(សៀមរាប)៖ នៅព្រឹកថ្ងៃអង្គារ ៧កើត ខែទុតិយាសាឍ ឆ្នាំមមី អដ្ឋស័ក ព.ស២៥៧០ ត្រូវនឹងថ្ងៃទី២១ ខែកក្កដា ឆ្នាំ២០២៦នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា អញ្ជើញប្រគល់សញ្ញាបត្រជូននិស្សិតសាកលវិទ្យាល័យសៅស៍អ៊ីសថ៍អេយសៀ ក្រោយបញ្ចប់ការសិក្សាដោយជោគជ័យ។
របាយការណ៍សាកលវិទ្យាល័យសៅស៍អ៊ីសថ៍អេយសៀ បានឱ្យដឹងថា និស្សិតដែលបញ្ចប់ការសិក្សាដោយជោគជ័យ ហើយទទួលសញ្ញាបត្រនាព្រឹកថ្ងៃនេះ មានចំនួន ១ ៥០០នាក់ នារី ៩៣២នាក់ មានកម្រិត បរិញ្ញាបត្ររង បរិញ្ញាបត្រ និងបរិញ្ញាបត្រជាន់ខ្ពស់ លើមុខជំនាញដូចជា នេយ្យ និងសវនកម្ម, គ្រប់គ្រង, ម៉ាឃីតធីង, ហិរញ្ញវត្ថុ និងធនាគារ, គ្រប់គ្រងទេសចរណ៍ និងបដិសណ្ឋារកិច្ច, ព័ត៌មានវិទ្យា, ស្ថាបត្យកម្ម, គណិតវិទ្យា, នីតិសាស្រ្ត, រដ្ឋបាលសាធារណៈ, ការបង្រៀនភាសាអង់គ្លេស និងអក្សរសាស្រ្តខ្មែរ។
របាយការណ៍សាកលវិទ្យាល័យសៅស៍អ៊ីសថ៍អេយសៀ គឺជាគ្រឹះស្ថានឧត្តមសិក្សាឯកជន ត្រូវបានបង្កើតឡើងនៅឆ្នាំ២០០៦ សម្រាប់បណ្តុះបណ្តាលកម្មវិធីអប់រំកម្រិតបរិញ្ញាបត្ររង បរិញ្ញាបត្រ បរិញ្ញាបត្រជាន់ខ្ពស់ និងបណ្ឌិត ដើម្បីអភិវឌ្ឍធនធានមនុស្សប្រកបដោយសមត្ថភាព មានឥរិយាបថល្អឆ្លើយតបទៅនឹងទីផ្សារការងារជាតិ និងអន្តរជាតិ ដែលពួកគេអាចធ្វើការងារ ព្រមទាំងអាចរស់នៅក្នុងយុគ្គសម័យសាកលភាវូបនីយកម្ម និងសង្គមពុទ្ធិ។
មកឆ្នាំ២០២៦នេះ សាកលវិទ្យាល័យសៅស៍អ៊ីសថ៍អេយសៀ ត្រូវបានបង្កើតឡើងរយៈពេល ២០ឆ្នាំហើយ។ រយៈពេល២០ឆ្នាំមកនេះ សាកលវិទ្យាល័យបានចូលរួមបណ្តុះបណ្តាលនិស្សិតសរុប ៨ ៨៨៨នាក់ នារី ៤.៥៩៧នាក់ ស្មើ ៥១,៧២ភាគរយ។
ដើម្បីជួយដល់និស្សិតមកពីគ្រួសារក្រីក្រ និងខ្វះលទ្ធភាពបន្តការសិក្សានៅថ្នាក់ឧត្តមសិក្សា តាមរយៈអាហារូបករណ៍របស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងសម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត, សាកលវិទ្យាល័យ បានផ្តល់អាហារូបករណ៍ថ្នាក់បរិញ្ញាបត្រ និងបរិញ្ញាបត្រជាន់ខ្ពស់សរុប ៣៤១កន្លែង គិតចាប់ពីឆ្នាំសិក្សា២០១២-២០១៣។
សាកលវិទ្យាល័យសៅស៍អ៊ីសថ៍អេយសៀ ទទួលបានយកចិត្តទុកដាក់ខ្ពស់ពីសំណាក់សម្តេចមហាបវរធិបតី ហ៊ុន ម៉ាណែត តាំងពីពេលដែលសម្តេចមិនទាន់អញ្ជើញកាន់ការងារជានាយករដ្ឋមន្ត្រីមកម្ល៉េះ។ សម្តេចមហាបវរធិបតី បានផ្តល់កិត្តិយសអញ្ជើញជាអធិបតីចែកសញ្ញាបត្រដល់និស្សិតបញ្ចប់ការសិក្សារបស់សាកលវិទ្យាល័យចំនួន៣លើកមកហើយ រាប់ទាំងកម្មវិធីនាព្រឹកថ្ងៃនេះផង។ លើកទី១នៅឆ្នាំ២០២៣ លើកទី២ ឆ្នាំ២០២៥ និងលើកទី៣ នៅថ្ងៃទី២១ ខែកក្កដា ឆ្នាំ២០២៦នេះ។
រយៈពេល២០ឆ្នាំលើវិថីនៃការអប់រំ ដោយមានការប្តេជ្ញាចិត្តខ្ពស់របស់ក្រុមប្រឹក្សាភិបាល គណៈគ្រប់គ្រង បុគ្គលិក សាស្ត្រាចារ្យ និង លោកគ្រូ អ្នកគ្រូ ក្នុងការអនុវត្តផែនការយុទ្ធសាស្រ្ត និងផែនការបណ្តុះបណ្តាលរបស់សាកលវិទ្យាល័យសៅស៍អ៊ីសថ៍អេយសៀបានប្រែក្លាយសាកលវិទ្យាល័យឱ្យមានកិត្តិយស និងកេរ្តិ៍ឈ្មោះល្បីល្បាញនៅកម្ពុជា ជាពិសេសនៅខេត្តសៀមរាប មានការទទួលស្គាល់ និងគាំទ្រពីស្ថាប័នជាតិ និងអន្តរជាតិ មានការគាំទ្រពីអ្នកសិក្សាគ្រប់មជ្ឈដ្ឋាន នៃព្រះរាជាណាចកម្ពុជា ព្រមទាំងទទួលបានសមិទ្ធផលចម្បងៗដូចខាងក្រោម៖
១៖ ទទួលបានការទទួលស្គាល់គុណភាពអប់រំថ្នាក់ជាតិពេញសិទ្ធិពីគណៈកម្មាធិការទទួលស្គាល់គុណភាពអប់រំ នៃកម្ពុជា (ACC)
២៖ ក្លាយជាសមាជិកស្ថាប័នទទួលស្គាល់គុណភាពអប់រំអាស៊ាន (AUN-QA) នៅឆ្នាំ២០១៧
៣៖ មានកិច្ចសហការជាមួយធនាគារពិភពលោក ធនាគារអភិវឌ្ឍន៍អាស៊ី អង្គការ UNICEF និងអង្គការមូលនិធិអាស៊ី ដើម្បីបង្កើតមណ្ឌលព័ត៌មានសាធារណៈ ដែលមានឯកសារស្រាវជ្រាវទាំង Hard copy និង Soft copy ដែលទាក់ទងទៅនឹងកម្មវិធីសិក្សារបស់សាកលវិទ្យាល័យ សៅស៍អ៊ីសថ៍អេយសៀ អាស៊ាន និងពិភពលោក ដើម្បីផ្តល់ឱកាសឱ្យនិស្សិត សាស្រ្តាចារ្យ លោកគ្រូ អ្នកគ្រូ និងសាធារណជនគ្រប់មជ្ឈដ្ឋានស្រាវជ្រាវបំពេញឱ្យការសិក្សា ការបង្រៀន និងពង្រីកចំណេះដឹងឱ្យទូលំទូលាយបន្ថែមទៀត
៤៖ មានការកិច្ចសហការជាមួយស្ថានទូតអាមេរិក ដើម្បីបង្កើតបណ្ណាល័យអាមេរិក ដែលមានឯកសារស្រាវជ្រាវទាំងHard copy និង Soft copy ទាក់ទងទៅនឹងសហរដ្ឋអាមេរិក អឺរ៉ុប អាស៊ី និងពិភពលោក ផ្តល់ធនធានសិក្សាភាសាអង់គ្លេសគ្រប់កម្រិត ផ្តល់កម្មវិធីតេស្តTOEFL ផ្តល់ការប្រើប្រាស់កុំព្យូទ័រ អ៊ិនធឺណេត ផ្តល់វាគ្មិន និងអ្នកប្រាជ្ញល្បីៗ ដើម្បីធ្វើបទបថកថាចែករំលែកបទពិសោធដល់គណៈគ្រប់គ្រង បុគ្គលិក សាស្ត្រាចារ្យ លោកគ្រូ អ្នកគ្រូ និស្សិត នៃសាកលវិទ្យាល័យ សៅស៍អ៊ីសថ៍អេយសៀ និងសាធារណជន
៥៖ មានកិច្ចសហប្រតិបត្តិការជាមួយសាកលវិទ្យាល័យល្បីៗនៅក្រៅប្រទេស ដូចជាប្រទេសអង់គ្លេស កូរ៉េ ចិន ថៃ ហ្វីលីពីន វៀតណាម ម៉ាឡេស៊ី ឥណ្ឌូនេស៊ី អេស្ប៉ាញ និងជប៉ុន ដើម្បីផ្លាស់ប្តូរនិស្សិតសិក្សា ផ្លាស់ប្តូរបទពិសោធន៍គ្រប់គ្រង និងបង្រៀន ការចុះកម្មសិក្សា ការផ្លាស់ប្តូរវប្បធម៌ ការអភិវឌ្ឍកម្មវិធីសិក្សា ការស្រាវជ្រាវរួមគ្នា និងការបណ្តុះបណ្តាលកម្មវិធីឆ្លងដែនជាដើម
៦៖ មានការទទួលស្គាល់ និងគាំទ្រពីអ្នកសិក្សាគ្រប់មជ្ឈដ្ឋាន នៃព្រះរាជាណាចក្រកម្ពុជា ដែលមាននិស្សិតចុះឈ្មោះចូលរៀនប្រមាណ ២.០០០នាក់ នៃឆ្នាំសិក្សានីមួយៗ
៧៖ មានការទទួលស្គាល់ និងគាំទ្រពីទីផ្សារការងារ ដូចជាស្ថាប័នរដ្ឋ ឯកជន អង្គការជាតិ និងអន្តរជាតិ តាមរយៈនិស្សិតកំពុងសិក្សាទទួលបានការងារធ្វើប្រមាណ៧០% និងនិស្សិតបញ្ចប់ការសិក្សាទទួលបានការងារធ្វើប្រមាណ ៩២,៤០%
៨៖ មានគម្រោងពង្រីកហេដ្ឋារចនាសម្ព័ន្ធរបស់សាកលវិទ្យាល័យ សៅស៍អ៊ីសថ៍អេយសៀស្របតាមស្តង់ដារអន្តរជាតិ ដែលសាកលវិទ្យាល័យមានផ្ទៃដីប្រមាណ៤០ហិចតា សម្រាប់ពង្រីកហេដ្ឋារចនាសម្ព័ន្ធរបស់សាកលវិទ្យាល័យកម្រិតស្តង់ដារអន្តរជាតិរួចរាល់ហើយ៕
