២ ខែកុម្ភៈ ឆ្នាំ២០២៦ នៅសាលប្រជុំធំសាលាខេត្តកំពង់ចាម ក្នុងកិច្ចប្រជុំសាមញ្ញលើកទី២១ អាណត្តិទី៤ របស់ក្រុមប្រឹក្សាខេត្ត ក្រោមអធិបតីភាពឯកឧត្តម ខ្លូត ផន ប្រធានក្រុមប្រឹក្សាខេត្ត និងឯកឧត្តម អ៊ុន ចាន់ដា អភិបាលខេត្តកំពង់ចាម។
បន្ទាប់ពីពិធីប្រកាសតែងតាំងមន្ត្រីទាំង២០រូប អភិបាលខេត្តកំពង់ចាម ឯកឧត្តម អ៊ុន ចាន់ដា បានផ្តាំផ្ញើឲ្យមន្ត្រីដែលទើបតែប្រកាសតែងតាំង ខិតខំប្រឹងប្រែងធ្វើការឲ្យបានល្អ ឲ្យសាកសមតួនាទីដែលទើបទទួលបាន និងឲ្យស័ក្តិសម តម្លៃរបស់ខ្លួន ដែលថ្នាក់ដឹកនាំអង្គភាពមានជំនឿទុកចិត្ត ដូច្នេះសូមមន្ត្រីយើងខិតខំធ្វើការងារឲ្យបានល្អ នៅក្នុងការបម្រើសេវាសាធារណៈសេវារដ្ឋបាលជូនប្រជាពលរដ្ឋ តាមរយៈការទំនាក់ទំនង ការបំពេញការងារឲ្យទាន់ពេលវេលា ឲ្យស្របតាមក្រមសីលធម៌វិជ្ជាជីវៈមន្ត្រីរាជការ។
ឯកឧត្តមអភិបាលខេត្ត បានបន្តថា ក្នុងនាមជាអ្នកដឹកនាំ ត្រូវឈរលើគោលការណ៍រក្សានូវសាមគ្គីភាពផ្ទៃក្នុងឲ្យបានល្អ តាមរយៈគោលការណ៍ចែករំលែកការងារ និងការដោះស្រាយបញ្ហាក្នុងអង្គភាព ឬបញ្ហាឬបញ្ហាផ្សេងៗ ក្រៅអង្គភាព ចាំបាច់ត្រូវធ្វើការប្រជុំ ពីព្រោះយោបល់ដើម្បីធ្វើការសម្រេច៕
