ប្រធានក្រុមការងារចុះជួយខណ្ឌឫស្សីកែវ ជម្រុញឲ្យមានការសាមគ្គីភាពផ្ទៃក្នុង និងបង្កើនសមាជិកថ្មីដើម្បីភាពខ្លាំងរបស់គណបក្ស

មានប្រសាសន៍ទៅកាន់ថ្នាក់ដឹកនាំបក្សមូលដ្ឋាន សមាជិក សមាជិកា តំណាងគណបក្សទូទាំងខណ្ឌ ឯកឧត្តមប្រធានក្រុមការងារបានក្រើនរំលឹកឲ្យបង្កើនការលើកកំពស់ប្រសិទ្ធភាពការផ្តល់សេវាសាធារណៈជូនប្រជាជន ដូចជាវិស័យអប់រំ សុខាភិបាល សាធារណៈការ និងវិស័យផ្សេងៗទៀតគឺសុទ្ធតែជាភារកិច្ចចាំបាច់ ហេតុនេះរឿងដំណោះស្រាយគោលនយោបាយល្អៗផ្សេងៗគឺជារឿងមួយ ចំណែកសេវាកម្មសាធារណៈ គឺត្រូវធ្វើឡើងដោយគ្រប់តួអង្គពាក់ព័ន្ធទាំងអស់ប្រកបដោយប្រសិទ្ធភាព ទំនួលខុសត្រូវខ្ពស់បន្ថែមទៀត និងរហ័សទាន់ចិត្ត តាមពិតវាមិនមែនជាគោលនយោបាយដែលផ្តល់ជូនប្រជាជននោះទេ តែវាជាកាតព្វកិច្ចរបស់យើង និងរបស់បក្សយើង ដើម្បីជាតិយើងតែម្តង។

ឯកឧត្តមបានគូសបញ្ជាក់ជាការលើកឡើងពីព្រឹត្តិការប្រវត្តិសាស្រ្តសំខាន់ៗ នៅចុងឆ្នាំ២០១៨ និងដើមឆ្នាំ២០១៩នេះ កម្ពុជាបាននិង ត្រៀមរៀបចំព្រឹត្តិការណ៍ចំនួនបីសំខាន់ៗគឺ កាលពីថ្ងៃទី២ ខែធ្នូ ឆ្នាំ២០១៨ កន្លងទៅ រាជរដ្ឋាភិបាលបានរៀបចំការរំលឹកខួបអនុស្សាវរីយ៍លើកទី៤០ នៃបង្កើតចលនារណសិរ្ស២ធ្នូ នៅស្រុកស្នួល ខេត្តក្រចេះ។ នៅថ្ងៃទី២៩,៣០ និង៣១ ខែធ្នូ ឆ្នាំ២០១៨ នឹងរៀបចំពិធី សម្ពោធវិមានឈ្នះ ឈ្នះ ស្ថិតក្នុងខណ្ឌជ្រោយចង្វារ រាជធានីភ្នំពេញ ដើម្បីជាការអបអរសាទរ ខួប២០ឆ្នាំ នៃការអនុវត្តដ៏ជោគជ័យ នូវនយោបាយឈ្នះ ឈ្នះ របស់សម្តេចតេជោនាយករដ្ឋមន្ត្រី និងអ្វីដែលកាន់តែពិសេសទៅទៀតនោះ គឺយើងបានត្រៀមរៀបចំមិទ្ទិញដ៏ធំមួយនៅ ពហុកីឡដ្ឋានជាតិអូឡាំពិក ដើម្បីរំលឹកខួបអនុស្សាវរីយ៍នៃជ័យជម្នះ ៧ មករា ១៩៧៩ – ៧ មករា ២០១៩ ក្នុងការវាយផ្តួលរំលំរបបប្រល័យពូជសាសន៍ ប៉ុល ពត ហើយបានខិតខំក្នុងការការពារ និងកសាងប្រទេសជាតិពីគំនរផេះផង់ ឲ្យមានការអភិវឌ្ឍដូចសព្វថ្ងៃនេះ៕