ឯកអគ្គរដ្ឋទូតអាល្លឺម៉ង់ប្រចាំនៅកម្ពុជា ដែលទើបចប់អាណត្តិការងារ លោក ស្តេហ្វាន អានតុន ម៉េសសឺរើ (Stefan Anton Messerer) បានបង្ហាញការកត់សម្គាល់ថា ក្នុងអាណត្តិការងារ៤ឆ្នាំរបស់លោក វិស័យសេដ្ឋកិច្ច ពាណិជ្ជកម្ម និងវិនិយោគរវាងកម្ពុជា និងអាល្លឺម៉ង់ មានភាពកាន់តែប្រសើរ។
លោកឯកអគ្គរដ្ឋទូត បានគូសរំលេចបែបនេះ ក្នុងឱកាសអញ្ជើញជួបជម្រាបលាសម្តេចតេជោ ហ៊ុន សែន ប្រធានព្រឹទ្ធសភាកម្ពុជា នាព្រឹកថ្ងៃអង្គារ ទី១៤ ខែកក្កដា ឆ្នាំ២០២៦នេះ បន្ទាប់ពីចប់អាណត្តិការងារ៤ឆ្នាំរបស់លោក។
ឯកឧត្តម ជា ធីរិទ្ធ អ្នកនាំពាក្យព្រឹទ្ធសភាកម្ពុជា បានឱ្យដឹងថា ក្នុងជំនួបនោះ សម្ដេចតេជោ ហ៊ុន សែន បានសម្ដែងការរីករាយក្នុងការជួបជាមួយលោកឯអគ្គរដ្ឋទូត សាជាថ្មីមុននឹងលោកចាកចេញពីកម្ពុជាបន្ទាប់ពីផុតអាណត្តិជាឯកអគ្គរដ្ឋទូតអាល្លឺម៉ង់ប្រចាំកម្ពុជា។ សម្ដេចតេជោ ហ៊ុន សែន បានវាតម្លៃខ្ពស់ចំពោះតួនាទីរបស់លោកឯកអគ្គរដ្ឋទូតអាល្លឺម៉ង់ បានញ៉ាំង និងសម្របសម្រួលឱ្យទំនាក់ទំនងរវាងកម្ពុជា និងអាល្លឺម៉ង់កាន់តែមានភាពរីកចម្រើន។
លោកឯកអគ្គរដ្ឋទូតអាល្លឺម៉ង់ បានថ្លែងអំណរគុណសម្ដេចតេជោ ហ៊ុន សែន ដែលបានអនុញ្ញាតឱ្យរូបលោក និងសហការី បានជួបជម្រាបលា។ លោកឯកអគ្គរដ្ឋទូតចប់អាណត្តិការងាររូបនេះ បានលើកឡើងថា រយៈពេល៤ឆ្នាំនៃការបំពេញការងារនៅកម្ពុជា គឺបានប្រព្រឹត្តទៅលឿនខ្លាំងណាស់។ រយៈពេល៤ឆ្នាំនេះ លោក បានធ្វើកិច្ចការងារជាមួយភាគីកម្ពុជា និងបានសម្រេចលទ្ធផលជាច្រើនសម្រាប់ពូនជ្រុំទំនាក់ទំនងរវាងកម្ពុជា និងអាល្លឺម៉ង់។
លោកឯកអគ្គរដ្ឋទូត បានថ្លែងអំណរគុណភាគីកម្ពុជាដែលបានសហការយ៉ាងជិតស្និទ្ធបំផុតជាមួយរូបលោក និងក្រុមការងារ ក្នុងទិសដៅនៃការពង្រីកទំនាក់ទំនងរវាងកម្ពុជា និងអាល្លឺម៉ង់។ លោកឯកអគ្គរដ្ឋទូត ក៏បានរំលេចអំពីស្នាដៃសំខាន់ៗក្នុងពេលបំពេញការងារជាឯកអគ្គរដ្ឋទូតនៅកម្ពុជា ដូចជាការសម្របសម្រួលឱ្យមានដំណើរទស្សនកិច្ចរបស់ប្រធានាធិបតីអាល្លឺម៉ង់មកកាន់ប្រទេសកម្ពុជា ការលើកកម្ពស់នូវកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម និងការវិនិយោគ ក៏ដូចជាវប្បធម៌ និងទេសចរណ៍។
លោកឯកអគ្គរដ្ឋទូតអាល្លឺម៉ង់ បានវាយតម្លៃខ្ពស់ចំពោះវឌ្ឍនភាពរបស់កម្ពុជា ហើយប្រជាជនអាល្លឺម៉ង់ ចាប់អារម្មណ៍ក្នុងការមកទស្សនាប្រទេសកម្ពុជា។ លោកឯកអគ្គរដ្ឋទូត បានបញ្ជាក់ថា ប្រទេសកម្ពុជា បានស្ថិតនៅក្នុងបញ្ជីមួយរបស់ប្រជាជនអាល្លឺម៉ង់ ជាគោលដៅទេសចរណ៍។ ជាពិសេសសម្រាប់ពលរដ្ឋអាល្លឺម៉ង់ដែលចូលនិវត្តន៍ គឺសម្លឹងឃើញកម្ពុជា ជាទីកន្លែងមនោរម្យសម្រាប់ពួកគេមកទស្សនា និងមកកម្សាន្ត។
សម្ដេចតេជោ ហ៊ុន សែន បានសម្ដែងការពេញចិត្តចំពោះការលើកឡើងរបស់លោកឯកអគ្គរដ្ឋទូតអាល្លឺម៉ង់ ទាក់ទងទៅនឹងទំនាក់ទំនងទ្វេភាគីរវាងកម្ពុជា និងអាល្លឺម៉ង់។ សម្ដេចតេជោ បានយល់ស្របទាំងស្រុងចំពោះការវិវឌ្ឍន៍លើទំនាក់ទំនងផ្នែកសេដ្ឋកិច្ច និងពាណិជ្ជកម្ម។ សម្ដេចតេជោ បានលើកឡើងថា សេដ្ឋកិច្ច ពាណិជ្ជកម្ម និងការវិនិយោគ គឺជាស្នូលនៃទំនាក់ទំនងរវាងប្រទេសទាំងពីរ។
សម្ដេចតេជោប្រធានព្រឹទ្ធសភាកម្ពុជា បង្ហាញក្តីសង្ឃឹមថា អ្នកវិនិយោគរបស់ល្លឺម៉ង់ កាន់តែច្រើននឹងមកវិនិយោគនៅកម្ពុជា។ សម្ដេចតេជោ ហ៊ុន សែន ក៏បានអរគុណអាល្លឺម៉ង់ ដែលបានជួយជ្រោមជ្រែងកម្ពុជានាពេលកន្លងមក ជាពិសេសជួយធ្វើកំណែទម្រង់រដ្ឋបាលសាធារណៈនៅថ្នាក់ក្រោមជាតិ ការជួយក្នុងការអភិវឌ្ឍជនបទជាដើម។ ទាំងនេះជាសមិទ្ធផលបានចូលរួមចំណែកជួយកម្ពុជា។
ក្នុងឱកាសនោះ សម្ដេចតេជោ ហ៊ុន សែន បានជូនពរលោកឯកអគ្គរដ្ឋទូតអាល្លឺម៉ង់ ទទួល បានជោគជ័យជាមួយបេសកកម្មការងារថ្មី។ សម្តេចតេជោ សង្ឃឹមថា លោកឯកអគ្គរដ្ឋទូត នឹងធ្វើជាឯកអគ្គរាជទូតរបស់កម្ពុជា ជួយផ្សព្វផ្សាយឱ្យពិភពលោក ក៏ដូចជាប្រជាជនអាល្លឺម៉ង់ កាន់តែចាប់អារម្មណ៍ និងពេញចិត្តចំពោះប្រទេសកម្ពុជា៕
