រាជធានីភ្នំពេញ៖ “ការអប់រំរួមចំណែកដោះស្រាយបញ្ហាចំណាកស្រុក” នេះជាប្រសាសន៍ឯកឧត្តមបណ្ឌិតសភាចារ្យ
ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ក្នុងសិក្ខាសាលាផ្សព្វផ្សាយស្តីពី របាយការណ៍ពិនិត្យតាមដានការអប់រំសាកលឆ្នាំ២០១៩ (Global Education Monitoring Report 2019) របស់អង្គការយូណេស្កូ ក្រោមប្រធានបទ “ការធ្វើចំណាកស្រុក ការផ្លាស់ទីលំនៅដោយបង្ខំ និងការអប់រំ៖ សង់ស្ពានចម្លង មិនមែនសង់ជញ្ជាំងនោះទេ”។
កម្មវិធីនេះត្រូវបានរៀបចំឡើងក្នុងគោលដៅលុបបំបាត់ការរើសអើងជនចំណាកស្រុក និងអ្នកផ្លាស់ទី ធានាឱ្យបាននូវការផ្ដល់ឱកាសអប់រំដល់ពួកគេដូចគ្នានឹងសិស្សដទៃទៀត ដើម្បីបណ្ដុះធនធានមនុស្សទូទាំងសាកលលោក ជំរុញការអភិវឌ្ឍ និងកំណើនសេដ្ឋកិច្ច មិនត្រឹមតែក្នុងប្រទេសដែលពួកគេកំពុងរស់នៅ ប៉ុន្តែក្នុងប្រទេសកំណើតពួកគេផងដែរ។
កម្មវិធីនេះប្រព្រឹត្តទៅក្រោមអធិបតីភាពឯកឧត្តមបណ្ឌិតសភាចារ្យ ហង់ ជួន ណារ៉ុន រដ្ឋមន្ដ្រីក្រសួងអប់រំ យុវជន និងកីឡា នាព្រឹកថ្ងៃពុធ ៩កើត ខែមាឃ ឆ្នាំច សំរឹទ្ធិស័ក ព.ស.២៥៦២ នៅសណ្ឋាគារកាំបូឌីយ៉ាណា។ ក្នុងឱកាសនោះក៏មានការធ្វើបទបង្ហាញ និងពិភាក្សាលើប្រធានបទខាងលើ ព្រមទាំងមានការចូលរួមពីសំណាក់មន្ដ្រីអប់រំ ស្ថាប័នពាក់ព័ន្ធ គ្រឹះស្ថានឧត្ដមសិក្សា ដៃគូអភិវឌ្ឍន៍ និងអង្គការសង្គមស៊ីវិលនានា៕